ახალი თაობის გამორჩეული ხმა, „ინტერნეტ მეგა-პოპულარობის ავატარი“ – ბილი აილიში არის 19 წლის ამერიკელი მომღერალი და სიმღერების ავტორი, რომელიც განსხვავებული ხერხებით ცდილობს Body Positivity-ის მთელს მსოფლიოში პოპულარიზაციას, რათა სილამაზის თანამედროვე სტანდარტების არსებობისა და სხეულის განსხვავებული ფორმების ქონის მიუხედავად, ადამიანებმა თავი მაქსიმალურად თავისუფლად, კომფორტულად და სასურველად იგრძნონ.
ბილი აილიშის პიროვნული სტილი ანდროგენულ გარეგნობასთან შერწმით გამოხატავს თინეიჯერულ მისწრაფებებს, რომლებიც მის გულშემატკივრებს მოუწოდებს უშიშრად გამოხატონ საკუთარი მოსაზრებები, რათა იყვნენ ინდივიდუალურები, ყველასგან გამორჩეულები და განსხვავებულები.
.jpg)
ბილიმ ჩამოაყალიბა მყისიერად იდენტიფიცირებადი იმიჯი და ჰიპ-ჰოპის ზეგავლენის მქონე მაღალი მოდის სამოსით შექმნა სხეულის „იდუმალი სილუეტი“. ახალგაზრდა ვარსკვლავის თავდაპირველი ინტერესები აერთიანებდა სპორტულ მანქანებს, საშინელებათა ფილმებს, განსხვავებული იუმორის გრძნობას, რასობრივ სამართლიანობასა და ბავშვობის კუმირს – ჯასტინ ბიბერს.
მიუხედავად პატარა ასაკისა, ბილი ყოველთვის ახერხებს საკუთარი შესაძლებლობებით საზოგადოების გაოცებას, თუმცა ამჯერად ფურორი არა მისმა ექსცენტრიულმა მუსიკალურმა ვიდეოებმა, არამედ მისმა განსხვავებულმა ვიზუალმა მოახდინა.
ბევრი ადამიანისთვის სილამაზის სტანდარტებსა და პირად იმედგაცრუებას შორის გამართული კონფლიქტის მოგვარება რთულია, ბილი ამ მოვლენას “ყველაზე დიდ დაუცველობას“ უწოდებს. „სიმართლე გითხრათ ვერ ვიტან ჩემს მუცელს. ადრეულ ასაკში ჩემი სხეული დეპრესიის საწყისი მიზეზი იყო.” – განაცხადა 19 წლის პოპვარსკვლავმა, რომლისთვისაც ბრიტანული Vogue-ის გადაღებების პროცესი სიახლისმომცემი და სასიამოვნო, თუმცა ამავდროულად უხერხული და უცხო იყო.
საინტერესოა ის ფაქტი, რომ ბილიმ ფოტოსესიაზე სხეულის სილუეტის გამოსაკვეთად არაერთი კორსეტი მოისინჯა, საბოლოოდ კი ბეტი ბროსმერის ინსპირაციით შექმნილი ძველებური, კლასიკური pin-up იმიჯი მოირგო.
როდესაც შემოქმედებითი ჯგუფის წევრებმა ჰკითხეს, თუ რატომ სურდა სილუეტის გამოსაკვეთად კორსეტის ჩაცმა თუ “სხეულის პოზიტიურობის” პოპულარიზაცია სურდა, ბილიმ წარბები მაღლა აწია და თქვა: “მე იმის გაკეთება შემიძლია, რაც მსურს.”
“ყველაფერი იმაზეა დამოკიდებული, თუ რა განიჭებს ადამიანს სიამოვნებას და რა გაგრძნობინებს ბედნიერებას. თუ გინდა პლასტიკური ოპერაციის გაკეთება, უნდა გაიკეთო. თუ გინდა ჩაიცვა კაბა, რომელზეც ყველა გეუბნება, რომ საშინლად არ გიხდება, ყურადღებას ნუ მიაქცევ, ჩაიცვი, რადგან შენ თუ გგონია, რომ კარგად გამოიყურები, ესეიგი კარგად გამოიყურები”.
გასული წლის ოქტომბრის თვეში ტაბლოიდებმა ბილი აილიშის პაპარაცული ფოტოები გაავრცელეს, მომღერალმა კი სხეულის ფორმების გარეგნული იერსახის გამო საზოგადოების მწვავე კრიტიკა მიიღო. ახალგაზრდა ვარსკვლავი ფიქრობს, რომ ადამიანები მას მისი შემოქმედების მიხედვით უნდა აფასებდნენ და არა სხეულის ფორმების გამო აკრიტიკებდნენ.
“ხშირად იმის გამო, თუ როგორ მიყურებს სამყარო, თავს არასასურველად ვგრძნობ, მაგრამ ეს ჩემი ცხოვრებაა. ვფიქრობ, ადამიანები არ უნდა გვიყურებდნენ უპატივცემულოდ მხოლოდ სხეულის ფორმების საჯაროდ გამოჩენის გამო.“
“ძალიან შეურაცხმყოფელია ადამიანების დამცინავი დამოკიდებულება. ხალხს სურს, რომ მსგავს თემებზე არ ვისაუბროთ, თუმცა ერთ რამეს ვერ ხვდებიან, რაც უფრო მეტად გაამახვილებენ ყურადღებას იმ თემებზე რაც მათთვის მიუღებელია, მით უფრო მეტი ყურადღება დაეთმობა მათ.”
„ბავშვობაში ვერ ვაანალიზებდი ასაკს რა მნიშვნელობა ჰქონდა. როდესაც ახალგაზრდა ხარ, გგონია, რომ ყველაფერი იცი, ყველაზე ჭკვიანი და ჩამოყალიბებული ხარ, მაგრამ საერთოდ არ არის აუცილებელი ყველაფერი იცოდე. მოლოდინი ექსპლუატაციისთვის სივრცეს ქმნის. ხალხს ავიწყდება, რომ იზრდები და მიმდინარე მოვლენებისადმი დამოკიდებულება გეცვლება.“
„მინდა, რომ ადამიანებმა მომისმინონ, არ მინდა მხოლოდ იმის გარკვევა დაიწყონ, თუ სიმღერების საშუალებით ვისზე ვსაუბრობ. რა თქმა უნდა, ყველას ჰქონია პირად ცხოვრებაში წარუმატებელი გამოცდილება, ისევე როგორც მე, თუმცა ჩემი შემოქმედება რომელიმე კონკრეტულ ადამიანს არასდროს არ ეხება.“
თანამედროვე სამყაროში, სადაც ახალი ტენდენციების პარალელურად თინეიჯერი გოგონები იმიჯს ხშირად იცვლიან, ბილის თაყვანისმცემლებმა ზუსტად იციან, რომ მისი ახალი სტილი მისივე ახალი ალბომის მომასწავებელია.
განსხვავებით წინა თაობის თინეიჯერი პოპ-ვარსკვლავებისგან, რომლებიც საკუთარი თავის ძიების პროცესში ხშირად კარგავდნენ იდენტობას, ბილი აილიში ღრმად არის დარწმუნებული პირად ინტერესებში და ამას საკუთარი შემოქმედებითაც გამოხატავს.
“არ მგონია არსებობდეს ისეთი პოპვარსკვლავი, რომელიც ასეთ პერსონალურ სიმღერებს წერს. ბილი აილიშის შემოქმედება მისი ემოციებიდან, მისივე ფიქრებიდან მოდის. ვოკალური თვალსაზრისით, ძველ თაობაში ბილი ჰოლიდეის მახსენებს, თუმცა დღევანდელ ინდუსტრიაში ის არავის ჰგავს.“ – ელტონ ჯონი ბილი აილიშის შესახებ.
“ბილი წარმოადგენს რაღაც ახალს. ის არის მუდმივად განვითარებადი არტისტი ინოვაციური ხედვით, რომელმაც ზუსტად იცის სად, როდის და როგორ უნდა იმოქმედოს. ამიტომაც არის მასთან მუშაობა ყოველთვის მასტიმულირებელი, ის მაიძულებს განსხვავებულად ვიფიქრო.” – გუჩის კრეატიული დირექტორი ალესანდრო მიკელე.
.jpg)
ბილი ხშირად იხსენებს საკუთარ სიტყვებს 2019 წლის სინგლიდან When I Was Older: “მე მაინც საკუთარი თავის მსხვერპლი ვარ, მაგრამ ჩემს თვალებში კვლავ ბოროტმოქმედი ვარ.“ ამერიკელი პოვარსკვლავის აზრით, წლების გასვლასთან ერთად უფრო და უფრო ვითარდება, მიუხედავად მის გარშემო არსებული ადამიანების ნეგატიური დამოკიდებულებისა.
“მინდა ყველამ იცოდეს, რომ არ აქვს მნიშვნელობა ვინ ხარ, როგორია შენი ცხოვრება, როგორი ადამიანები არიან შენს გარშემო, რამდენად ძლიერი და ჭკვიანი ხარ, ყოველთვის შეიძლება გამოგიყენონ და თქვენით ისარგებლონ. ეს მსოფლიოს ერთ-ერთი ყველაზე დიდი პრობლემაა. სამარცხვინოა, როდესაც მოზარდებს უწევთ იმის გაანალიზება, რომ ვინმეს ან რამის მსხვერპლნი არიან.”
„ხალხი ხშირად მეკითხება, მოეწონებოდა თუ არა ჩემი თავი ჩემსავე ახალგაზრდა ვერსიას? საინტერესო კითხვაა, რომელზეც ბევრი საინტერესო პასუხი მაქვს. მიუხედავად ამ ყველაფრისა, არ მინდა ვიყო პიროვნება, რომელიც ჩემს ასაკოვან ვერსიას მოეწონება. არ მინდა აწმყოში ვეცადო ვიყო ის ადამიანი, რომელიც მომავალში ვიქნები. ადამიანებს უნდა ახსოვდეთ, რომ ყოველთვის იყვნენ ისინი, ვინც სინამდვილეში არიან, სხვანაირად ამ სამყაროში უბრალოდ გავგიჟდებით.“
