21-ე საუკუნე სიახლეების ეპოქაა, სადაც ადამიანები ყოველდღიურად მუშაობენ, რათა საკუთარი თავი გახადონ იმაზე უკეთესი, ვიდრე აქამდე იყვნენ, ესთეტიკური მედიცინა კი ამ ეპოქის შემადგენელი კომპონენტია. საზოგადოების ნაწილი, რომელიც ორიენტირებულია უმაღლეს ხარისხზე და მაღალკვალიფიციურ მომსახურებაზე, კარგად იცნობენ OK!-ის რესპონდენტ თამუნა ბურჯანაძეს.
თქვენ მუშაობთ თბილისში, ირაკლი კოხრეიძის საკონსულტაციო ცენტრში, ესთეტიკური მედიცინისა და კონტურული პლასტიკის მიმართულებით. რატომ ირაკლი კოხრეიძის საკონსულტაციო ცენტრი?
ირაკლის წლებია ვიცნობ და მისი პროფესიული რეპუტაცია გახდა ჩვენი თანამშრომლობის საწინდარი. კლინიკა, რომელსაც ის ხელმძღვანელობს, ერთ-ერთი საუკეთესოა და ცხადია, ამ სტატუსს მისი პროფესიონალიზმი ქმნის.
კლინიკა „გინ-მედის“ დამფუძნებელი დირექტორი ბრძანდებით. როდის დაარსდა კლინიკა და რა გზა გამოიარეთ?
„გინ-მედი“ დაარსდა 2018 წელს. გარდა იმისა, რომ კლინიკის შესაქმნელად კარგი ექიმობა არ კმარა, ამისთვის საჭიროა უდიდესი რესურსი − როგორც ადამიანური, ისე ფინანსური. გარდა ამისა, პროფესიონალთა გუნდის ჩამოყალიბება, და თუ ძალიან არ გიყვარს საქმე, რომელსაც ემსახურები, ცალსახაა, რომ არაფერი გამოვა. უზომოდ ბევრი დაბრკოლება და სირთულე გამოვიარე ამ წლების განმავლობაში, და ახლა ვფიქრობ, რომ ყველა უძილო ღამე ამად ღირდა.
როგორ უთავსებთ ერთმანეთს ორ სხვადასხვა ქალაქში მუშაობას და როგორია თქვენი თავისუფალი დრო?
ქუთაისი ჩემი მშობლიური ქალაქია, სადაც დავიბადე, გავიზარდე, და როდესაც იქ ჩავდივარ, ჩემი პასუხისმგებლობა პაციენტების წინაშე ათმაგად იზრდება. თვეში ორჯერ ჩავდივარ წინასწარ დაჯავშნილ პაციენტებთან და ფაქტობრივად, ყოველი თვის 10 დღე მიწევს ქუთაისში ყოფნა. რასაკვირველია რთულია ორ ქალაქში მუშაობა, თუმცა ამავდროულად, სასიამოვნოც. რაც შეეხება თავისუფალ დროს, რომელიც ექიმებისთვის ნაკლებად ნაცნობი ცნებაა, ვცდილობ ეს დრო ჩემს შვილთან ერთად გავატარო.
რა სახის პროცედურებს სთავაზობთ პაციენტებს და რომელია ყველაზე მოთხოვნადი პროცედურა?
ყველაზე მოთხოვნადი პროცედურა ტუჩის აუგმენტაციაა, თუმცა სხვა პროცედურებიც არანაკლებ მოთხოვნადია. მაგალითად, ყვრიმალების კორექცია, ბიორევიტალიზაცია, მეზოთერაპია. დაახლოებით სამოცდაათი დასახელების პროცედურას ვთავაზობთ პაციენტებს.
რას მიიჩნევთ თქვენს ყველაზე ძლიერ მხარედ?
ჩემს ძლიერ მხარედ მივიჩნევ იმას, რომ არ ვხდები არავისზე და არაფერზე დამოკიდებული. ეს კი, ჩემს პროფესიაში და ზოგადად, ცხოვრებაში ძალიან მეხმარება.
რა არის საჭირო იმისთვის, რომ როგორც ექიმმა, მოიპოვოთ საზოგადოების ნდობა?
ექიმი უპირველესად უნდა იყოს თავის თავთან და შემდეგ პაციენტებთან კეთილსინდისიერი. არ არსებობს პაციენტი, რომელიც მისდამი ექიმის დამოკიდებულებას ვერ გრძნობს. მე თამამად შემიძლია ვთქვა, რომ ყველა პაციენტთან ჩემი შესაძლებლობების მაქსიმუმს ვიყენებ, რათა მათი პრობლემები აღმოვფხვრა და დავეხმარო. ასევე, შემიძლია ვთქვა, რომ ჩემი კარიერის განმავლობაში არცერთი მათგანისგან უნდობლობა არ მიგრძნია, პირიქით − ყოველთვის აფასებენ იმ შრომას, რომელიც მათ დასახმარებლად მაქვს გაღებული.
თქვენ ესთეტიკური მედიცინისა და კონტურული პლასტიკის ექიმი ბრძანდებით. როგორ გამოიყურება თქვენი თავის მოვლის რუტინა?
ჩემი გენეტიკის დახმარებით, ჯერჯერობით რაიმე სირთულის ჩარევები არ მესაჭიროება. ძირითადად მივმართავ სახის მოვლის, ღამის რუტინას, სადაც აქტიურად ვიყენებ DIBI Milanos-ის პროდუქციას, რომელიც ზრუნავს არა მხოლოდ ჩემი სახის დატენიანებაზე, არამედ სხეულის გაჯანსაღებაშიც მიწყობს ხელს. ხშირად მივდივარ „დიბი მილანოში“ და მივმართავ როგორც სპა, ასევე სარელაქსაციო პროცედურებს.
