XX საუკუნის დასაწყისში, პარიზის პოდიუმებზე ხშირად მოჰკრავდით ყურს ქართულ საუბარს. ყველაზე ხშირად ეს კოკო შანელის მოდის სახლში ხდებოდა, სადაც სამშობლოდან იძულებით გადახვეწილი რამდენიმე ქართველი მოდელი მუშაობდა. მათ შორის, ერთ-ერთი რიმა ერისთავი იყო.
ფოტო: რიმა ერისთავი
შანელის მოდელი ნიკოლოზ ერისთავისა და თამარ ასული ერისთავის ოჯახში, 1902 წელს დაიბადა. მისი მშობლები ქსნის ერისთავთა საგვარეულოს წარმომადგენლები იყვნენ.
რიმას მამა 1907 წელს გარდაიცვალა და მისი აღზრდა დედამ და დედის დედამ, ალექსანდრა დავითის ასულმა წერეთელმა ითავეს. 1918 წელს თამარ ერისთავი საფრანგეთში გაემგზავრა, 14 წლის რიმა კი ბებიასთან, თბილისში დატოვა. 1921 წელს, საქართველოს სამხედრო ოკუპაციის შემდეგ, დიგვაროვანთა ნაწილმა ქვეყანა დატოვა. მათ შორის იყო გალაკტიონ ტაბიძის მუზა – მერი შერვაშიძე ქმართან – გიგუშა ერისთავთან ერთად. წყვილი პარიზში გაემგზავრა და თან რიმა ერისთავი წაიყვანა, რომელსაც საფრანგეთის დედაქალაქში დედა ელოდა. თამარ ერისთავმა ყველაფერი გააკეთა იმისთვის, რომ მისი ქალიშვილი პარიზის ბრწყინვალე საზოგადების წევრი გამხდარიყო. მალე რიმა მერი შერვაშიძის მსგავსად, კოკო შანელის მოდელი გახდა, თუმცა ლამაზი გარეგნობის, დახვეწილი გემოვნებისა და არისტოკრატული წარმომავლობის წყალობით, Prencesse Rimma Eristoff-თან პარიზის თითქმის ყველა წამყვანი სამოდელო სახლი თანამშრომლობდა.
ფოტო: რიმა ერისთავი, ოლია სვანიშვილი, გიორგი ერისთავი და მერი შერვაშიძე სტამბულში
მოდელობაში რიმა ერისთავი საკმაოდ მოკრძალებულ ჰონორარს – თვეში დაახლოებით 800 ფრანკს იღებდა. გარდა ამისა, კაბის გაყიდვის შემდეგ, რომელსაც ის მოდის სახლ „იტებ“-ში წარადგენდა, სამოსის ღირებულების 2 პროცენტს პრემიის სახით იღებდა, თუმცა, ქართველი მოდელის კეთილდღეობა ჰონორარებზე დამოკიდებული არ იყო.
ფოტო: ივა პასკევიჩი და რიმა ერისთავი
„ბებიაჩემმა, მარიამმა, თავის დას, თამარს, ბრილიანტებისა და ზურმუხტების ძვირფასი ყელსაბამი გადასცა, რომელიც თავის დროზე ჩვენს წინაპრებს – იმერეთის მეფეებს ეკუთვნოდათ. თამარმა პარიზში ამ ძვირფასეულობის სარფიანად დაბანდება შეძლო და შედარებით შეძლებულად ცხოვრობდა“ – ყვებოდა რიმა ერისთავის დისშვილი, მარინა ელიოზიშვილი.
რიმა ერისთავი, რომელსაც დედა არაფერს აკლებდა, ზაფხულობით ნიცაში, ზამთრობით კი – შვეიცარიაში ისვენებდა. ოჯახს ნავთობკომპანიის მფლობელის მეუღლე, ლედი დეტერდინგი მფარველობდა. მას თამარი და რიმა ერისთავები ალპებში დასასვენებლად მიჰყავდა, პარიზის ბინის კეთილმოწყობაში ეხმარებოდა და შანელისა და სხვა ფრანგი კუტიურიეების სამოსს ჩუქნიდა.
ფოტო: რიმა ერისთავი მეგობრებთან ერთად
რიმა ერისთავი არასოდეს გათხოვილა. ის დედასთან ერთად ცხოვრობდა და ორივე პარიზში გარდაიცვალა – თამარ ერისთავი – 1975 წელს, ხოლო რიმა – 1982 წელს, 80 წლის ასაკში. ის დაკრძალულია პარიზში, ლევილის ქართველთა სასაფლაოზე.
ასევე დაგაინტერესებთ
#OK! მატილდა გვარლიანი მსოფლიოში ყველაზე მაღალანაზღაურებადი მოდელების სიაშია
