Bloomberg-ის ცნობით, ჯეფ ბეზოსის ყოფილმა ცოლმა, 55 წლის მაკენზი სკოტმა 2025 წელს ქველმოქმედებაში 7.2 მილიარდი დოლარი დახარჯა, ბოლო ხუთი წლის განმავლობაში, საქველმოქმედო პროექტებისთვის დახარჯულმა თანხამ კი 26 მილიარდი დოლარი შეადგინა.
მაკენზი სკოტის ბოლო შემოწირულობა მსოფლიოს 186 ორგანიზაციას შორის განაწილდება. მათ შორისაა უნივერსიტეტები, გარემოსდაცვითი ორგანიზაციები და სოციალური თანასწორობის ჯგუფები.
შეგახსენებთ, რომ მაკენზი სკოტი 2019 წლამდე Amazon-ის დამფუძნებელ ჯეფ ბეზოსზე იყო დაქორწინებული. განქორწინების შემდეგ, ის ყველა დროის ერთ-ერთი უმდიდრესი ქველმოქმედი გახდა. ბევრი სხვა მილიარდერისგან განსხვავებით, სკოტი საქველმოქმედო შემოწირულობებთან დაკავშირებით რაიმე ვალდებულებას არ აწესებს, რაც მიმღებებს საშუალებას აძლევს საკუთარი შემოწირულობა ისე გამოიყენოს, როგორც სურს.
ბოლო კვირების განმავლობაში სკოტმა 700 მილიონი დოლარი შესწირა 15 კოლეჯსა და უნივერსიტეტს, ასევე ორგანიზაციებს, რომლებიც ფერადკანიანთა თემების სტუდენტებს ხელმისაწვდომი უმაღლესი განათლების მიღებაში ეხმარებიან. Daily Mail-ის ცნობით, United Negro College Fund-ის პრეზიდენტმა მაიკლ ლომაქსმა მას „წმინდა მაკენზი სკოტი“ უწოდა მას შემდეგ, რაც მის ფონდს რეკორდული 70 მილიონი დოლარი შესწირა.
სკოტმა, რომელმაც ბეზოსთან განქორწინების შემდეგ დაახლოებით 38 მილიარდი დოლარი მიიღო, თავის ვებსაიტზე, Yield Giving-ზე, ქველმოქმედებისადმი თავისი მიდგომა ასე ახსნა:
„ხმის მიცემა არ არის ერთადერთი გზა იმის საჩვენებლად, თუ რა ცვლილებები გვინდა საზოგადოებაში. არსებობს მრავალი გზა, რომ მსოფლიოს მიმართულებაზე გავლენა მოახდინოთ “.
სანამ ჯეფ ბეზოსი ბიზნესსა და კოსმოსურ პროექტებზეა ორიენტირებული, მისი ყოფილი ცოლი ფაქტობრივად, პლანეტის ერთ-ერთ ყველაზე გავლენიან ქველმოქმედად იქცა. მისი გადაწყვეტილება, ყოველგვარი ვალდებულების გარეშე, ყოველწლიურად მილიარდები გასცეს ათიათასობით სტუდენტისა და მთელი საგანმანათლებლო დაწესებულების ცხოვრებას ცვლის.
ეს არის ქალი, რომელმაც მსოფლიოს უმდიდრეს კაცთან განქორწინების შემდეგ, ფუფუნების ნაცვლად ქველმოქმედების გზა აირჩია. მაკენზი უბრალოდ „მილიარდერის ცოლი“ კი არა, თანადამფუძნებელი, სტრატეგი, ოპერაციული ძრავა და მორალური კომპასი იყო კომპანიის ყველაზე სახიფათო ეტაპებზე. ამბობენ, რომ მისი წვლილის გარეშე, შესაძლოა, Amazon-ი სიეტლის ჭუჭყიანი ავტოფარეხიდან ვერასოდეს გამოსულიყო, ახლა კი, იმ უზარმაზარი იმპერიის წილით, რომლის აშენებაშიც მეუღლეს დაეხმარა, ის ქველმოქმედების წესებს ცვლის.
2020 წლის 10 ივლისს მაკენზი სკოტის ქონება 62,3 მილიარდ დოლარს შეადგენდა. სექტემბრის დასაწყისში, Amazon-ის აქციების ზრდის გამო, მისმა ქონებამ 68 მილიარდ დოლარს მიაღწია. ამგვარად, მან პლანეტის უმდიდრესი ქალის ტიტული მოიპოვა.
Bloomberg-ის მონაცემების მიხედვით, მაკენზი სკოტი ასევე გახლავთ მე-13 უმდიდრესი ადამიანი მსოფლიოში
გლობალური Forbes-ის მიხედვით, მაკენზი სკოტი 2021 წელს მსოფლიოს ყველაზე გავლენიანი ქალი გახდა.
ასევე დაგაინტერესებთ
#OK! როგორ ცხოვრობს ბეზოსის ყოფილი ცოლი? – ქალი, რომელსაც ბედნიერებისთვის სიმდიდრე არ სჭირდება
