ოქტომბერი დატვირთული თვეა. მსოფლიოს მასშტაბით ორი უმნიშვნელოვანესი დღე აღინიშნება: 60+ და ვარდისფერი ოქტომბერი.
60+ -ის შესახებ სულ ორი წელია, რაც შევიტყვე და იდეა ძალიან მომწონს – ადამიანს ასაკი შეზღუდვებს არ უწესებს, შეზღუდვებს თავად ვუწესებთ საკუთარ თავს. არავინ იცის, ვის რამდენი წელი აქვს დედამიწაზე ყოფნისთვის. მაგრამ სწორედ ამ კონტესტში ყველაზე უპრიანია ფრაზა – მნიშვნელოვანია არა რაოდენობა, არამედ ხარისხი. არასდროსაა გვიანი, იპოვო ახალი ინტერესი, ახალი საქმე, შეიძინო ახალი ცოდნა და პროფესია. ახალი ცხოვრების დაწყება ყოველთვის შეიძლება. მთავარია, ამისი ძალა იპოვო, შენი ცხოვრება შენს ხელშია.
„შენი ცხოვრება შენს ხელშია“ არის ვარდისფერი ოქტომბრის კამპანიის სლოგანი. ქალები, ვინც დაამარცხეს ძუძუს კიბო, გვახსენებენ, რომ დიაგნოზი არასდროსაა განაჩენი და დროული დიაგნოსტიკა ბრძოლაში გამარჯვების საწინდარია.
ისინი, ვინც ონკოლოგიური დაავადების წინაშე აღმოჩნდნენ, განსაკუთრებულად აფასებენ ყველა გათენებულ დღეს და გამორჩეულად ისწავლეს დეტალებით სიხარული. ისინი მაგალითები არიან ყველასთვის, რომ არასდროს უნდა დანებდე.
გისურვებთ ბრძოლის სურვილსა და სიხარულის შესაძლებლობას.
სიყვარულით,
მაიკო წერეთელი
ჟურნალ OK!-ის მთავარი რედაქტორი
