სენ-ტროპეში ბრიჯიტ ბარდოს დაკრძალვა გაიმართა. ფრანგული კინოს ლეგენდა ერთი კვირის წინ, 91 წლის ასაკში გარდაიცვალა. მსახიობის მეუღლემ, 84 წლის ბერნარ დ’ორმალმა საზოგადოებას მსახიობის უკანასკნელი სიტყვებისა და სიკვდილის მიზეზის შესახებ უამბო.
როგორც გაირკვა, ბარდო ონკოლოგიური დაავადებით გარდაიცვალა. მსახიობმს ორი ოპერაცია ჩაუტარდა. უკანასკნელი დღეები მან მეუღლესთან და შინაურ ცხოველებთან ერთად ლა-მადრაგის მამულში გაატარა. დ’ორმალის თქმით, ძლიერი ტკივილების გამო მსახიობს სიცოცხლის სწრაფად დასრულება უნდოდა.
“მე მის გვერდით ვიძინებდი. გავიგე, როგორ თქვა „პიუპიუ“ – ეს იყო სასიყვარულო მეტსახელი, რომლითაც ერთმანეთს მივმართავდით და ამით ყველაფერი დასრულდა“, – აღნიშნა დ’ორმალმა Paris Match-თან ინტერვიუში.
ბრიჯიტ ბარდოს დაკრძალვას დაესწრნენ მისი მეგობრები, კოლეგები, ზოოაქტივისტები, მეუღლე, ასევე 65 წლის ვაჟი ნიკოლა–ჟაკ შარიე მეუღლესთან ანე–ლინე ბიერკანთან, ქალიშვილებთან ანასთან და თეასთან და შვილიშვილებთან.
კარიერის განმავლობაში ბრიჯიტ ბარდო არაერთ ცნობილ ფილმში მონაწილეობდა: „და ღმერთმა შექმნა ქალი“ (1956), „ბაბეტა მიდის ომში“ (1959), „სიმართლე“ (1960), „კერძო ცხოვრება“ (1962), „ვივა, მარია!“ (1965) და სხვა.
მსახიობი ოთხჯერ იყო გათხოვილი, ასევე ცნობილია მისი მრავალრიცხოვანი რომანები კოლეგებთან. ბარდომ თავისი ერთადერთი შვილი ნიკოლა-ჟაკი 1960 წელს, მსახიობ ჟაკ შარიესგან გააჩინა. განქორწინების შემდეგ ბავშვი საცხოვრებლად მამასთან დარჩა, ხოლო ვარსკვლავი ხშირად აღიარებდა, რომ დედობისთვის მზად არ იყო და შვილის გაჩენა მხოლოდ ქმრის დაჟინებული თხოვნით გადაწყვიტა. მსახიობმა შვილთან ურთიერთობის დალაგება მხოლოდ მაშინ შეძლო, როცა ნიკოლა-ჟაკი გაიზარდა და თავისი ოჯახი შექმნა.
ძირითადი პროფესიის გარდა, ბრიჯიტ ბარდო ცნობილია როგორც აქტივისტი და ცხოველთა უფლებების დამცველი. 1986 წელს მან ბრიჯიტ ბარდოს ფონდი დააარსა. ორგანიზაცია აქტიურად იბრძოდა ველური ცხოველების დაჭერის, ცხოველების ბეწვით ვაჭრობის, ცხოველების ექსპერიმენტებში გამოყენების, ბრაკონიერობის, თევზაობის და ვეშაპებზე ნადირობის წინააღმდეგ.
მომღერალი მირეი მატიე ბრიჯიტ ბარდოს დაკრძალვაზე მივიდა
ასევე დაგაინტერესებთ
