ეს ის იშვიათი შემთხვევაა, როდესაც ფილმის სათაური სრულ თანხვედრაშია იმასთან, რაც წითელ ხალიჩაზე ხდება. ოსკაროსანმა მსახიობმა, ანჯელინა ჯოლიმ მაღალი მოდის კვირეულის დასრულებიდან ორი კვირის შემდეგ პარიზში თავისი ახალი ფილმი – „კუტიური“ წარადგინა. 50 წლის ვარსკვლავი ფოტოგრაფების წინაშე Givenchy-ს ვერცხლისფერი მაქმანის კაბაში გამოჩნდა.
აღსანიშნავია, რომ 2020 წლის შემდეგ Givenchy „ოტ კუტიურის“ ჩვენებებში აღარ მონაწილეობს და ამ ეტაპზე მაღალი მოდის პოპულარიზაციას არ ეწევა. სავარაუდოდ, ბრენდის არჩევანი ფემინისტური კონტექსტითაა განპირობებული, რომელიც ჯოლის ფილმშიც იგრძნობა.
სხვა დეტალიც საინტერესოა – ჯოლის Chanel რატომ არ აცვია? ფილმში „კუტიური“ ის ამერიკელი რეჟისორის, მაქსინ უოლკერის როლს ასრულებს, რომელიც პარიზის მოდის კვირეულზე იგებს, რომ მკერდის კიბო აქვს. გადაღებების დროს ის პარტნიორს, ოპერატორ ანტონს უახლოვდება და მათ შორის პროფესიული ურთიერთობა სიყვარულში გადაიზრდება.
ამის პარალელურად კიდევ ორი გმირის – სამხრეთ სუდანელი მოდელი ადას და ვიზაჟისტ ანჟელის ისტორია ვითარდება. რეჟისორმა ალის ვინოკურმა მიიღო უპრეცედენტო შესაძლებლობა, Chanel-ის ატელიეებში, სახელოსნოებსა და შოურუმებში ემუშავა. ფილმში ნაჩვენებია მოდის სახლის რეალური სივრცეები, მათ შორის კამბონის ქუჩაზე მდებარე ცნობილი კიბე, რომელსაც გაბრიელ შანელის პირად აპარტამენტებამდე მიჰყავხარ. კოსტიუმები მხატვარ პასკალინ შავანთან თანამშრომლობით შეიქმნა, პოდიუმის ლუქები კი ბრენდის არქივებით და აქტუალური კოლექციებით იყო შთაგონებული.
ჯოლისთვის „კუტიური“ პირადი მნიშვნელობის პროექტია. დედამისი, მარშელინ ბერტრანი, მკერდისა და საკვერცხეების კიბოთი გარდაიცვალა. თავად მსახიობმა 2013 წელს ორმხრივი პროფილაქტიკური მასტექტომია გაიკეთა, ორი წლის შემდეგ კი მაღალი ონკოლოგიური რისკების გამო, საკვერცხეები და ფალოპის მილები ამოიკვეთა. ეს გამოცდილება მისი გმირის ისტორიას პირდაპირ ეხმიანება. გადაღებების დროს მსახიობს მხარდაჭერისა და ხსოვნის სიმბოლოდ დედის ყელსაბამი ეკეთა.
ფილმის პრემიერაზე ანჯელინას მხარს ფრანგი მსახიობი და რეჟისორი ლუი გარელი უმშვენებდა. მან ფილმში ოპერატორისა და მაქსინ უოლკერის კოლეგის როლი შეასრულა. ამბობენ, რომ მსახიობები ფილმზე მუშაობის დროს დაახლოვდნენ, რასაც ლუი გარელისა და მსახიობ ლეტიცია კასტას 10 წლიანი ქორწინების დასრულება მოჰყვა. წყვილს ოთხი წლის შვილი ჰყავს.
Посмотреть эту публикацию в Instagram
ასევე დაგაინტერესებთ
#OK! ანჯელინა ჯოლიმ Time -ის გარეკანზე მასტექტომიისგან დატოვებული იარები გამოაჩინა
