ჯანდაცვის მსოფლიო ორგანიზაციამ გამოაქვეყნა ანგარიში, რომლის თანახმად, მსოფლიოში დაახლოებით 840 მილიონ ქალს (თითქმის ყოველი მესამე) ცხოვრებაში ერთხელ მაინც პარტნიორის მხრიდან ფიზიკური ან სექსუალური ძალადობა გამოუცდია.
ანგარიშში, რომელიც 2000-დან 2023 წლამდე პერიოდს და 168 ქვეყნის მონაცემებს მოიცავს, აღნიშნულია, რომ 20 წლის განმავლობაში ამ მაჩვენებლის შემცირება პრაქტიკულად, ვერ მოხერხდა. შესაბამისად, ქალების რაოდენობა, რომლებზეც ფიზიკური ან სექსუალური ძალადობა ხორციელდება, სტაბილურად მაღალია.
ბოლო 12 თვის განმავლობაში, პარტნიორის მხრიდან ძალადობა 316 მილიონმა ქალმა ანუ 15 წელს გადაცილებული ქალების 11%-მა განიცადა. კვლევის ავტორები აღნიშნავენ, რომ ეს არა მხოლოდ ადამიანის უფლებების დარღვევა, არამედ უზარმაზარი სამედიცინო და სოციალური პრობლემაა.
ანგარიშში ხაზგასმულია პრევენციული პროგრამებისა და მსხვერპლთა მხარდაჭერის დაფინანსების ნაკლებობა, ასევე ძალადობის ადრეული გამოვლენის საქმეში ჯანდაცვის სისტემის სუსტი ჩართულობა.
მედიისა და საზოგადოებისთვის ეს არის გზავნილი, რომ ოჯახური და სექსუალური ძალადობა „პირადი საქმე“ კი არა, საზოგადოებრივი ჯანმრთელობისა და კეთილდღეობის დღის წესრიგის მთავარი საკითხია.
„არ შეიძლება სამართლიანად, უსაფრთხოდ ან ჯანსაღად ჩათვალოს საზოგადოება, როდესაც მისი ნახევარი შიშში ცხოვრობს. ძალადობის დასრულება მხოლოდ პოლიტიკის საკითხი არ არის; ეს ღირსების, თანასწორობისა და ადამიანის უფლებების საკითხია. ციფრების უკან ქალი ან გოგონა დგას, რომლის ცხოვრება სამუდამოდ შეიცვალა. ქალების გაძლიერება აუცილებელი პირობაა მშვიდობის, განვითარებისა და ჯანმრთელობისთვის“, – განაცხადა ჯანმო-ს გენერალურმა დირექტორმა, ტედროს ადანომ გებრეიესუსმა ანგარიშის შეფასებისას.
ასევე დაგაინტერესებთ
