არ არის საკმარისი მხოლოდ გადარჩენა, შემოქმედების გარეშე ცხოვრებას აზრი ეკარგება. „ცხოვრობდე“ ჩემთვის ნიშნავს, ქმნიდე და გიყვარდეს. ბოლო ერთი წლის განმავლობაში ბევრი კარგი პორტრეტი გადავიღე – ავტოპორტრეტი იზოლაციის პორტრეტების სერიიდან საკუთარი სახლის სტუდიაში. პანდემია მოტივაცია გახდა, შინ მეტი მცენარე მქონოდა, ეს მე მაბედნიერებს.
გადავწყვიტე, თქვენთვის მეჩვენებინა ის ადგილები, რომლებსაც ხშირად ვსტუმრობ, სადაც მიყვარს სეირნობა. ეს პატარა „მოგზაურობა“ თითქოს ნაცნობ ადგილებში, იმედია, შთაგონებას გაგიჩენთ და მათ კიდევ ერთხელ მოინახულებთ. გაზაფხული ხომ საუკეთესო დროა ფოტოების გადასაღებად.
მშრალ ხიდზე გასეირნება დიდი ხანია, საყვარელი რიტუალია. აქ თქვენი ინტერიერისთვის ხელოვნების ნიმუშების პოვნა შეგიძლიათ.
უნაზესი ფაიფურის, თუ კახური, ვარდებიანი ფარდაგის, ძველი ფირის კამერის, თუ ვერცხლის უნიკალური სამკაულის… ნელ-ნელა მიხვდებით, რისი კოლექციონერობა უფრო გიზიდავთ. სანაპიროზეც ჩაისეირნეთ და უზნაძის 2 ნომერში დიდი მაღაზია „მშრალი ხიდი“ არ გამოტოვოთ.
გერონტი ქიქოძის ქუჩა #9 – ყოფილი პასკევიჩის ქუჩა. სახლი აშენებულია 1880 წელს. საქართველოს დამოუკიდებლობის პერიოდში ამ შენობაში ესტონეთის საკონსულო მდებარეობდა. წარმოადგენს რენესანსულ-ბაროკოულ ეკლექტიზმის ნიმუშს. განსაკუთრებულ ინტერესს იწვევს სადარბაზოს კიბის კონსტრუქცია და მისი მხატვრულ-დეკორატიული გადაწყვეტა. მზიანი ამინდის შემთხვევაში, პორტრეტის გასადაღებად იდეალური ლოკაციაა.
არ გამოტოვოთ ტაბიძის ქუჩის 18 ნომერში სეილანოვების სახლი. აშენებულია 1911 წელს, მოხატულია ბენედიქტ (ბენო) ტელინგატერის მიერ.
ბენო ტელინგატერი თბილისური სახლების დეკორატორად მუშაობდა. ვესტიბიულში ქვეყნების ალეგორიული გამოსახულებები და კიბის უჯრედში დეკორატიული ორნამენტები. კლასიციზმისა და ბაროკოს მოტივები შერწყმულია რომანტიკულ პეიზაჟებთან. არ დაგეზაროთ ბოლო სართულზე ასვლა, სადაც საუკეთესო განათებაა ფოტოს გადასაღებად.
ახალ აღმაშენებელზე ფეხით სეირნობა ცალკე ამბავია. უამრავი ძველი სადარბაზო, ნაირ-ნაირი ჭიშკრები, თბილისური ეზოები ერთ დიდ ამბავს ყვებიან… აღმაშენებლის 36, 93 ნომერი, რომის ქუჩა 22. გერონტი ქიქოძის 11 ნომერში მდებარე საუკუნისწინანდელი შენობას „იტალიურ ვილას“ ეძახიან, ძველ თბილისში ერთ-ერთი გამორჩეული ნაგებობაა, რომელიც შთამბეჭდავი ექსტერიერით მუდმივად იქცევს გამვლელების ყურადღებას.
მოდერნიზმის ეპოქაში აშენებული ეს სახლი რენესანსის პერიოდის არქიტექტურის ნიშნებსაც მრავლად ატარებს. „იტალიური ვილა“ 1917 წელს ბიზნესმენი ძმების, მილოვების დაკვეთით აშენდა. შენობის პროექტის ავტორი თბილისში მცხოვრები ცნობილი რუსი არქიტექტორი, გაბრიელ ტერ-მიქელოვია. დღეს ამ შენობის მესამე სართულზე აუცილებლად სანახავი Buyers Store შოურუმი მდებარეობს.
გია აბესაძის 17 ნომერში, ძველ თბილისურ ეზოში ამ დღეებში გლიცინია აყვავდა, ამ საოცარ სურნელოვან ყვავილს ქართულად „ცის ვაზს“ ეძახიან.
მის სანახავად აქ ყოველ წელს მოვდივარ.
მაისი თბილისში ჩემი საყვარელი თვეა. ძველთბილისურ ეზოებში აყვავებული ნაირფერი ხვიარა ვარდები ნამდვილად თვალწარმტაცი სანახაობაა. მართლაც რომ ვარდობისთვეა.
არასდროს დაგენანოთ დრო ქალაქიდან გასასვლელად. საბედნიეროდ, უამრავი საოცრება გვაქვს კიდევ სანახავი, რომელიც ყოველ წელს სხვანაირი ელფერით წარმოგვიდგება ხოლმე. წინანდლის ვენახებზე სხვა დროს გიამბობთ, ესეც დიდი და საინტერესო ისტორიაა.
ფოტოები: ირმა შარიქაძე/ზუკა ფირცხალაიშვილი
