ღიმილი ადამიანის გარეგნობის ერთ-ერთი ყველაზე დასამახსოვრებელი დეტალია – ზოგჯერ კი სწორედ ის ხდება ყველა ჩვენგანის სავიზიტო ბარათი.
დღეს ღიმილის საერთაშორისო დღეა, ამიტომ კინოს ისტორიიდან იმ მსახიობებს ვიხსენებთ, რომელთა ღიმილმაც ეკრანზე არაერთი პერსონაჟი კიდევ უფრო დასამახსოვრებელი გახადა.
ჯულია რობერტსი
თუ ჰოლივუდის ყველაზე ცნობილ ღიმილზე ვსაუბრობთ, ჯულია რობერტსის გამოტოვება შეუძლებელია. მსახიობის ფართო, ბუნებრივი და კაშკაშა ღიმილი მისი კარიერის დასაწყისიდანვე ყურადღების ცენტრში მოექცა და საბოლოოდ მისი იმიჯის განუყოფელ ნაწილად იქცა.
დღეს ჯულია რობერტსის გახსენება მისი ცნობილი ღიმილის გარეშე რთულია.
ენ ჰეთეუეი
ენ ჰეთეუეის ღიმილი მისი გარეგნობის ერთ-ერთი ყველაზე გამორჩეული დეტალია. მსახიობის ფართო ღიმილს კამერის წინ განსაკუთრებული ეფექტი აქვს და ამ დეტალს ხშირად ამჩნევენ მასთან ინტერვიუების დროსაც.
Allure-ს ჟურნალისტმა ჰეთეუეისთან შეხვედრის აღწერისას მისი ღიმილი ასე დაახასიათა – „იმაზე ნათელია, ვიდრე წარმომედგინა“.
თავად ენი კი საკუთარ ღიმილში განსაკუთრებულს ვერაფერს ხედავს და ამბობს:
„ბავშვობიდან ასე ვიღიმი, არ ვიცი, ამაში განსაკუთრებულს რას ხედავენ“.
მერილინ მონრო
ქერა თმა, წითელი ტუჩები, თვალის გამოკვეთილი მაკიაჟი და ღიმილისას გამოჩენილი თეთრი კბილები – ეს კომბინაცია საბოლოოდ მე-20 საუკუნის ერთ-ერთ ყველაზე ცნობილ ვიზუალურ სახედ ჩამოყალიბდა.
მსახიობის ღიმილი მისი ეკრანული იმიჯის მნიშვნელოვანი ნაწილი იყო – თამამი, ქალური და იმ პერიოდის ჰოლივუდისთვის დამახასიათებელი გლამურით სავსე.
„ღიმილი საუკეთესო მაკიაჟია, რომლის ტარებაც ქალს შეუძლია“ – ამბობდა მონრო.
ოდრი ჰეპბერნი
შეუძლებელია ოდრის ღიმილს მხოლოდ „ლამაზი“ უწოდო – ის მსახიობის განსაკუთრებულ სითბოსა და ელეგანტურობასაც გამოხატავდა.
ჰეპბერნის ღიმილი სრულიად განსხვავებული ტიპის სილამაზეს წარმოადგენს – თუ მონროს ღიმილი თამამი და გამომწვევი იყო, ოდრის შემთხვევაში მასში უფრო მეტი სინაზე, სიმსუბუქე და ბავშვური უშუალობა იგრძნობოდა.
მსახიობის უნიკალურობას მისი ხმა, მოძრაობა, თვალები, ღიმილი და სტილი ქმნიდა.
ანჯელინა ჯოლი
ანჯელინა ჯოლის გარეგნობაზე საუბრისას, როგორც წესი, ყურადღებას მისი გამოკვეთილი ტუჩები, თვალები და სახის მკვეთრი ნაკვთები იქცევს. თუმცა გულწრფელი ღიმილი მსახიობის ვიზუალს მთლიანად ცვლის.
ჯოლის ხშირად სერიოზულიი, იდუმალი ან მკაცრი გამომეტყველებით ვხედავთ, განსაკუთრებით მისი კინოროლებიდან გამომდინარე. ღიმილის დროს კი ეს სიმკაცრე ქრება და მისი სახე თოთქოს გაცილებით თბილი ხდება.
პენელოპე კრუსი
პენელოპე კრუსის ღიმილი მისი გარეგნობის ერთ-ერთი ყველაზე გამორჩეული დეტალია. მსახიობს კამერის წინ ხშირად სერიოზული და ინტენსიური გამომეტყველებით ვხედავთ, თუმცა როგორც კი იღიმის, მისი სახე მაშინვე იცვლება – გამომეტყველება უფრო თბილი და ცოცხალი ხდება.
ასევე დაგაინტერესებთ:
#OK! კადრები ყვებიან ისტორიას: 13 ვინტაჟური ფოტო მერილინ მონროს ცხოვრებიდან
