„ლერექუ“ ტანსაცმლის ქართული ბრენდია, რომელიც გაჟღერებისთანავე საინტერესო ასოციაციებს იწვევს საზოგადოებაში. ნამდვილად ასეა − არა მარტო სახელწოდება, არამედ ნამუშევრებიც იმდენად განსხვავებული და ხარისხიანია, რომ დანახვისთანავე თვალშისაცემი ხდება მომხმარებლისთვის. ხომ გაგიგიათ, ნაამბობს ნანახი სჯობსო. ჰოდა, ნამდვილად ასეა. აუცილებლად უნდა გამოსცადოთ საკუთარ თავზე და გახდეთ „ლერექუს“ ძალიან გემოვნებიანი და ფერადი სამოსის მომხმარებლები. მანამდე კი, ბრენდის დამფუძნებელ ნათია სალუქვაძეს გაგაცნობთ.
ვისი იდეაა ქართულ ბრენდ „ლერექუს“ დაარსება?
ქართულ ბრენდ „ლერექუს“ იდეა და განხორციელების ეტაპები რამდენიმე ადამიანს აერთიანებს. ერთ-ერთი მათგანი, რასაკვირველია, მე ვარ. ამ სფეროში დაახლოებით 15 წელია ვსაქმიანობ. პროფესიით დიზაინერი არ ვარ, თუმცა ყოველთვის მიყვარდა ეს საქმე. სწორედ ამ სიყვარულმა განაპირობა ის, რომ საბოლოო ჯამში, მაინც შევისწავლე კვალიფიციურად და დღეს მე ვარ ტანსაცმლის კონსტრუქტორ-ტექნოლოგი. მიყვარს ლამაზად ჩაცმა და დიდ სიამოვნებას მანიჭებს, როდესაც ჩემი გემოვნებით ვმოსავ ადამიანებს.
ვმუშაობდი ქართველ ცნობილ დიზაინერებთან და საბოლოოდ, მივიღე გადაწყვეტილება ჩემი ბრენდი შემექმნა. როგორც ხედავთ, ეს სურვილი განვახორციელე და დღეს უკვე გაფართოების დიდი იმედი მაქვს.
რატომ „ლერექუ“?
მიზეზი, რატომ შევარჩიე ეს სახელწოდება? − იმიტომ, რომ ძალიან თემატურია. „ლერექუ“ სვანური სიტყვაა და „ტანსაცმელს“ ნიშნავს, ლამაზად ჟღერს და უცხოელებისთვის ადვილად წარმოსათქმელია. ცოტა სვანებთანაც მაკავშირებს ჩემი გენები და ასე ჩამოვყალიბდი ამ სახელწოდებაზე. ვფიქრობ, საინტერესო ასოციაციებს იწვევს მომხმარებლებში.
რას სთავაზობთ მომხმარებლებს და როგორი სტილის სამოსია თქვენთან წარმოდგენილი?
მომხმარებლის კონკრეტული სეგმენტი არ შემირჩევია, არც ბაზარზე მოთხოვნად პროდუქციაზე ვარ ორიენტირებული. ვქმნი მხოლოდ იმას, რაც თავად მომწონს და რასაც ჩავიცვამდი. ვცდილობ, სამოსი იყოს მაქსიმალურად ფერადი, ჭრელი და კომფორტული. „ლერექუს“ მეშვეობით, ნებისმიერი აღნაგობისა და გემოვნების ადამიანმა შეიძლება შეარჩიოს მისთვის მოსაწონი სამოსი.
ტანსაცმელი მხოლოდ თქვენი დიზაინით იქმნება თუ მომხმარებელს შეუძლია ცვლილებები შეიტანოს?
დიახ, ზოგჯერ დამკვეთის სურვილისამებრ, სასურველ ზომას ან დეტალს მინიმალური ჩარევით ვცვლით, თუმცა ძირითადად, მაინც საკუთარი დიზაინით ვქმნით ნამუშევრებს, რათა შევინარჩუნოთ ჩვენი ნიშა − ის, რაც სხვებისგან გამოგვარჩევს და განსხვავებულს ხდის ჩვენს ბრენდს.
გვესაუბრეთ ხარისხზე.
ვცდილობ, მაქსიმალურად ხარისხიანი ქსოვილისგან შევკეროთ სამოსი, რადგან სწორედ ესაა ის მთავარი კომპონენტი, რომელიც არ უნდა დაირღვეს, რათა მომხმარებლამდე მივიდეს სრულყოფილი ნამუშევარი. სწორედ ეს დამოკიდებულება და მიდგომა ზრდის ნდობას ბრენდის მიმართ, რაც ჩვენთვის უპირველესია.
თამამად შემიძლია ვთქვა, რომ ხარისხი ფასზე ბევრად მაღალია − როგორც ქსოვილის, ასევე შესრულების. ვცდილობ, პროდუქცია ხელმისაწვდომი იყოს საშუალო შემოსავლის მქონე ადამიანებისთვისაც. ნამდვილად რთულია ამ ყველაფრის ერთად თავმოყრა, მაგრამ ჯერჯერობით წარმატებით გამომდის.
უპირატესობებზე და ნიშაზე ვისაუბროთ. რა გამოგარჩევთ სხვებისგან?
მრავალი ფერის ერთად შერწყმა ამ ეტაპზე ჩემთვის პრიორიტეტია. ეს სხვებისთვის შესაძლოა წარმოუდგენელიც კი იყოს. ფერების გამოყენება კი ჩემი შინაგანი განწყობაა. მინდა მაქსიმალურად გავუფერადო ადამიანებს ყოველდღიურობა, მით უფრო, ასეთ რთულ პერიოდში.
მინიმალისტურად დატვირთული მოდელები მაქვს, რომელიც ყველანაირი სხეულის მქონე ადამიანებს უფრო გაალამაზებს და დაუფარავს იმ დეტალებს, რომლის დაფარვაც სურთ.
სად შეგვიძლია პროდუქციის შეძენა?
შოურუმი ჯერჯერობით არ გვაქვს, ამიტომ დავიწყეთ ონლაინმაღაზიის პრინციპით მუშაობა. გავაკეთეთ ფეისბუქგვერდი, რომელიც საკმაოდ აქტიურად მუშაობს და მომხმარებლებს სრულ ინფორმაციას აწვდის მათთვის საინტერესო კითხვებზე.
როგორ შეაფასებდით ბაზარზე არსებულ კონკურენციას?
კონკურენცია ძალიან მაღალია, განსაკუთრებით ამ პერიოდში, როდესაც უამრავი ონლაინმაღაზია გაიხსნა და საზოგადოებას დიდი არჩევანი გადაეშალა სხვადასხვა ბრენდის სახით. თუმცა მაინც მინდა ვთქვა, რომ მომხმარებელი მუდამ კმაყოფილია ჩვენთან შეძენილი სამოსით და მოლოდინს ყოველთვის აჭარბებს ჩვენი პროდუქცია.
სამომავლო გეგმები.
სამომავლო გეგმა არის განვითარება, ბრენდის გაფართოება და მეტი ადამიანის დასაქმება, თუმცაღა ჩემი თვითმიზანი არ არის ფაბრიკული წარმოება. კონკრეტული მოდელების ძალიან ლიმიტირებული რაოდენობა მაქვს წარმოდგენილი. ალბათ ეს არის ჩემი მთავარი ნიშაც − თითოეული მოდელი იკერება ძალიან მცირე რაოდენობით და სერიულ სახეს ნამდვილად არ მივცემ არასდროს.
FB: Lerecoo • ლერექუ
Insta: lerecoo_
Tel: 595 60 21 29
