ჯანმრთელობაზე ზრუნვას შეიძლება ბევრი სფერო მოიცვას, მაგრამ არსებობენ ადამიანები, რომლებიც ამ გზას არა მხოლოდ პროფესიის, არამედ ადამიანური ემპათიის, გულწრფელობითა და პასუხისმგებლობით გადიან. OK! ბათუმის სტუმარი თეონა ბერიძე სწორედ ასეთია – ქალი, რომელმაც საკუთარი საქმისადმი სიყვარული და პროფესიული გამოცდილება ერთიან, ადამიანების გულთან მდგომ სივრცედ აქცია. „ფარმათეა“ მისთვის უბრალოდ აფთიაქი არ არის, ეს არის ადგილი, სადაც ხარისხი სითბოს უერთდება, პროფესიონალიზმი კი ნდობას ქმნის. თეონა საზღვრებს არ ავლებს მომხმარებელსა და ადამიანს შორის, პირიქით, სწორედ ამ ორი სიტყვის ერთობით აშენებს თავის საქმეს. მისი გზა დაიწყო სურვილით, რომ საზოგადოებისთვის რეალური სარგებელი ზრუნვით, ინფორმირებულობით, მხარდაჭერით შეექმნა. დღეს კი თეონა ბერიძე იმ ქალების მაგალითია, ვინც მიზანს შრომით, სიმტკიცითა და ადამიანებისადმი პატივისცემით აღწევს. და მაინც, მისი ამბავი იქ არ მთავრდება, სადაც პროფესიული აღწერა.
თეონა ბერიძე ის ქალია, ვინც საკუთარ ბედნიერებას ორ ყველაზე მნიშვნელოვან როლში პოულობს – დედობაში და შექმნილ საქმეში. ეს ორი სამყარო კი ერთად ქმნის ძლიერ და დაუღალავად განვითარებაზე ორიენტირებულ მეწარმეს. და შესაძლოა სწორედ ამიტომ, „ფარმათეა“ უკვე აღარ არის მხოლოდ ბრენდი, ეს არის სივრცე, სადაც თბილი დამოკიდებულება სტანდარტად იქცა, ხოლო ნდობა – ყველაზე ძვირფას განძად.
გაეცანით OK! ბათუმის მკითხველს…
მე, თეონა ბერიძე ვარ – ორი შვილის დედა და „ფარმათეას“ დამფუძნებელი. ვმუშაობ იმაზე, რომ ჩემს საქმეში ხარისხი, პროფესიონალიზმი და ადამიანური დამოკიდებულება სუფევდეს. ჩემი მიზანია, შევქმნა სივრცე, სადაც თითოეული ადამიანი ზრუნვასა და ნდობას გრძნობს. ჩემი შვილები მაძლევენ ძალას, ჩემი საქმე კი – მიზანს. და სწორედ ამ ორი სამყაროს ერთად ყოფნა განსაზღვრავს იმას, ვინ ვარ დღეს.
მოგვიყევით თქვენს საქმიანობაზე. რა იყო ის ბიძგი, რომელმაც აღნიშნული გზა დაგაწყებინათ?
ჩემი საქმიანობა „ფარმათეას“ შექმნით დაიწყო – ეს იყო სურვილი, გამეერთიანებინა პროფესიონალიზმი და ადამიანური სითბო. ყოველთვის მინდოდა, რომ აფთიაქი ყოფილიყო არა მხოლოდ ადგილი, სადაც ადამიანები წამალს ყიდულობენ, არამედ სივრცე, სადაც მათი ესმით, ზრუნავენ და ეხმარებიან. ბიძგი კი იყო სურვილი, რომ ჩემი ცოდნა და გამოცდილება საზოგადოებას რეალურად გამოსდგომოდა. მინდოდა, შემექმნა ადგილი, სადაც ადამიანები თავს მშვიდად და დაცულად იგრძნობდნენ.
რა ხდის თქვენს საქმიანობას განსაკუთრებულს. რა არის თქვენი მოტივაციისა და შთაგონების წყარო?
ჩემს საქმიანობას განსაკუთრებულს ხდის მაღალი სტანდარტებისადმი ერთგულება – ხარისხიანი პროდუქტი, პასუხისმგებლიანი მომსახურება და ზუსტი ინფორმაცია მომხმარებლებისთვის. მიზანი ყოველთვის ერთი მაქვს: აფთიაქი იყოს სანდო სივრცე, სადაც თითოეული ადამიანი კომფორტულად და დაცულად იგრძნობს თავს.
ჩემი მოტივაცია ჩემი შვილებია – ისინი მაძლევენ ძალას, ვირწმუნო, რომ შრომა და გულწრფელობა ყოველთვის შედეგს მოიტანს. შთაგონებას კი ადამიანები მაძლევენ: მათი ნდობა, მადლიერება და თბილი სიტყვები ის ენერგიაა, რომელიც საქმეში ყოველდღე ახალი ძალით მაბრუნებს.
იმისთვის, რომ ნდობა და წარმატება მოიპოვო – საჭიროა?
საჭიროა ირწმუნო საკუთარი საქმის. საჭიროა იყო გულწრფელი, თანმიმდევრული და სტაბილური. ნდობა იქ ჩნდება, სადაც ადამიანი იგრძნობს შენს ნამდვილ დამოკიდებულებას – რომ მასში მხოლოდ მომხმარებელს კი არა, ადამიანს ხედავ.
წარმატება კი მაშინ მოდის, როცა იმას აკეთებ, რისიც გჯერა, აკეთებ მონდომებით, შრომით და ადამიანების პატივისცემით.
რა გზავნილი გაქვთ ქალბატონებისათვის, რომლებიც ახლა იწყებენ საკუთარი გზის ძიებას?
არ შეუშინდეთ რისკს, წარუმატებლობას, შეცდომებს. ყოველი წინ გადადგმული ნაბიჯი, თუნდაც ძალიან პატარა, გაახლოებთ იმ მიზანთან, რომელიც გაქვთ დასახული. წარმატებები უკან დახევით არ მოდის…
რა არის თქვენი მიზანი, სამომავლო გეგმა? როგორ ხედავთ საკუთარ თავს რამდენიმე წელიწადში?
ჩემი მთავარი მიზანი მუდმივი პროფესიული და ბიზნეს განვითარებაა. ყოველდღე ვცდილობ, რომ ჩვენი აფთიაქი გახდეს უფრო ეფექტური, უფრო თანამედროვე, და მეტ მომხმარებელზე ორიენტირებული. სამომავლოდ ვფიქრობ, არა მხოლოდ გაფართოებაზე, არამედ იმაზე, რომ ჯანმრთელობის სფეროში ახალი სტანდარტი შევქმნა. რამდენიმე წლის შემდეგ საკუთარ თავს ვხედავ როგორც მეწარმეს, რომელმაც შეძლო საკუთარი ბრენდის გაძლიერება, ხარისხის გაუმჯობესება და იმ გუნდის ჩამოყალიბება, რომელიც ერთიან მიზანზე მუშაობს – ადამიანების ჯანმრთელობაზე ზრუნვა უმაღლესი სტანდარტებით.
