#OK! გზა პოლიციიდან ქორწინების ორგანიზატორობამდე

ინტერვიუ ივენთ კომპანია „ლაკა“-ს დამფუძნებელთან, ლაკა წერეთელთან

„ლაკა“ ის ქართული ბრენდია, რომელიც არაერთ მომსახურების სერვისს აერთიანებს. შეიქმნა მათთვის, ვინც ყველაზე მეტად აფასებს ბედნიერ მომენტებს და სურს გახადოს იგი განსაკუთრებული. მის არც თუ ისე ახალ და საზოგადოებისთვის უკვე კარგად ნაცნობ მიმართულებას Laka wedding წარმოადგენს, დეტალური ინფორმაციისთვის OK! გაესაუბრა კომპანიის დამფუძნებელსა და დირექტორს, ლაკა წერეთელს.

ლაკა, გვიამბეთ თქვენი ივენთ კომპანიის შექმნის ისტორია.

17 წლის ასაკში, როდესაც პროფესია ავირჩიე, დარწმუნებული ვიყავი, რომ მთელი ცხოვრება ვემსახურებოდი გამოძიებას, მაგრამ, დროთა განმავლობაში, ჩემი ინტერესები და სურვილები იცვლებოდა და თამამად გადავწყვიტე ჩამეტარებინა პროფესიული რესტარტი რამაც ჩემი ცხოვრება უფრო საინტერესო გახადა. გამოძიება, ცეკვა და ესთეტიკურობა – ყველა სფერომ ჩემში დატოვა საინტერესო კვალი, ცოდნა და კრეატივი. დღესასწაულების მოწყობა იყო ჩემი ჰობი. ყველაზე მთავარი და გადამწყვეტი გახდა წვეულება, რომელიც მეგობრების თხოვნით ჩავატარე შვედეთში ქ. სტოქჰოლმში. საქართველოში დაბრუნებისას მივხვდი, რომ დადგა დრო ახალი პროფესიული რესტარტისთვის და ჩემი ჰობი ვაქციე საქმიანობად. მეორე დღეს დავაარსე ივენთ კომპანია „ლაკა“, რომელიც საერთაშორისო მასშტაბით ქმნის სხვადასხვა ტიპის დღესასწაულებს. საუკეთესო გადაწყვეტილება და დიდი ფუფუნებაა აკეთო საქმე, რომელიც ძალიან მოგწონს და გიყვარს. ეს იყო ჩემი ოცნება, შემექმნა ქართული საერთაშორისო ბრენდი, რომელსაც მოაქვს ბედნიერება. 6 წლის განმავლობაში ჩვენ ჩავატარეთ სხვადასხვა ტიპის ღონისძიება (საქორწილო ფესტივალები, ბანკეტები, კორპორატიული ღონისძიებები, ქორწილები და ა.შ.) და გავაბედნიერეთ არაერთი ადამიანი. წლების განმავლობაში კომპანია გაიზარდა, დღესასწაულების ორგანიზების გარდა, დაიბადა ახალი მიმართულებები: საქორწილო სერვისი „Laka Wedding“ , ქალთა კლუბი „Woman’s club Laka“ , რომელიც ზრუნავს ქალბატონების განტვირთვაზე, განვითარებაზე და სილამაზეზე, საავტორო ონლაინ სკოლა Laka Event School – „გაბედე რესტარტი“ და „Laka Dance Terapy“ – ცეკვის თერაპია კოლექტივებისთვის.

Laka Wedding – საქორწილო სერვისი, რომელიც ემსახურება წყვილებს საერთაშორისო მასშტაბით. ჩვენი ბედნიერი წყვილები, როგორც საქართველოს ნებისმიერი კუთხიდან, ასევე შემდეგი ქვეყნებიდან არიან: ისრაელი, რუსეთი, პოლონეთი, ამერიკა, ინგლისი, აფრიკა, შოტლანდია, გერმანია, ყაზახეთი.

რას გულისხმობს Laka Wedding მიმართულება?

Laka wedding მომხმარებლებს სთავაზობს ქორწილების ორგანიზებას. იგი განსაკუთრებულია, რადგან ძალიან დიდი ყურადღება ექცევა თითოეულ დეტალს, იწერება ინდივიდუალური სცენარი, რომელიც მორგებულია მომხმარებლის ბიუჯეტს და შედეგი ყოველთვის აჭარბებს მოლოდინს. ასევე მინდა აღვნიშნო, რომ დღევანდელ რეალობაში, როდესაც ქორწილის გადახდა ძალიან რთულია, ჩვენს მომხმარებლებს ვთავაზობთ, ყველანაირი რეგულაციის დაცვით, როგორც მრავალრიცხოვან, ისე „ორკაციან“ ქორწილს, რაც გულისხმობს მხოლოდ სიძე-პატარძლის ყოფნას ადგილზე. ეს ახალი ტენდენცია არ არის, იგი მიღებულია მსოფლიოს მასშტაბით და ჩემს პრაქტიკაშიც არაერთხელ ყოფილა მსგავსი შემთვევა, ახლა კი ვცდილობ, დავნერგო იგი საქართველოშიც. პროცესი თითქმის იგივეა, რაც შედარებით დიდ ქორწილში: ტანისამოსი, ფოტო-ვიდეო გადაღება და ა.შ. ყოველივე ამით, მსურს თქვენს მკითხველს ვურჩიო, რომ არ თქვან უარი ბედნიერებაზე და ჰქონდეთ თუნდაც ორკაციანი ქორწილი. აგრეთვე, მინდა აღვნიშნო, რომ არასდროს გამიკეთებია ჩემი კომპანიის რეკლამა, რადგან „ლაკა“-ს თავისივე მომხმარებლები ხშირად თავადვე აპიარებენ და ჩვენი მომსახურების სერვისით სარგებლობას ურჩევენ თავიანთ ახლობლებს, შესაბამისად, ჩვენ ვხდებით მათი ოჯახების Event maker. ამდენად, ჩემი დევიზია „კმაყოფილი და ბედნიერი მომხმარებელი საუკეთესო რეკლამაა“.

გვესაუბრეთ თქვენს სამომავლო გეგმებზე…

ვგეგმავ საქორწინო ფესტივალის ჩატარებას და Women’s club Laka-ს დაარსებას ბათუმში. აგრეთვე, უკვე დაწყებული მაქვს მუშაობა წიგნზე, „პატარძალი“, რომელიც გახდება საქორწინო სახელმძღვანელო იმ რეალურ ისტორიებზე დაყრდნობით, რომლებიც წერენ არაერთი ადამიანის მომავალს.

რას უსურვებთ ჩვენს მკითხველს?

არასდროს არ თქვათ უარი დღესასწაულზე, ბევრი ზეიმი შემოიტანეთ თქვენს ცხოვრებაში, რადგან მას მოჰყვება დიდი პოზიტივი და დადებითი ენერგეტიკა, რაც თქვენს ცხოვრებას საუკეთესოს გახდის.