ქუთაისში მოღვაწე ქართველი დიზაინერი, თეკო ვარდანიძე განსაკუთრებული, სადღესასწაულო კაბების დიზაინით დიდ ყურადღებას იქცევს ფართო საზოგადოებაში. თავდაპირველად მან მცირე რესურსით დაიწყო მიზნისკენ მიმავალ გზაზე სიარული, დღეს კი საკუთარ ატელიეს ხელმძღვანელობს. მიიჩნევს, რომ პროფესიის სიყვარული განმსაზღვრელი ფაქტორია კარიერული წინსვლისა და მუდმივი არდანებების.
თეკო , თქვენთვის, როგორც დიზაინერისთვის, რა არის მნიშვნელოვანი და მთავარი ამ სფეროში?
მნიშვნელოვანია აკეთებდე და იღებდე სიამოვნებას იმ საქმისგან, რომელსაც ემსახურები.
როდის გაჩნდა ამ სფეროსადმი ინტერესი თქვენს ცხოვრებაში?
ინტერესი ბავშვობიდან მქონდა, მაგრამ გარდამტეხი გახდა ის მომენტი, როდესაც მოვხვდი მოდის ინდუსტრიის სფეროში და ვიმუშავე წამყვან დიზაინერებთან ერთად. შეუძლებელია შიდა სამზარეულოს გაეცნო, მიხვდე, თუ რამდენად მაგარი პროფესიაა და არ დაგატყვევოს.
რა გზა გაიარა ატელიემ დაარსების დღიდან დღევანდელობამდე?
პირველი ნაბიჯები დავიწყე სახლიდან, მინიმალური თანხით შეძენილი ქსოვილებით. პატარა კაფსულა კოლექცია გავაკეთე და თავის დასამკვიდრებლად ფართო ასპარეზზე ბრძოლა დავიწყე. ყველა დეტალის საკუთარი ხელითა და ძალებით მოგვარება მიწევდა. ღამეებს ვათენებდი კოლექციის კერვაში, ფოტოგრაფი და კურიერიც თავად ვიყავი. 2 წლის შემდეგ კი შევქმენი სივრცე, სადაც მომხმარებელს შეუძლია, როგორც საკუთარი დიზაინით შევუქმნათ სამოსი, აგრეთვე ჩვენი კოლექციიდანაც შეარჩიოს.
როგორია თქვენი ხედვა კოლექციაზე მუშაობისას ? რას ითვალისწინებთ და ანიჭებთ უპირატესობას?
ვცდილობ შთაგონება ყველაფრისგან მივიღო, მნიშვნელოვანია განწყობა. თუ შინაგანი ბობოქრობა მაქვს, ძალიან მაგარი კოლექცია გამოდის.
თქვენი ხელწერა მოდის ინდუსტრიაში.
ჩემი ძირითადი ნიშა გახდა სადღესასწაულო კაბებზე მუშაობა. ვცდილობ თითოეული მოდელი განსხვავებული შტრიხებითა და დეტალებით დავტვირთო. მთელი პროცესია ქსოვილის არჩევაც. უმნიშვნელოვანესია იყოს ხარისხიანი და იშვიათი, რომელსაც ყველგან ვერ ნახავ.
გაგვაცანით გუნდი, რომელთან ერთადაც მომხმარებელთა სურვილებს აკმაყოფილებთ.
ამ ეტაპზე ჩემი გუნდი 4 ადამიანისგან შედგება. თამამად შემიძლია ვთქვა, რომ ჩემი წარმატების დიდი საყრდენი კედელია მათი არსებობა. ძაალიან მახარებს ის ფაქტი, რომ თითოეული ჩემი გოგონა უზომოდ შეყვარებულია ამ საქმეზე და ამიტომაც გამოდის ყველაფერი ძალიან კარგი და ხარისხიანი.
რა რჩევას მისცემდით დამწყებ დიზაინერებს?
აუცილებლად ბევრი იშრომეთ მიზნისთვის. მთავარია სირთულეებმა არ შეგაშინოთ. ისწავლეთ, მუდმივად განვითარდით. ეს არის სფერო, რომელიც ამოუწურავია.
თქვენი შეფასებით, რა ფაქტორები განსაზღვრავს წარმატებულ ბიზნესს?
როდესაც იცი, რა გინდა და მიზნისკენ გააზრებული ნაბიჯებით მიდიხარ, შედეგს აუცილებლად აღწევ . საქმისადმი სიყვარული გაქცევს კარგ მეწარმედ, კარგი მეწარმეობა კი წარმატების საწინდარია.
გარდა პროფესიისა, როგორია თქვენი თავისუფალი დრო?
სამსახურამდეც და მას შემდეგაც, პირველ რიგში, ვარ დედა და მეუღლე. რთულია ორ მცირეწლოვან ბავშვთან ერთად აკეთებდე საქმეს და დრო გადაანაწილო ისე, რომ ორივე კმაყოფილი იყოს. მადლობა ჩემს ოჯახს გვერდში დგომისთვის, რომ არა ისინი, შეუძლებელი იქნებოდა გამეგრძელებინა ჩემი საქმიანობა. ჩემი თავისუფალი დრო ჩემი ოჯახი და მათთან გატარებული დროა.
სამომავლო გეგმები
ბევრს არ ვისაუბრებ სამომავლო გეგმებზე, უბრალოდ, ერთს ვიტყვი, რომ ზუსტად იქ უნდა ვიყო და ვაკეთებდე ამ საქმეს, სადაც ახლა ვხედავ ჩემს თავს!
ტექსტი: მაკუნა შავგულიძე
ფოტო: ნინი გორდაძე
