წარმოგიდგენთ ქართულ კომპანია „ბუშონს“, რომელიც როგორც ბრენდი, 2021 წლის ნოემბრიდან ჩამოყალიბდა. მიზანი და იდეა ღვინისა და მომხმარებლის უფრო მეტი ურთიერთობა იყო, რადგან აქ თითოეულ ბოთლს თავისი ისტორია და თავგადასავალი აქვს. გთავაზობთ ინტერვიუს კომპანიის ერთ-ერთ დამფუძნებელთან, არჩილ კობაურთან, რომელიც უფრო ვრცლად გვიამბობს „ბუშონის“ კონცეფციის შესახებ.
უპირველესად გაგვაცანით „ბუშონის“ შექმნის იდეა. რამდენი ხანია, რაც ბარი ბაზარზე ოპერირებს?
პირველ რიგში მოგესალმებით. თავდაპირველი იდეა იყო ღვინისა და სხვა ალკოჰოლური სასმელების იმპორტ-ექსპორტი. ეს პროექტი დავყავით ეტაპებად და პირველ ეტაპზე გადავწყვიტეთ მსოფლიო ღვინის შემოტანა საქართველოში. რადგან ჩვენი მთავარი ხაზი ღვინოა, გვინდოდა ის ფილოსოფია და ხასიათი გადმოგვეცა ჩვენი მომხმარებლისთვის, რაც ამ პროდუქტს ახასიათებს. მომხმარებელს უფრო მეტი ურთიერთობა უნდა ჰქონოდა ღვინოსთან, ვიდრე უბრალოდ „დახლიდან“ აღებულ პროდუქტთან. აქედან წარმოიშვა „ბუშონის“ შექმნის იდეა, ადგილი, სადაც თითოეულ ბოთლს თავისი ისტორია და თავგადასავალი აქვს და ჩვენი გუნდის წევრები დიდი ენთუზიაზმით გადმოსცემენ ამ ყველაფერს მომხმარებელთან. „ბუშონი“, როგორც ბრენდი, 2021 წლის ნოემბრიდან არის ქართულ ბაზარზე.
გვესაუბრეთ „ბუშონის“ კონცეფციაზე.
როგორც ზემოთ აღვნიშნეთ, „ბუშონი“ პირველ რიგში არის კომპანია, რომელიც სპეციალიზებულია ღვინისა და სხვა ალკოჰოლური სასმელების იმპორტ-ექსპორტით. მთავარი იდეა ისაა, რომ საქართველოსა და დანარჩენ მსოფლიოს შორის შეიქმნას ძლიერი ხიდი, რაც სხვადასხვა ასპექტში განვითარების საშუალებას მოგვცემს. ამ ეტაპზე ჩვენთვის პრიორიტეტულია, საქართველოში ხელმისაწვდომი გავხადოთ მსოფლიო ღვინო, რაც საშუალებას მისცემს ამ სფეროს მოყვარულებს, შეიქმნან საინტერესო დეგუსტატორული მოგზაურობა. ამავდროულად, ახალგაზრდა მეღვინეებსა და უბრალოდ, მოყვარულებს შესაძლებლობა ექნებათ, ცნობიერება აიმაღლონ თანამედროვე ღვინის კომერციულ თუ ტექნიკურ საკითხებში.
აქედან გამომდინარე, გავხსენით ღვინის ბარი „ბუშონი“, სადაც ყველა დაინტერესებულ სტუმარს ჩვენი საინტერესო მოგზაურობის გაზიარების ენთუზიაზმით ვიღებთ. ამასთანავე ჩვენი სამზარეულო, მომხმარებელს სთავაზობს საინტერესო და სასმლის შესაბამის კერძებსა და ხემსს.
ჩვენი ბარი მდებარეობს ფალიაშვილის ქუჩის 60 ნომერში. ეს არის ადგილი, სადაც შეგიძლიათ მეგობრებთან ერთად გაატაროთ საღამო, საქმიანი შეხვედრები დაგეგმოთ, ახლობელ ადამიანს საინტერესო საჩუქარი გაუკეთოთ.
რას სთავაზობთ თქვენთან მოსულ სტუმრებს?
პირველ რიგში ვთავაზობთ ღიმილსა და კარგ განწყობას. მიზანი არის ის, რომ მომხმარებელი თავს კომფორტულად გრძნობდეს. შემდეგ ვუხსნით ჩვენს კონცეფციას და თუ ფართო არჩევანის გამო სტუმარმა არ იცის რა გასინჯოს და რითი ისიამოვნოს, ჩვენი კონსულტანტები აუცილებლად აარჩევინებენ მისთვის სასურველ გემოს. რა თქმა უნდა, სასმელთან ერთად საკვები მენიუც გვაქვს, რომელსაც უკვე ძირეულად ვცვლით და ზაფხულისთვის განახლებული გასტრონომიული მენიუთი დავიწყებთ სეზონის გახსნას.
რამდენი და რა სახეობის სასმელია თქვენთან წარმოდგენილი?
დღეს „ბუშონში“ 140 სახეობის ღვინოა წარმოდგენილი: ფრანგული, არგენტინული, იტალიური, სამხრეთ აფრიკული და სხვა ქვეყნების. ასევე ლიქიორი, ცქრიალა ღვინო და შამპანური. ახლა დავასრულეთ მუშაობა ჩვენს უცხოელ პროდუქტორებთან და გაზაფხულიდან დაგვემატება „ახალი მსოფლიოს“ ღვინოები, როგორიცაა ახალი ზელანდია, ავსტრალია და აშშ. ასევე სხვა ალკოჰოლური სასმელები, საავტორო კოქტეილები, რაც ყოველთვის კარგი იდეაა თბილ ამინდებში და საშუალებას გვაძლევს მოხმარებელს ახალი გემო შევთავაზოთ.
რა მიგაჩნიათ „ბუშონის“ ნიშად?
„ბუშონის“ ნიშა არის ის ადგილი და ყველა ის პიროვნება, ვისაც საინტერესოდ მიაჩნია ახალი გემოების გასინჯვა და არ ეშინია სიახლის დანერგვის. დღეს საქართველოში ცოტაა ასეთი ადგილი, მაგრამ ეს ჩვენ არ გვაშინებს, რადგან ბრენდი შეიქმნა და ვინც გვენდო და აგრძელებს ჩვენთან თანამშრომლობას, ხვდება, რომ ამ მოგზაურობაში მონაწილეობა მხოლოდ სასარგებლო იქნება მათი კომერციული და იდეური განვითარებისთვის.
ვინ არიან თქვენი ძირითადი მომხმარებლები?
ამ კითხვაზე პასუხის გაცემა გამიჭირდება, რადგან რაც უნდა უცნაური იყოს, დაარსებიდან დღემდე არ გვქონია შემთხვევა, მარტო ერთი სეგმენტის მომხმარებელი გვყოლოდა და მათზე გვემუშავა.
„ბუშონის“ პროდუქცია გათვლილია ყველაზე, საფასო პოლიტიკა ისე გვაქვს დაწყობილი, რომ ყველანაირ ბიუჯეტს ვაკმაყოფილებთ. განხრაც სხვადასხვანაირია, ღვინო – ყველა გემოსი და ფერის, ასევე, უალკოჰოლო სასმელების საინტერესო ბიო და ხარისხიანი არჩევანი. მძიმე ალკოჰოლის პროექტი დავასრულეთ და ექსკლუზიური მარკები, რომელიც გაზაფხულიდან დაგვემატება, გულგრილს არავის დატოვებს.
როგორია თქვენი სამომავლო გეგმები?
ზემოთ ნახსენები პროექტის განხორციელებას ქართულ ღვინოზეც ვაპირებთ, ანუ მის საზღვარგარეთ ექსპორტს. „ბუშონის“ იდეა არის არა ის, რომ კონკურენცია გავუწიოთ ადგილობრივ წარმოებას, არამედ ამ პროექტით მეტი საშუალება მივცეთ ქართულ ღვინოს მსოფლიო ბაზარზე დასამკვიდრებლად.
გეგმაც ამაში მდგომარეობს, – შევქმნათ ის კულტურული გადაკვეთა, რომელიც სტაბულურად მოგვცემს საშუალებას, სხვადასხვა ქვეყნის მომხმარებელს გავაცნოთ სითხე, რომელიც ფილოსოფიურად ბევრად უფრო მეტს იტევს, ვიდრე ალკოჰოლია; სითხე, რომელსაც ჰქვია ღვინო და ხშირ შემთხვევაში ზუსტად გადმოგვცემს იმ ხალხის გენეტიკასა და ხასიათს, საიდანაც წარმოიშვა.
