დღეს, როდესაც სტრესი და დაძაბულობა ჩვენი ყოველდღიურობის განუყოფელი ნაწილია, მასაჟის თერაპია სულ უფრო მოთხოვნადი ხდება. მასაჟი გვეხმარება ორგანიზმის გაჯანსაღებაში, სხეულის ორგანოებისა და სისტემების ფუნქციის აღდგენასა და, რაც ყველაზე მნიშვნელოვანია, ცხოვრების ხარისხის გაუმჯობესებაში. მასაჟი, როგორც მიმართულება, შეიძლება ორი ძირითადი დანიშნულებით გამოვიყენოთ, ესენია: სამკურნალო-გამაჯანსაღებელი და სარელაქსაციო. სამკურნალო მასაჟი სხვადასხვა ტრავმისა და დაავადების სამკურნალოდ ტარდება, ხოლო სარელაქსაციო მასაჟის გამოყენების შემთხვევაში დუნდება კუნთები, უმჯობესდება სისხლის მიმოქცევა, ორგანიზმში აქტიურდება რეგენერაციული პროცესები, ქრება დაძაბულობა და სტრესი. ამ სტატიაში წარმოგიდგენთ ინტერვიუს პროფესიონალ მასაჟისტთან – მადონა ბიგანიშვილ-შუბითიძესთან, რომელიც გვიყვება თავისი 21-წლიანი გამოცდილების შესახებ და გვიზიარებს სასარგებლო რჩევებს.
მადონა ბიგანიშვილი-შუბითიძე (მასაჟისტ-რეაბილიტოლოგი) – 2004 წელს დავასრულე თბილისის სახელმწიფო სამედიცინო უნივერსიტეტის სამედიცინო რეაბილიტაციისა და სპორტული მედიცინის დეპარტამენტის მასაჟის კურსი, სადაც კათედრის გამგე იყო რომანოზ სვანიშვილი, ხოლო პედაგოგები – სვეტლანა ახობაძე და ასოცირებული პროფესორი ზეინაბ სოფრომაძე. დასრულებისთანავე დავკავდი კერძო პრაქტიკით, როგორც სამკურნალო, ასევე ესთეტიკური რეაბილიტაციის მიმართულებით.
რატომ აირჩიეთ ეს პროფესია?
ბავშვობიდან მიყვარდა ადამიანების დახმარება, რამაც პროფესიის არჩევაში დიდი როლი ითამაშა. მასაჟით რეაბილიტაციის საშუალებით შემიძლია რეალურად შევამსუბუქო სხვისი ფიზიკური და ემოციური ტკივილი, რაც უდიდეს ბედნიერებას მანიჭებს. სწორედ ეს განცდა, ვუყურებდე, როგორ უმჯობესდება ადამიანების მდგომარეობა, ყოველდღიურად უფრო დიდ მოტივაციას მაძლევს და უფრო მეტად მაყვარებს ჩემს პროფესიას.
ორივე მიმართულების მასაჟს – სამკურნალო-გამაჯანსაღებელ და სარელაქსაციოს აკეთებთ? მოკლედ რომ გვითხრათ, ორივე მიმართულების ძირითადი დანიშნულება რა არის?
დიახ, ორივე მიმართულებით. ზოგადად, მასაჟის მიზანია ორგანიზმის გაჯანსაღება და სხეულის ორგანოებისა და სისტემების ფუნქციის აღდგენა.
სამკურნალო მასაჟის ძირითადი დანიშნულება არის ტკივილის შემცირება, კუნთოვანი სპაზმების მოხსნა, ტრიგერების გახსნა, მოძრაობის გაუმჯობესება და რეაბილიტაციის პროცესის დაჩქარება. ამას გარდა, ძილის ხარისხის გაუმჯობესება, სხეულის მოქნილობისა და მოძრაობის დიაპაზონის გაზრდა და იმუნური სისტემის ფუნქციონირების გაუმჯობესება.
ესთეტიკური მასაჟი კი მიმართულია ვიზუალის ფორმირებაზე, მაგალითად, კანის ტონუსის ამაღლება, ცელულიტთან ბრძოლა და სხეულის ფორმების კორექცია.
გარდა ამისა, მასაჟის თერაპია აუმჯობესებს მენტალურ ჯანმრთელობას: სტრესისა და შფოთვის შემცირება, ემოციური კეთილდღეობის გაუმჯობესება და საერთო განწყობის ამაღლება.
გაგვიზიარეთ რჩევები ვარჯიშის დროს…
ვარჯიშისას ყველაზე მნიშვნელოვანია სხეულის სწორად მოსმენა და დატვირთვის თანდათანობითი ზრდა. ყოველთვის დაიწყეთ ვარჯიში გახურებით, რათა კუნთები მზად იყოს მუშაობისთვის, ასეთ დროს ტრავმის მიღების ნაკლები შანსია. ეცადეთ სწორად ისუნთქოთ და პირველ რიგში ყურადღება მიაქციოთ ვარჯიშის ტექნიკას, რადგან მთავარი არის ხარისხი, რომელიც რაოდენობაზე წინ დგას.
შესაძლებელია მასაჟით ტრავმის პრევენცია?
რა თქმა უნდა, სწორად შერჩეული მკურნალობით აბსოლუტურად შესაძლებელია პათოლოგიის განკურნება.
თქვენი მიზნები და სამომავლო გეგმები გაგვიზიარეთ
ჩემი მიზანი ყოველთვის იყო და არის თითოეული პაციენტის სხეულისა და ცხოვრების ხარისხის გაუმჯობესება-გაჯანსაღება.
ტექსტი: სოფიო მალანია
ფოტო: ალექსეი სეროვი
