„სიყვარული ჩემთვის ყოველთვის ჟანგბადი იყო. იმისთვის, რომ ვიცოცხლო, სასიყვარულო მუხტი მჭირდება“, – წერდა ბრიჯიტ ბარდო თავის მემუარებში. მსახიობი ოფიციალურად, ოთხჯერ იყო დაქორწინებული და უამრავი სასიყვარულო ურთიერთობა ჰქონდა.
ბარდოს კარიერა 15 წლის ასაკში დაიწყო, როდესაც ფრანგული Elle-ის გარეკანისთვის გადაიღეს. ამ დროს მსახიობის მომავალი ქმარი, როჟე ვადიმი რეჟისორის ასისტენტად მუშაობდა და როდესაც ჟურნალის გარეკანზე ბრიჯიტის სახე დაინახა, რეჟისორი დაარწმუნა, რომ გოგონა სინჯებზე დაეპატიჟებინა. მომავალი მსახიობი 15 წლის იყო, როდესაც 6 წლით უფროს ვადიმთან შეხვედრა დაიწყო, თუმცა დაქორწინებამდე სამი წელი ლოდინი მოუწიათ.
თავად ბრიჯიტი ყოველთვის მიიჩნევდა, რომ მსოფლიო აღიარება სწორედ როჟე ვადიმის დამსახურებით მოიპოვა, ხოლო ვადიმი ბარდოს თავის მუზას უწოდებდა, რომელმაც სარეჟისორო დებიუტზე – „და ღმერთმა შექმნა ქალი“ შთააგონა.
სკანდალური ფილმი კათოლიკურმა ეკლესიამ დაგმო, ხოლო ტეხასში მისი ჩვენება საერთოდ აკრძალეს.
ფილმმა ცოლ-ქმრის კარიერაზე დადებითად იმოქმედა, მაგრამ არა მათ ურთიერთობაზე. გადასაღებ მოედანზე ბარდომ მსახიობ ჟან–ლუი ტრენტინიანთან რომანი გააბა.
ორწლიანი ურთიერთობის შემდეგ ტრენტინიანი ჯარში გაიწვიეს – ბარდომ მას ვერ დაუცადა. გარკვეული დროის განმავლობაში ის მომღერალ და მუსიკოს ჟილბერ ბეკოს ხვდებოდა, თუმცა ეს გატაცებახ ხანმოკლე აღმოჩნდა – ბრიჯიტს წინ უფრო სერიოზული ურთიერთობები ელოდა.
მალე დამწყები მსახიობი მნიშვნელოვნად შეიცვალა – როჟე ვადიმის რჩევით, ის ქერა გახდა, ლამაზად ჩაცმა და მაკიაჟის გაკეთება ისწავლა. მაყურებელი აღფრთოვანებული იყო ამომავალი კინოვარსკვლავის სილამაზითა და გრაციოზულობით.
„მე ყოველთვის იმას ვაკეთებდი, რაც მინდოდა და მორჩა. არ უნდა გეშინოდეს იმის, ვინც ხარ“ – ასე ხსნიდა თავად მსახიობი თავის ცვალებად ბუნებას.
ბრიჯიტმა მესამე ქმარი – ჟაკ შარიე ფილმის „ბაბეტა მიდის ომში“ გადასაღებ მოედანზე გაიცნო. წყვილმა მაშინვე იქორწინა, როგორც კი ბრიჯიტი დაორსულდა. მოგვიანებით მსახიობმა აღიარა, რომ ჟაკზე ქორწინება არ სურდა, მაგრამ იმ დროს ქორწინების გარეშე ბავშვის დაბადება დიდ სკანდალს გამოიწვევდა.
ბრიჯიტისთვის ეს ერთ-ერთი ყველაზე მძიმე ურთიერთობა იყო. იმ პერიოდში მას უკვე მთელი მსოფლიო იცნობდა, მუდმივად ჟურნალისტების გარემოცვაში იყო და ამბობდა, რომ რეპორტიორების შიშით დახურული დარაბების მიღმა უწევდა ცხოვრება. ჯარში ყოფნის დროს შარიეს პანიკურად ეშინოდა ალჟირში მოხვედრის, სადაც მაშინ ომი მიმდინარეობდა და ფსიქიკური აშლილობის სიმულაცია მოუწია. ახალგაზრდა კაცმა შეწყვიტა ჭამა და საბოლოოდ ნამდვილ ნერვულ გამოფიტვამდე მივიდა. 1960 წლის 11 იანვარს ბრიჯიტ ბარდოს ერთადერთი შვილი – ნიკოლა გაჩნდა. შარიე ცოლისგან დაჟინებით მოითხოვდა, რომ მას ოჯახის გამო კარიერა მიეტოვებინა, რასაც 1963 წელს განქორწინება მოგყვა. ნიკოლა მამასთან დარჩა და სრულწლოვანებამდე დედასთან ურთიერთობა არ ჰქონია. „ვერასოდეს ვხედავდი ჩემს თავს დედის და ცოლის როლში“ – აღიარა მოგვიანებით მსახიობმა.
ბრიჯიტ ბარდო მესამე ქმარი, მილიონერი გიუნტერ საქსი გახდა. მათ ერთმანეთი 1964 წლის ზაფხულში, სენ-ტროპეში გაიცნეს, სადაც ბარდო საკუთარ მამულში ისვენებდა.
„რესტორანში შევხვდი და როგორც კი ლაპარაკი დაიწყო, თითქოს მეხი დამეცა. იმავე წამს მივხვდი, რომ მასზე დაქორწინება მინდოდა“, – იხსენებდა საქსი.
ლამაზმანის გულის მოსაგებად მილიონერმა მსახიობის სახლს ვერტმფრენიდან ათასობით წითელი ვარდი დააყარა და რამდენიმე კვირაში დაქორწინდნენ კიდეც.
„ყოველ დღე არ ხდება, რომ მამაკაცი თქვენს ეზოში ტონობით ვარდს ფანტავდეს“ – წერდა მოგვიანებით ბარდო.
მათი ქორწილი ლას-ვეგასში შედგა. რთულია იპოვოთ წყვილი, რომელმაც ლას-ვეგასში იქორწინა და გამოცდას გაუძლო. ბარდოსა და საქსის შემთხვევაშიც იგივე მოხდა – სამუშაოდან დაბრუნების შემდეგ თითოეული საკუთარ ცხოვრებას აგრძელებდა, ზოგჯერ სხვადასხვა ბინაშიც კი ცხოვრობდნენ.
ქორწინებიდან 3 წლის შემდეგ ისინი ერთმანეთს უხმაუროდ დაშორდნენ, თუმცა ბოლომდე მეგობრებად დარჩნენ. განქორწინებიდან 10 წლის თავზე გიუნტერმა ბარდოს უზარმაზარი ბრილიანტის ბეჭედი აჩუქა, რომელიც მსახიობმა 80-იან წლებში, სხვა სამკაულებთან ერთად, ცხოველთა დაცვის ფონდში თანხის მოსაზიდად, აუქციონზე გაყიდა. აუქციონზე სამკაულები გიუნტერ საქსმა შეიძინა და ყოფილ მეუღლეს წერილთან ერთად გაუგზავნა. წერილში ეწერა, რომ სამკაულები ბრიჯიტს ოთხფეხა მეგობრებისთვის თანხის მოსაზიდად კიდევ გამოადგებოდა.
ბრიჯიტ ბარდოს მეოთხე ქმარი ფრანგი მუსიკოსი, მომღერალი, სიმღერების ავტორი, მწერალი, კინორეჟისორი და მსახიობი სერჟ გენსბური გახდა. მას აპოლონის გარეგნობა არ ჰქონდა, თუმცა ქალებს ძალიან უყვარდათ. საქსი ვერ იჯერებდა, რომ ულამაზესი ბრიჯიტი გენსბურს ხვდებოდა, რომელსაც ზურგს უკან „კვაზიმოდოს“ ეძახდნენ, მაგრამ სერჟი საოცრად მომხიბვლელი იყო და ბარდო მისი ქარიზმითა და ნიჭით მოიხიბლა.
ხანგრძლივი არც ეს კავშირი ყოფილა. მტკივნეული განშორების შემდეგ, გენსბურმა ყოფილ ცოლს ალბომი Initials B. B. მიუძღვნა.
“ასეთ სიყვარულზე მხოლოდ ოცნება შეიძლება”, – იხსენებდა ბრიჯიტი თავის მოგონებებში.
ბარდოს ბოლო ქორწინება 58 წლის ასაკში შედგა, როდესაც მსახიობი მეგობრების წრეში ბერნარ დ’ორმალს შეხვდა. ახალგაზრდობაში ის აფრიკაში კინოგაქირავების სფეროში მუშაობდა, მოგვიანებით კი, 1990-იან წლებში, ჟან-მარი ლე პენის მრჩეველი იყო, რომელიც პარტია „ნაციონალურ ფრონტს“ წარმოადგენდა.
წყვილმა ნორვეგიაში, ჩუმად იქორწინა, სადაც ბარდოს შვილის ოჯახს სტუმრობდნენ. ეს სიყვარული ხანგრძლივი და ბედნიერი აღმოჩნდა.
„ერთადერთი, ვინც ჩემთვის არსებობს, ეს არის კაცი, ვინც ჩემს ქმრად ითვლება, ამჯერად ეს ბერნარი გახლავთ – პიროვნება, რომელიც ჩემთან ძალზედ ახლოსაა, ვინც ყოველთვის მამშვიდებს, ვინც ნუგეშს მცემს მწუხარე დღეებში. შეიძლება ითქვას, რომ ჩემი სიცოცხლე მასთან შეხვედრის შემდეგ დაიწყო, ყველაფერი დანარჩენი თითქოს სხვა ყოფაა, რომელიც სხვა განზომილებაში მოხდა“ – აღიარა ბრიჯიტ ბარდომ ერთ ერთ ინტერვიუში.
ფრანგული კინოს ლეგენდა 28 დეკემბერს, 91 წლის ასაკში გარდაიცვალა. 2025 წლის სექტემბრის ბოლოს ბრიჯიტ ბარდო სამი კვირის განმავლობაში ტულონის კერძო კლინიკა „სენტ–ჟანში“ იმყოფებოდა, სადაც ქირურგიული ჩარევა ჩაუტარდა.
ასევე დაგაინტერესებთ
