მაისის ნომერში მოგიყვებით, სად ვპოულობ შთაგონებას, რა არის ჩემი ინსპირაციის წყარო, როგორ ვქმნი ჰარმონიას და ახალ სამყაროს ჩემი შემოქმედებითი პროცესისთვის.
მოგიყვებით იმაზე, რომ შემოქმედისთვის არსებობის ერთადერთი იდეალური ფორმა საცხოვრებელი სივრცის ხელოვნების ნიმუშად გარდაქმნა და შემდეგ ამ სივრცეში მუშაობაა. გაგაცნობთ ჩემს საყვარელ ადგილებს, სადაც ყოფნა მაბედნიერებს, სადაც ვიღებ ფოტოებს, ვსეირნობ, ვეძებ და ვპოულობ.
შევეცდები, კიდევ ერთხელ გავიაზრო, თუ რა ქმნის „თბილისის სტილს“, მის უნიკალურ და თვითმყოფად გარემოს, რა აქცევს თბილისს განუმეორებელ და დანარჩენი სამყაროსთვის ისეთ მიმზიდველ ქალაქად, რომელსაც ვეღარ ივიწყებენ, სადაც აღმოსავლურ-დასავლური, ევროპულ-აზიური არქიტექტურული და კულტურული მიქსი უნიკალურადაა შერწყმული ერთმანეთთან. სადაც ბაროკო და სოც.არტი, „არტ ნუვო“ და კლასიციზმი, გოთიკა და ამპირი, მოდერნი და კონსტრუქტივიზმი ჰარმონიულად მეზობლობენ და მსოფლიოსთვის განსაცვიფრებელ კულტურულ გზაჯვარედინს ქმნიან.
