როდესაც ქართულ სილამაზეზე ვფიქრობთ, შეუძლებელია ერთ-ერთი პირველი, უმშვენიერესი ლია ელიავა არ გაგვახსენდეს. ამ ქალბატონის სახელი და გვარი ქართული კინოს მოყვარულთათვის განსაკუთრებით ძვირფასია. გასული საუკუნის 70-იან წლებში ლია ელიავა წლის ულამაზეს ევროპელ მსახიობ ქალად და წლის სახედ დასახელდა. ქართველი მსახიობის ფოტო პოლონურ ჟურნალ „ეკრანის“ საახალწლო ნომრის გარეკანს ამშვენებდა. ლიას სილამაზეზე დღემდე ლეგენდები დადის და ის ბევრისთვის კლასიკური სილამაზის მთავარი სიმბოლოა.
მსახიობს ურთულესი ბავშვობა ჰქონდა: მამა, რომელიც ბუნდოვნად ახსოვდა, დაუხვრიტეს. 3 წლის იყო, როცა დედაც გადაასახლეს. ასეთ ტკივილს მომავალი მსახიობი ყოველთვის ჩუმად იტანდა და თავისი გულისტკივილით არავის ამძიმებდა. თუმცა მის თვალებში სევდიან მზერას აუცილებლად შეამჩნევდით.
ლია ელიავას შვილიშვილმა, ანკა მანჯგალაძემ, პატივი დაგვდო და მოგვაწოდა უმშვენიერესი ბებიის ნივთები, რომლებსაც წლებია სათუთად ინახავს და რომლებიც ნათლად ასახავს, თუ როგორი დახვეწილი ქალბატონი იყო ლია ელიავა. მისი ყურებით არასდროს დაიღლებოდით.
ლიას მსახიობობა ბავშვობიდან ჰქონდა გადაწყვეტილი, ამიტომ, სკოლის დამთავრების შემდეგ, მოსკოვში ჩავიდა და გამოცდები ლუნაჩარსკის სახელობის თეატრალურ ინსტიტუტში სამსახიობო ფაკულტეტზე ჩააბარა. ყველა ფიქრობდა, რომ ელიავას მხოლოდ სილამაზის გამო ათამაშებდნენ ამა თუ იმ როლს, თუმცა, ნელ-ნელა, მსახიობმა ყველას აჩვენა საკუთარი გასაოცარი დრამატურგიული ნიჭი. იგი ანათებდა ყველა იმ სივრცეს, რომელშიც ხვდებოდა. მისი მშვენიერებით მონუსხულმა მაყურებელმა მსახიობი ძალიან შეიყვარა, ავტოგრაფებს სთხოვდა და კინოთეატრში ნანახ გმირებთან აიგივებდა.
ლია ელიავამ მოსკოვში ყოფნისას „ბაში-აჩუკის“ დამდგმელი რეჟისორებისგან შეთავაზება მიიღო, რის გამოც თბილისში დაბრუნდა და დარჩა კიდეც… სწორედ ამ ფილმის გადაღებისას გაიცნო ცხოვრების მთავარი სიყვარული − ოთარ კობერიძე. ფილმის გადაღებისას, მართალია, ლია უკვე გაშორებული იყო ქმართან, მაგრამ ოთარს ოჯახი ჰყავდა. თუმცა, „აკრძალული სიყვარული“ ძალებს იკრებდა და დიდი მითქმა-მოთქმის, ემოციური თუ ფიზიკური ბარიერების გადალახვის შემდეგ, მსახიობმა წყვილმა მაინც ერთად ყოფნა გადაწყვიტა. ლია ელიავა საკმაოდ ბევრ წერილს იღებდა მის ქმარზე შეყვარებული ქალებისგან. ოთარ კობერიძემაც თავის მხრივ იცოდა, რომ მის მეუღლეს ყველა მამაკაცი აღმერთებდა. თუმცა, მათ უბრალოდ უყვარდათ ერთმანეთი და ძალიან სათუთად უვლიდნენ ერთიმეორეს. ოთარ კობერიძემ 82 ფილმში ითამაშა, ლია ელიავამ − 34-ში. ლია არც თეატრში ყოფილა როლებით განებივრებული, თუმცა ოთარი ამ თვალსაზრისითაც აქტიური იყო და წლების განმავლობაში მუშაობდა სოხუმისა და მარჯანიშვილის თეატრებში. ლიასა და ოთარს ერთი საერთო შვილი − ნანა ჰყავდათ, რომელიც მათი ცხოვრების მთავარი აზრი იყო.
სწორედ ნანას ქალიშვილმა, ანკა მანჯგალაძემ, მოგვცა საშუალება ლიასსტილი გაგვეცოცხლებინა. ანკამ პატივი დაგვდო და მოგვაწოდაუმშვენიერესი ბებიის ნივთები, რომლებსაც წლებია სათუთად ინახავს დარომლებიც ნათლად ასახავს თუ როგორი დახვეწილი ქალბატონი იყო ლია. მისი ყურებით არასდროს დაიღლებოდით.
ლია უაღრესად ქალური და განსაკუთრებული ხიბლის მატარებელი გახლდათ. ისეთი გარეგნობა ჰქონდა, რომელიც ყველა დროს შეეფერება. მიუხედავად იმისა, რომ ერთი შეხედვით ნაზი ჩანდა, პრინციპული და ძლიერი ხასიათი ჰქონია. მიმნდობი იყო, თუმცა არაერთმა ადამიანმა გაუმტყუნა იმედი. მსახიობი ტანსაცმელს ყოველთვის საზღვარგარეთ ყიდულობდა. თუ იქ რაიმე მოეწონებოდა და შესაძენად შესაბამისი თანხა არ ჰქონდა, შემდეგ მსგავს კაბებსა და კოსტიუმებს თბილისში იკერავდა. უყვარდა ატმის ყვავილისფერი, ლურჯი და პასტელის ფერები. შავი ძალიან უხდებოდა და როცა ამ ფერის კაბა ეცვა, ყველაზე მეტ ქათინაურს მაშინ იღებდა. წონის პრობლემა არასოდეს ჰქონია, ხანში რომ შევიდა, ცოტა მოიმატა. ამის გამო წუხდა და საკვების მიღებისას თავის გაკონტროლებას ცდილობდა. ცოტას ეწეოდა − დღეში ერთ-ორ ღერს. სუნამოებს კი განწყობის მიხედვით იცვლიდა. არ უყვარდა ყვავილების ტკბილი და მძიმე არომატები, რაიმე მსუბუქი და გრილი ერჩივნა. ყოველთვის კარგი ხარისხის კოსმეტიკა ჰქონდა − ძირითადად, საზღვარგარეთიდან ჩამოჰქონდა. შინიდან მაკიაჟის გარეშე არასოდეს გადიოდა, თუმცა ხშირად ამბობდა, ვერა და ვერ ვისწავლე მაკიაჟის გაკეთებაო. თვალის შავი ფანქარი, ტუში და ტუჩსაცხი − ეს ნივთები მუდამ ეწყო მის ოთახში, სარკესთან.
ყველასთვის ცნობილი ფაქტია, რომ ლია ელიავა მუდამ მხარს უჭერდა საქართველოს პირველ პრეზიდენტს − ზვიად გამსახურდიას. ამის გამო, ძალიან ბევრმა ახლობელმა ადამიანმა ატკინა გული, ბევრი განუდგა. სამოქალაქო ომი, დაპირისპირება, ახლობლებისგან მიყენებული ტკივილი და… მსახიობს ჯანმრთელობა შეერყა. ლია ელიავამ ინფარქტი მიიღო და 1998 წელს 65 წლის ასაკში გარდაიცვალა. ოთარ კობერიძემ მეუღლის გარეშე 17 წელი იცხოვრა. ლიაზე ლაპარაკი უჭირდა. ანგელოზიო, − იტყოდა და თვალზე ცრემლი მოადგებოდა…
განსაკუთრებული მადლობა აბაშიძის 29-ში მდებარე „იმპერიალ ბუტიკს“ გაწეული დახმარებისთვის
