ჯანმრთელობაზე ზრუნვა რომ უმნიშვნელოვანესია, ყველამ კარგად იცის. ვარჯიშისა და სწორი კვების მიღმა, რა თქმა უნდა, მნიშვნელოვანია პრევენციული კვლევები იმისთვის, რომ ადრეულ ეტაპზე შევძლოთ დაავადების აღმოჩენა და დამარცხება. დროული დიაგნოსტიკა გამარჯვების საწინდარია.
სკრინინგს უდიდესი მნიშვნელობა აქვს დაავადებების დროული დაიგნოსტიკისათვის, რათა რაც შეიძლება მეტხანს შეუნარჩუნდეს პაციენტს ჯანმრთელობა და გაუხანგრძლივდეს სიცოცხლე. სკრინინგის მნიშვნელობის შესახებ საქართველოში უკვე აქტიურად ალაპარაკდნენ. მისასალმებელია, რომ ამ საუბარმა კამპანიის სახეც მიიღო და ბევრი ნაცნობი და საყვარელი სახე ჩაერთო პროპაგანდაში.
მიუხედავად იმისა, რომ სახელმწიფოს უამრავი დაფინანსებული პროგრამა აქვს კიბოს სკრინინგის მიმართულებით, ადამიანები მაინც თავს არიდებენ მათ გამოყენებას, თითქოს გაურკვეველი გაუბედაობისა და შიშის გამო. არადა, კიდევ ერთხელ უნდა ვთქვათ – დროულად აღმოჩენილი დაავადების მკურნალობა ბევრად იოლია, ნაკლებ დანახარჯთანაა დაკავშირებული და, რაც მთავარია, გამარჯვების უდიდესი შანსია.
გვინდა გიამბოთ ძალიან მნიშვნელოვანი ღონისძიების შესახებ, რომელიც საქართველოში კიბოს სკრინინგის პროგრამის პოპულარიზაციის მიზნით, თბილისის მუნიციპალიტეტის მერიის მხარდაჭერითა და დაფინანსებით, ოპერისა და ბალეტის სახელმწიფო თეატრში „ქართული მუსიკის ცენტრისა“ და ნიკა ნიკვაშვილის მხარდაჭერით, ქართველი მუსიკოსებისა და შემსრულებლების მონაწილეობით ჩატარდა. მართლაც დაუვიწყარი საღამო გაიმართა. ღონისძიების წარმდგენი კომპანია PSP იყო, ის ცნობილია, როგორც ჯანმრთელობის გამარტივებაზე მზრუნველი კომპანია. ინიციატორი კი ეროვნული სკრინინგ ცენტრი გახლდათ.
ღონისძიების მიზანი იყო საზოგადოებისთვის სრულიად ახლებურად დაენახვებინა კიბოს სკრინინგის ჩატარების მნიშვნელობა და საკუთარი წვლილი შეეტანა სიმსივნური დაავადებების ადრეული დიაგნოსტიკის, პრევენციისა და სკრინინგული პროგრამების პოპულარიზაციის საქმეში.
კონცერტში მონაწილეობდნენ: ნანი ბრეგვაძე, ნიკა ნიკვაშვილი, თბილისის ოპერისა და ბალეტის სახელმწიფო თეატრის ორკესტრი, ნატო მეტონიძე, ნინო სურგულაძე, ეკა მამალაძე, ნატალია ქუთათელაძე, კონსტანტინე ყიფიანი, გიორგი ლომისელი, ანსამბლი „შვიდკაცა“ და თიკუნა წიქარიშვილი.
ეთერ კიღურაძე: ეროვნული სკრინინგ ცენტრის დირექტორი
ონკოლოგიური დაავადებები კვლავაც მნიშვნელოვან გამოწვევად რჩება როგორც მსოფლიოს, ისე საქართველოს ჯანდაცვის სისტემისათვის. საქართველოში, საერთო სიკვდილიანობის მხრივ, არაგადამდებ დაავადებებში გულ-სისხლძარღვთა დაავადებების შემდეგ კიბოს მეორე ადგილი უჭირავს.
ეროვნული სკრინინგ ცენტრი კიბოს სკრინინგის პროგრამას ახორციელებს და აქტიურად ზრუნავს მოქალაქეების ჯანმრთელობაზე. მნიშვნელოვანია მოქალაქეებმა იცოდნენ, რომ სკრინინგი არის ჯანმრთელი მოსახლეობის გამოკვლევა, ფარულად მიმდინარე პროცესების გამოსავლენად.
პროგრამის მთავარი გამოწვევა მიზნობრივი მოსახლეობის ჩართულობის, ანუ ე. წ. მოცვის მაჩვენებლის გაზრდაა, რაც, სხვა ღონისძიებებთან ერთად, საზოგადოებაში ცნობიერების ამაღლებით მიიღწევა.
იმისთვის, რომ რაც შეიძლება მეტმა ადამიანმა გაიგოს სკრინინგის მნიშვნელობის შესახებ, მნიშვნელოვანია მასშტაბური პიარკამპანიების ჩატარება და ამ პროცესში საზოგადოებისთვის ცნობილი და საყვარელი სახეების აქტიური ჩართულობა.
სწორედ ამ მიზანს ემსახურება ეროვნული სკრინინგ ცენტრის ინიციატივით, ააიპ „ქართული მუსიკის ცენტრი“-სა და ქალაქ თბილისის მუნიციპალიტეტის მერიის მხარდაჭერით, კიბოს სკრინინგის პროგრამის შესახებ ცნობიერების ამაღლების საინფორმაციო კამპანია, რომლის მთავარი კომპონენტი კონცერტი იყო.
ნათია ხაბეიშვილი, PSP-ს საზოგადოებასთან ურთიერთობის მენეჯერი
ქართველი მუსიკოსებისა და შემსრულებლების ჩართულობით კონცერტის მხარდაჭერით, PSP „ყველაზე მზრუნველის“ კამპანიის ფარგლებში შეუერთდა სკრინინგის შესახებ საზოგადოების ცნობიერების ამაღლების ღონისძიებებს და როგორც მაღალი სოციალური პასუხისმგებლობის კომპანია, თავის სააფთიაქო ქსელში სკრინინგის საინფორმაციო ბუკლეტების გავრცელებით დაეხმარება სიმსივნური დაავადებების ადრეული დიაგნოსტიკის, პრევენციისა და სკრინინგული პროგრამების პოპულარიზაციას საზოგადოებაში.
ჯანმრთელობაზე ზრუნვის გამარტივება PSP-ს საქმიანობის მთავარი მიზანია. PSP-ს სააფთიაქო ქსელის საშუალებით საქართველოს ყველა კუთხეში მცხოვრებ ჩვენს თანამემამულეს შევახსენებთ, რომ დროული დიაგნოსტიკა და პრევენცია ჯანმრთელი და მშვიდი ცხოვრების საწინდარია.
გადავარჩინოთ სიცოცხლე ერთად!
ნანი ბრეგვაძე:
ნუ დაელოდები ნიშანს, შენი ჯანმრთელობისთვის ჩაიტარე დროული სკრინინგი და იცხოვრე მშვიდად! გადავარჩინოთ სიცოცხლე ერთად!
ნატო მეტონიძე:
სკრინინგი ეს არის ჯანმრთელი მოსახლეობის კვლევა ფარულად მიმდინარე პროცესების აღმოსაჩენად. ნუ დაელოდებით ნიშანს, ჩაიტარეთ სკრინინგი და იცხოვრეთ მშვიდად!
ეკა მამალაძე:
ჯანმრთელობა ჩვენთვის უმნიშვნელოვანესია, მოვუწოდოთ ერთმანეთს კიბოს სკრინინგულ პროგრამაში ჩართვისკენ. ნუ დაელოდებით ნიშანს, ჩაიტარეთ დროული სკრინინგი და განაგრძეთ მშვიდი ცხოვრება. გადავარჩინოთ სიცოცხლე!
ნატალია ქუთათელაძე:
მნიშვნელოვანია ჩვენი, ახალგაზრდა თაობის ჩართულობა და მხარდაჭერა დროული სკრინინგის კულტურის ჩამოყალიბებაში. ნუ დაელოდები ნიშანს, ჩაიტარე სკრინინგი, გადავარჩინოთ სიცოცხლე ერთად!
ნიკა ნიკვაშვილი, პროექტის მუსიკალური ხელმძღვანელი
მიმაჩნია, რომ არა მხოლოდ სამედიცინო სფეროს წარმომადგენლების, არამედ ჩვენი ყველასი, საზოგადოების ყველა ჯგუფის პასუხისმგებლობაც არის, ჩვენი შესაძლებლობის ფარგლებში ჩავერთოთ მსგავს კამპანიებში, რაც, ვფიქრობ, თავის წვლილს შეიტანს დაავადების ადრეული დიაგნოსტიკის, პრევენციისა და სკრინინგული პროგრამების პოპულარიზაციის საქმეში და კიდევ ერთხელ შეახსენებს მოქალაქეებს, რამდენად მნიშვნელოვანია დროული მომართვიანობა.
