ახალი წლის მოახლოებასთან ერთად, ადამიანები სახლის გულმოდგინედ დალაგებას და მოწესრიგებას იწყებენ. მათ ყოველთვის სჯეროდათ, რომ თუ ძველს არ გაუშვებ, ახლისთვის ადგილი არ დარჩება.
ფსიქოლოგები, სივრცის მოწყობის სპეციალისტები და სკეპტიკოსებიც კი ერთ საკითხში თანხმდებიან – ახალ წლამდე სახლის ზედმეტი ნივთებისგან გათავისუფლება გვეხმარება, რომ მომდევნო ეტაპი სუფთა ფურცლიდან დავიწყოთ. 2026 წელს რომ წარსულის ტვირთით არ შეხვდეთ, მნიშვნელოვანია, სახლიდან ეს 10 ნივთი გაიტანოთ.
- გაბზარული ჭურჭელი
ჭურჭელზე გაჩენილი ბზარები დაუცველობის შეგრძნებას ქმნიან და ქვეცნობიერის დონეზე გამაღიზიანებლად მოქმედებენ. ძველად ასეთ ჭურჭელს „გადინებულ ბარაქას“ უკავშირებდნენ, ფსიქოლოგები კი მას მუდმივი სტრესის წყაროს უწოდებენ. თუ სახლში ასეთი ჭურჭელი გაქვთ, იცოდეთ, რომ მას ახალი წლის დადგომამდე უნდა დაემშვიდობოთ.
- გაჩერებული საათი
საათი, რომელიც კარგა ხანია აღარ მუშაობს, თითქოს დროში გაიყინა. ინტერიერში ის უძრაობისა და დაუსრულებლობის განცდას ტოვებს. თუ საათის მექანიზმი არ მუშაობს შეაკეთეთ ან საცხოვრებელ სივრცეს მოაშორეთ. სახლი სიცოცხლით და მოძრაობით უნდა „სუნთქავდეს“.
- ძველი ცოცხი
ცოცხი ყოველთვის სახლის სისუფთავის სიმბოლოდ ითვლებოდა. მიაჩნდათ, რომ მას სახლიდან ნაგავთან ერთად, უარყოფითი ემოციებიც გაჰქონდა, რაც ზღურბლს მიღმა უნდა დარჩენილიყო. პრაქტიკული თვალსაზრისით, ყველაფერი მარტივადაა – ძველი ცოცხი თავის საქმეს ცუდად ასრულებს, ახლით უნდა ჩავანაცვლოთ. ეს განახლების პატარა, მაგრამ თვალსაჩინო ნიშანია.
- გატეხილი სარკე და გაბზარული მინა
სარკეების მიმართ ყოველთვის განსაკუთრებული დამოკიდებულება არსებობდა და ამას თავისი მიზეზი აქვს. მინასა და სარკეში გაჩენილი ბზარები სივრცეს ვიზუალურად ანაწევრებს და ქაოსის განცდას ქმნის, რაც სახიფათოა. დღესასწაულის წინ ყურადღებით დაათვალიერეთ მინები და სარკეები და ყველაფერი დაზიანებული დაუნანებლად ნაგავში მოისროლეთ!
- ძველი და გაცვეთილი ფეხსაცმელი
ფეხსაცმელი გზებთან და ახალ შესაძლებლობებთან ასოცირდება. ფეხსაცმელი, რომელსაც აღარ იცვამთ, მხოლოდ ადგილს იკავებენ, არეულობას ქმნიან და წარსულში გკეტავენ. თუ ფეხსაცმელი ერთ წელზე მეტი ხანია, არ ჩაგიცვიათ, დახეულია ან უსიამოვნო ემოციებს გგვრით, აუცილებლად უნდა გადაყაროთ.
- გამხმარი მცენარეები და დამჭკნარი თაიგულები
მკვდარი მცენარეები სახლში უძრაობის ერთ-ერთი ყველაზე ძლიერი სიმბოლოა. ისინი შფოთვასა და დაღლილობას შეუმჩნევლად თესავენ. დეკორატიული, ხმელი ყვავილები სხვაა, მაგრამ ვაზაში მივიწყებული დამჭკნარი თაიგული ან გახმარი ქოთნის ყვავილი სულ სხვა. გახსოვდეთ, რომ სახლში მხოლოდ ცოცხალი ყვავილის ადგილია, დანარჩენს უნდა დაემშვიდობოთ.
- ნივთები, რომლებიც ტკივილთან ასოცირდება
უსიამოვნო ადამიანებისგან მიღებული საჩუქრები, სამოსი და ფოტოები, რომლებიც ცხოვრების მძიმე პერიოდს გახსენებთ და ტკივილს გაყენებთ, ემოციური ტვირთია, რომლისგანაც უნდა გათავისუფლდეთ. ექსპერტების გირჩევენ, რომ ტკივილთან დაკავშირებულ ნივთებს გამოცდილებისთვის მადლობა უნდა გადაუხადოთ და გაუშვათ.
- ცარიელი ბოთლები და გაფუჭებული ნივთები
ყველაფერი, რაც არ მუშაობს და არც შეკეთებას ექვემდებარება, „ვიზუალურ ხმაურს“ ქმნის. ის ყურადღებას გვიფანტავს, დასვენებაში ხელს გვიშლის და განწყობაზე უარყოფითად მოქმედებს. წინასაახალწლო პერიოდი კომპრომისების დრო არ არის. თუ ნივთს სარგებლობა აღარ მოაქვს, ნუ წაიღებთ მას მომავალში.
- გაცვეთილი ქსოვილი
ძველი თეთრეული დასვენების ხარისხზე უარყოფით გავლენას ახდენს. ძველი ქსოვილი ცუდად გამოიყურება, სუნსა და მტვერს აგროვებს, ამიტომ მისგან დროულად უნდა გათავისუფლდეთ.
- ვადაგასული კოსმეტიკა და მედიკამენტები
აქ საქმე მხოლოდ ცრურწმენებში კი არა, უსაფრთხოებაშია. ვადაგასულმა საშუალებებმა შეიძლება თქვენს ჯანმრთელობას ზიანი მიაყენოს. ყურადღებით შეამოწმეთ საოჯახო აფთიაქი და კოსმეტიკის ჩანთა და უვარგისი ნივთები თავიდან მოიცილეთ.
ზოგჯერ დიდი ცვლილებების დასაწყებად ერთი პატარა ნაბიჯიც საკმარისია. სცადეთ, 31 დეკემბრამდე ამ სიიდან თუნდაც ერთი ნივთი მაინც მოიშოროთ და შესაძლოა, სწორედ აქედან თქვენი ახალი, უფრო მსუბუქი და წარმატებული წელი დაიწყოს.
ასევე დაგაინტერესებთ
#OK! „ცხენს სროლის ხმა არ უყვარს“ – როგორ შევხვდეთ 2026 წელს ასტროლოგ მიხეილ ცაგარელის რჩევებით?
