დაკოტა ჯონსონი
ცნობილი მსახიობების დონ ჯონსონისა და მელანი გრიფიტის ქალიშვილმა პოპულარობა სკანდალური ეროტიკული დრამის, „გრეის ორმოცდაათი ელფერის“ წყალობით მოიპოვა. ფილმი ე. ლ. ჯეიმსის სამნაწილიანი რომანის მიხედვით გადაიღეს, რომელიც სტუდენტ ანასტასია სტილისა და მულტიმილიონერ კრისტიან გრეის ვნებიან ურთიერთობაზე გვიყვება.
ერთ-ერთ ინტერვიუში დაკოტამ ყველაზე საყვარელ წიგნად ვლადიმირ ნაბოკოვის „ლოლიტა“ დაასახელა.
„ეს არის სევდიანი ისტორია ბავშვის – სრულიად ჩვეულებრივი პატარა გოგონას ტრაგიკული ბედისწერისა, რომელიც ამაზრზენმა და უემოციო კაცმა ჩაითრია“ – აღნიშნა მსახიობმა.
კრისტენ სტიუარტი
„წიგნი ჩემთვის ერთ-ერთი ყველაზე ძვირფასი რამეა. სახლში ხანძრის შემთხვევაში, პირველ რიგში წიგნებს გადავარჩენდი,“ – უთხრა ბელა სვონის როლის შემსრულებელმა USA Today-ს.
კრისტენის ბიბლიოთეკაში ფრანგული და ამერიკული კლასიკა ჭარბობს. მისი საყვარელი ავტორები ალბერ კამიუ, ჯონ სტეინბეკი და ჯეკ კერუაკი არიან. მსახიობის თქმით, ისინი სწორ გზაზე დადგომაში და კარგისა და ცუდის გარჩევაში ეხმარებიან. სწორედ კერუაკის რომანის მიხედვით გადაღებულ ფილმში „გზაზე“ ითამაშა მან 2012 წელს.
„ამ წიგნმა მიმაჩვია კითხვას. მან მაპოვნინა კამიუს „უცხო“ და შემახსენა, რომ ყველა ჩვენგანი ძალიან, ძალიან მარტოა – ამბობს სტიუარტი.
კრისტენის აზრით, სტეინბეკის „ედემის აღმოსავლეთით“ სიკეთესა და ბოროტებაზე დაგაფიქრებთ. სტიუარტი ასევე აღფრთოვანებულია კურტ ვონეგუტის ანტიუტოპიური რომანით „მექანიკური ფორტეპიანო“, რომელიც მოგვითხრობს სამყაროზე, რომელსაც ტექნოლოგიები მართავს.
კრისტენის საყვარელ წიგნებს შორის არის, ასევე, სტეფანი მეიერის „ბინდი“. პირველ რიგში იმიტომ, რომ ამ ისტორიამ ცნობადობა მოუტანა.
