2025 წელს, ნებისმიერ წითელი ხალიჩაზე ვარსკვლავები მუდმივად ცდილობდნენ მდიდრული იმიჯით ერთმანეთის დაჩრდილვას. ბევრი კაბა, რომელიც ცნობილმა ქალბატონებმა მნიშვნელოვან ღონისძიებებზე მოირგეს, მოდის ისტორიაში შევა, რადგან განწყობას და ინდივიდუალობას ასახავდა.
გთავაზობთ 2025 წლის დასასრულს გავიხსენოთ 15 ყველაზე ლამაზი კაბა, რომელმაც მსოფლიო აღაფრთოვანა.
დემი მური
ჰოლივუდის სუპერვარსკვლავმა ამერიკული კინოაკადემიის მუზეუმის გალა-საღამოსთვის Prada-ს მოდის სახლის მუქი ღვინისფერი, A-სილუეტის მქონე გრძელი კაბა შეარჩია. კაბის ერთი ნაწილი სწორი იყო, ხოლო მეორე ნაწილს მსუბუქი ქსოვილის ჩანართი ჰქონდა ნაკეცებითა და შლეიფით.
ამანდა საიფრიდი
ერთი შეხედვით, ამანდას კაბა მარტივი და ლაკონიურია, თუმცა სინამდვილეში ის ძალიან დახვეწილი და კარგად გააზრებულია. მსახიობმა გალა-საღამოსთვის Prada-ს შავი სამოსი აირჩია, მკერდზე პიკანტური გამჭვირვალე ჩანართით, რომელიც ნაქარგებითა და მძივებით იყო გაფორმებული. ასეთივე ქსოვილი მეორდებოდა კაბის ბოლოშიც. კაბის სილუეტი სწორი იყო, რაც ამანდას მხდენილობას ხაზს უსვამდა.
მია გოთი
„ფრანკენშტეინის“ ვარსკვლავმა ვენეციის კინოფესტივალის წითელი ხალიჩისთვის Christian Dior-ის კაბა აირჩია, რომელიც სიმარტივესა და სირთულეს — აერთიანებდა. ერთი შეხედვით, სამოსი ძალიან სადა იყო, ყოველგვარი მორთულობისა და ნაქარგის გარეშე, თუმცა ის ძალიან გააზრებული აღმოჩნდა – დრაპირება მსახიობის თეძოებს ელეგანტურად ფარავდა და ბაფთად გარდაიქმნებოდა.
გვინეთ პელტროუ
ფილმის პრემიერაზე გვინეთმა Valentino-ს Haute Couture კოლექციის კაბა მოირგო. კაბის დიზაინი ორი სახეობის ქსოვილს – მდიდრულ ხავერდსა და სადა ერთფეროვან ქსოვილს მოიცავდა. ქვედაბოლოს მაღალი ჭრილი ჰქონდა, ხოლო მხარზე მოთავსებული დიდი ბაფთა სამოსს რომანტიკულობას მატებდა.
ჯულია რობერტსი
ოსკაროსანი მსახიობი ვენეციის კინოფესტივალზე ლეგენდარული Atelier Versace-ს კაბით გამოჩნდა. კაბა დახურული იყო, თუმცა მისი დიზაინი და რომბების პრინტი ბრენდის ძველ მოდურ კოდებს ასახავდა. ლურჯი და შავი ფერების კომბინაციას სახელოები და შლეიფი ასრულებდა.
პამელა ანდერსონი
წელს მსახიობმა ელეგანტური იმიჯი არაერთხელ წარმოაჩინა და Rodarte -ის იასამნისფერი კაბა ერთ-ერთი საუკეთესო არჩევანია. სამოსი იდეალურად უსვამდა ხაზს მსახიობის აღნაგობას და მის ახალ ვარცხნილობას უხდებოდა.
ამალ კლუნი
ადვოკატი და ჯორჯ კლუნის მეუღლე თანამედროვეობის ერთ-ერთი ყველაზე მოდური ქალბატონია. არჩევანის შეჩერება Tamara Ralph -ის უჩვეულო და გლამურულ კაბაზე ამის დასტურია. სამოსი მთლიანად მარგალიტის მძივებით იყო მოქარგული, ხოლო მოშიშვლებული მხრები მას რომანტიკულობას მატებდა.
ქეიტ ბლანშეტი
ავსტრალიელი მსახიობის სამოსი ყოველთვის ყურადღებას იმსახურებს – მას განსაკუთრებით მოსწონს ელეგანტური ლუქები საინტერესო აქცენტებით. ამჯერად Louis Vuitton-ის კაბის ორიგინალურ ჩანართად უჩვეულო მოსასხამი იქცა, რომელმაც იმიჯს სიმსუბუქე შესძინა.
ელ ფენინგი
კანის 78-ე კინოფესტივალზე ვარსკვლავმა Armani Prive-ს წელზე მომდგარი კაბა აირჩია. გრძელი სამოსი მთლიანად ვერცხლისფერი პაიეტებით) იყო დაფარული, ხოლო 3D ყვავილები და მწვანე ფოთლები იმიჯს რომანტიკულ შტრიხებს მატებდა.
სკარლეტ იოჰანსონი
სკარლეტმა კანში Prada-ს ექსკლუზიური კაბა მოირგო. ცისფერი შიფონის ქსოვილისგან შეკერილი სამოსი საღამოს სტილისა და ჰაეროვანი იყო, უამრავი წვრილი ნაკეცითა და შლეიფით.
ბელა ჰადიდი
ცნობილმა მოდელმა Saint Laurent-ის კლასიკა აირჩია. კაბა მის მოხდენილ ტანს ხაზს უსვამდა, ხოლო თეძომდე ჭრილი, ღია გვერდები და ასიმეტრიული წვრილი ბრეტელები იმიჯს ეფექტურობას მატებდა.
დრიუ ბერიმორი
მსახიობმა და ტელეწამყვანმა საზოგადოებაში გამოსვლისთვის Carolina Herrera-ს კაბა შეარჩია, რომლის მთავარი სამკაული უჩვეულო მოცულობითი სახელოები და ბაფთები იყო.
ლინდსი ლოჰანი
Balenciaga-ს კაბა ლინდსის აღნაგობასა და თმის ახალ ფერს იდეალურად ხაზს უსვამდა. რძისფერი სამოსი მთლიანად პაიეტებით იყო მოქარგული, რაც მას Vanity Fair-ის ოსკარის შემდგომი წვეულებისთვის განსაკუთრებულად გლამურულს ხდიდა.
სელენა გომესი
ყინულოვანი ცისფერი Prada-ს კაბა, რომელიც სელენამ წითელ ხალიჩაზე წარადგინა, საოცრად უხდებოდა. მოშიშვლებული მხრები და ლაკონიური ნაკეცები ქვედაბოლოსა და ბრეტელებზე ელეგანტურობის განსახიერება იყო.
სიდნი სუინი
ქერა ლამაზმანი წითელ ხალიჩაზე ისრაელური ბრენდის, Galia Lahav-ის თეთრი კაბით გამოვიდა. სამოსს ღრმა დეკოლტე და წვრილი წელი ჰქონდა, ხოლო ქვედაბოლო ბუმბულებით იყო გაფორმებული.
ასევე დაგაინტერესებთ
