“არ ვფიქრობ, რომ ჩემი ცხოვრება ზღაპარს ჰგავს… თავს თანამედროვე, ჩვეულებრიც ქალად მივიჩნევ” – გრეის კელი.
გრეის პატრიცია კელი 1929 წლის 12 ნოემბერს ფილადელფიაში დაიბადა. მომავალი პრინცესა ირლანდიური და გერმანული წარმოშობის შეძლებულ, კათოლიკურ ოჯახში იზრდებოდა.
მამამისი, ჯონ ბრენდან „ჯეკ“ კელი, წარმატებული ბიზნესმენი იყო და ნიჩბოსნობაში ოლიმპიური ჩემპიონიც გახლდათ. დედა, მარგარეტ მაიერი – ყოფილი მოდელი და ფიზიკური აღზრდის მასწავლებელი.
გრეისს უფროსი და, მარგარეტი, ძმა ჯონი და უმცროსი და ელიზაბეთი ჰყავდა. ოჯახში სპორტს განსაკუთრებული მნიშვნელობა ენიჭებოდა, თუმცა გრეისს ბავშვობიდანვე სხვა რამ იზიდავდა – სცენა. მამას სურდა, შვილებს უფრო პრაქტიკული და სტაბილური პროფესია აერჩიათ, მაგრამ გრეისი საკუთარ სურვილს არ თმობდა.
თეატრით ადრეული ასაკიდან დაინტერესდა და საცხოვრებლად ნიუ-იორკში გადავიდა, სადაც ამერიკის დრამატული ხელოვნების აკადემიაში სწავლობდა. პარალელურად კი მოდელადაც მუშაობდა, რათა საკუთარი თავი ერჩინა.
მისი ბიძა ჯორჯ კელი პულიცერის პრემიის მფლობელი დრამატურგი იყო, მეორე ბიძა, უოლტერ „ჯაჯ“ კელი კი ვოდევილის მსახიობი. თუმცა თავად გრეისს ბავშვობიდანვე გარეგნობასთან დაკავშირებული კომპლექსები აწუხებდა:
„არასდროს მეგონა, რომ ლამაზი ან ჭკვიანი ვიყავი” – ამბობდა მსახიობი ერთ-ერთ ინტერვიუში.
სამსახიობო კარიერის დასაწყისი მარტივი არ იყო: აკადემიის წარმომადგენლები მისი ხმის ტემბრს უჩვეულოდ მიიჩნევდნენ და ფიქრობდნენ, რომ მაშინდელ სტანდარტებს არ შეეფერებოდა. გრეისმა მეტყველების გაკვეთილები გაიარა, საბოლოოდ კი სწორედ ეს განსხვავებული ხმა ეკრანული იმიჯის ნაწილად აქცია.
კარიერა
მისი კინოდებიუტი 1951 წელს შედგა ფილმში „თოთხმეტი საათი“ – პატარა, მეორეხარისხოვანი როლით. ერთი წლის შემდეგ კი გარი კუპერის გვერდით გამოჩნდა ფილმში “შუადღე” და კინოკრიტიკოსების ყურადღებაც მიიპყრო.
1954 წელს კი The Country Girl-ში შესრულებული როლისთვის კი “ოსკარი” დაიმსახურა. მსახიობი მაშინ მხოლოდ 25 წლის იყო.
გრეისის ცხოვრებაში განსაკუთრებული ადგილი ალფრედ ჰიჩკოკს ეკავა.
რეჟისორმმა მისი მონაწილეობით სამი ფილმი გადაიღო – „მკვლელობის შემთხვევაში აკრიფეთ M“, „უკანა ფანჯარა“ და „ქურდის დაჭერა“.
ჰიჩკოკისთვის გრეისი განსაკუთრებული ტიპის მსახიობი იყო – შეეძლო ეკრანზე ერთდროულად ყოფილიყო დახვეწილი, მიუწვდომელი და იდუმალი, თუმცა საჭირო მომენტში პერსონაჟის შინაგანი სიძლიერეც გამოევლინა.
მათ პირველ შეხვედრას თავად გრეისი წლების შემდეგ ასე იხსენებდა:
„საშინელი იყო – თითქოს ტვინი გამეყინა. დავიბენი და არ ვიცოდი, რა უნდა მეთქვა”.
ჰიჩკოკი კი მასზე სხვაგვარად საუბრობდა: რეჟისორის თქმით, გრეისს ჰქონდა უნარი, კომედიური სცენებიც კი არა სექსუალურად, არამედ ელეგანტურად ეთამაშა – თვისება, რომელიც, მისი აზრით, ძალიან იშვიათი იყო.
თუმცა ბრწყინვალე კარიერის მიუხედავად, მსახიობს ჰოლივუდთან მარტივი ურთიერთობა არ ჰქონია.
„ხანდახან მგონია, რომ ჰოლივუდი მძულს. ეს ქალაქი დაუნდობელია.“
მისი მთავარი პრობლემა პირადი სივრცის არქონა იყო. იხსენებდა, რომ ნიუ-იორკში ქუჩაში მშვიდად სეირნობა შეეძლო, ჰოლივუდში კი ჩვეულებრივი ვახშამიც კი ფოტოგრაფების გარეშე წარმოუდგენელი ხდებოდა.
მონაკოს პრინცესა
1955 წელი გრეის კელის ცხოვრებაში განსაკუთრებული აღმოჩნდა. The Country Girl-ისთვის მიღებული ოსკარის შემდეგ ის ჰოლივუდის ერთ-ერთი ყველაზე მოთხოვნადი მსახიობი გახდა. იმავე წელს კანის კინოფესტივალზე გაემგზავრა, სადაც მისი ცხოვრება სრულიად სხვა მიმართულებით შეიცვალა.
6 მაისს გრეისს მონაკოს პრინც რენიე III-სთან ფოტოსესია ჰქონდა დაგეგმილი. შეხვედრა თავიდან მხოლოდ ოფიციალური ღონისძიება უნდა ყოფილიყო – ახალგაზრდა ამერიკელი ვარსკვლავი და ევროპელი მონარქი ფოტოგრაფების წინაშე ერთად უნდა გამოჩენილიყვნენ.
თუმცა ყველაფერი მარტივად არ წარიმართა. გრეისის გრაფიკი შეიცვალა და შეხვედრა რამდენჯერმე გადაიდო. საბოლოოდ, იგი მონაკოს სასახლეში მივიდა და სწორედ იქ შეხვდა რენიეს. მონაკოს სასახლის არქივების მიერ მოგვიანებით მომზადებულ გამოფენაშიც მათი პირველი შეხვედრის თარიღად 1955 წლის 6 მაისია მითითებული.
ორივემ კარგად იცოდა, რომ ერთმანეთისგან სრულიად განსხვავებულ სამყაროს წარმოადგენდნენ.
გრეისი 25 წლის ამერიკელი მსახიობი იყო, რომლის კარიერა აღმასვლას იწყებდა. რენიე კი მონაკოს მმართველი იყო – ადამიანი, რომლის ცხოვრებასაც სახელმწიფოებრივი მოვალეობები განსაზღვრავდა.
მათი ურთიერთობა სწრაფად, მაგრამ მაინც საკმაოდ ფრთხილად ვითარდებოდა.
1955 წლის შობის პერიოდში რენიე ამერიკაში ჩავიდა და გრეისის ოჯახს ფილადელფიაში ესტუმრა. რამდენიმე კვირის შემდეგ მათი ნიშნობა უკვე ოფიციალურად დადასტურდა.
მალე გრეისი ამერიკიდან მონაკოში გაემგზავრა. პორტში მას 20 000 ადამიანი დახვდა, ხოლო ქორწილის გასაშუქებლად სამთავროში დაახლოებით 1 500 ჟურნალისტი ჩავიდა. პატარა მონაკო რამდენიმე დღით ფაქტობრივად მსოფლიოს ყურადღების ცენტრში აღმოჩნდა.
18 აპრილს სასახლის ტახტის ოთახში სამოქალაქო ცერემონია შედგა. მეორე დღეს, 19 აპრილს, გრეისი და რენიე წმინდა ნიკოლოზის საკათედრო ტაძარში დაქორწინდნენ.
აღსანიშნავია, რომ პრინცესას კაბა MGM-ის საქორწინო საჩუქარი იყო და მის შექმნაზე დაახლოებით სამი ათეული მკერავი ექვსი კვირის განმავლობაში მუშაობდა.
„მიხაროდა და ვამაყობდი ჩემი მსახიობობით, თუმცა გაკვირვებული ვარ, როცა ამბობენ, თითქოს ჩემი ცხოვრება მას შემდეგ ნაკლებად სრულყოფილი გახდა. პირიქით – საერთოდაც არა. კარიერის თავიდან დაწყებას დიდი ძალისხმევა და შრომა სჭირდება, ამისთვის კი დრო არ მაქვს” – ამბობდა მსახიობი.
გრეისსა და რენიეს სამი შვილი შეეძინათ. მიუხედავად იმისა, რომ ოჯახს უამრავი მოსამსახურე ჰყავდა, გრეისი თავად ამზადებდა საუზმეს შვილებისთვის.
„ყოველთვის ერთად ვსაუზმობდით და დედა საუზმეს თავად გვიმზადებდა“, – იხსენებდა პრიცესას უფროსი ვაჟი მოგვიანებით.
“ალბათ, ცოტა მკაცრი უნდა ვყოფილიყავი. მაგრამ დისციპლინა იუმორით უნდა იყოს დაბალანსებული. ვფიქრობ, ეს ძალიან მნიშვნელოვანია. ახლა, ყველაზე მეტად ჩემს შვილებზე და შვილიშვილებზე ვფიქრობ – იმაზე, როგორ დავამახსოვრდები მათ. მინდა დამიმახსოვრონ, როგორც კეთილი და გამგებიანი ადამიანი” – ამბობდა გრეის კელი.
გარდაცვალება
1982 წლის 13 სექტემბერს გრეისი და მისი 17 წლის ქალიშვილი, სტეფანი, საფრანგეთიდან მონაკოში ბრუნდებოდნენ. გრეისი ავტომობილს თავად მართავდა, რა დროსაც ინსულტი დაემართა. საჭესთან გონება დაკარგა და ავტომობილი გზიდან გადავიდა.
ავარიის შედეგად ორივე ქალი დაშავდა. სტეფანი გადარჩა, თუმცა მძიმე დაზიანებები მიიღო.
გრეისი საავადმყოფოში გადაიყვანეს. დაზიანებები იმდენად მძიმე აღმოჩნდა, რომ მისი გადარჩენა ვეღარ მოხერხდა.
გრეის კელი 1982 წლის 14 სექტემბერს, 52 წლის ასაკში გარდაიცვალა.
ასევე დაგაინტერესებთ:
#OK! ცნობილი ადამიანების ყველაზე ძვირადღირებული საქორწილო კაბები
