OK! Fashion Book ერთ-ერთი ყველაზე პოპულარული ოჯახის – ჰადიდების შესახებ გიამბობთ, რადგან ძალიან საინტერესოა მათი ცხოვრება პოდიუმს მიღმა. რთულია შეუმჩნეველი დაგრჩეს, თუ როგორი თბილი ურთიერთობები აქვთ ოჯახის წევრებს, როგორ ზრუნავენ და გვერდში უდგანან ერთმანეთს. ბავშვობიდან ძალიან მეგობრულ გარემოში იზრდებოდნენ. აქტიურად იყვნენ და დღემდე არიან ჩართული ფერმერულ ცხოვრებაში. მათ ჰყავთ სხვადასხვა სახეობის ცხოველები და საკმაოდ დიდ დროს უთმობენ მათ მოვლას. შესაბამისად, საზოგადოებისთვის ძალიან საინტერესოა მათი ცხოვრების სტილი.
დები, ბელა და ჯიჯი ჰადიდები დღესდღეობით თანამედროვეობის ყველაზე მოთხოვნად და სასურველ სუპერმოდელებად ითვლებიან.
აშკარაა, რომ მოდელების წარმატებულ მომავალში დიდი როლი დედამ, იოლანდა ფოსტერმა ითამაშა. წარმოშობით ჰოლანდიელმა იოლანდამ მოდელობა 16 წლის ასაკში დაიწყო, ერთი წლის შემდეგ კი უმსხვილეს ამერიკულ სამოდელო სააგენტოებთან გააფორმა კონტრაქტი. 31 წლის ასაკში კარიერა დაასრულა და ცნობილ არქიტექტორზე, მოჰამედ ჰადიდზე გათხოვდა, რომელთანაც 3 შვილი: ბელა, ჯიჯი და ანვარი შეეძინა. უმცროსი ვაჟის დაბადების შემდეგ მან საკუთარი ბიზნესი წამოიწყო და ამერიკაში პოპულარულ რეალითი შოუში „ბევერლი-ჰილზის ნამდვილი დიასახლისები“ დაიწყო გადაღება და ამით შვილებს ჰოლივუდურ ელიტაში გზა გაუხსნა.
დღეს იოლანდა ფოსტერი ქალიშვილების მთავარი დამხმარე და მრჩეველია კარიერულ საკითხებში. ამჟამად კი უმცროს ვაჟზე, ანვარზეა კონცენტრირებული, რომელიც დების კვალს მიჰყვება და მოდის ინდუსტრიას იპყრობს.
რაც შეეხება პირად ცხოვრებას, იოლანდა ბედნიერ ქორწინებაშია ამერიკის ერთ-ერთ ყველაზე ცნობილ მუსიკალურ პროდიუსერ დევიდ ფოსტერთან, რომელზეც 2011 წელს იქორწინა. შვილების მამასთან კი 2000 წელს განქორწინდა.
როგორც უკვე აღვნიშნეთ, იოლანდა ჰადიდი მსოფლიოში ყველაზე პოპულარული მოდელების, ჯიჯი და ბელა ჰადიდების დედაა. წარსულში ასევე სუპერმოდელი, ასაკის მიუხედავად შესაშურ ფორმაშია.
თუ Instagram-ზე მის მიერ გამოქვეყნებულ ფოტოებს დავაკვირდებით, ვარსკვლავის სილამაზისა და ახალგაზრდობის საიდუმლოდ შეიძლება ჯანსაღი ცხოვრების წესი მივიჩნიოთ.
უკვე მრავალი წელია იოლანდა ცდილობს მხოლოდ ორგანული საკვები მიირთვას. ის სამშობლოში, ჰოლანდიაში დიდ დროს ატარებს, სადაც აქვს საკუთარი ბოსტანი, ლიმონისა და ლავანდის ბაღები, ჰყავს შინაური ცხოველები, რომელთა მოვლაში აქტიურადაა ჩართული. საკვებად კი სწორედ საკუთარი ხელით მოყვანილ ხილსა და ბოსტნეულს მიირთმევს.
წარმატებული სუპერმოდელების დედა დიდ დროს ატარებს ბუნებაში და ყოველთვის დიდ მადლიერებას გამოხატავს ცხოვრებისადმი.
ფერმის სახლში, რომელიც პენსილვანიაში მდებარეობს, ასევე დიდ დროს ატარებენ დები, ბელა და ჯიჯი. დების უახლოესი მეზობლები ცხენები, თხები, ძროხები და სხვა შინაური ცხოველები არიან. სუპერმოდელები დროს არ კარგავენ და ინსტაგრამზე გამუდმებით აზიარებენ ოთხფეხა მეგობრების ფოტოებს. ფერმის სახლის სიმშვიდე ნამდვილად საუკეთესო არჩევანია ჯიჯისთვის, რომელსაც მცირეწლოვანი შვილი ჰყავს. ისინი აქტიურად უვლიან მცენარეებსა და ყვავილებს. დებმა ეზოში კრისტალების „ლაბირინთიც“ კი მოაწყვეს, რომელიც იდეალური ადგილი აღმოჩნდა მედიტაციისთვის. ჰადიდების დედა, იოლანდა სწორედ აქ მედიტირებს ყოველდღიურად.
ფერმის სახლში ხის სასადილო მაგიდა ნამდვილად აუცილებელი ნივთია. თანაც ეზოში, პირდაპირ ღია ცის ქვეშ. როგორც ფოტოებიდან ირკვევა, ჰადიდების ოჯახს სადილზე ოთხფეხა მეგობრები, ცხენები უწევენ კომპანიონობას.
ჰადიდების წარმატებული ცხოვრება შესაძლოა ბევრისთვის აღმოჩნდეს შთაგონების წყარო და მაგალითი იმისა, თუ როგორ მიიღოთ ცხოვრებისგან სიამოვნება.
