დღევანდელ სამყაროში და რეალობაში ბრენდების მნიშვნელობას ძალიან დიდი დატვირთვა მიენიჭა, თუმცა ვინაიდან, უამრავ ადამიანს არ გააჩნია შესაძლებლობა, შესწვდეს ბრენდების მიერ შემოთავაზებულ მაღალ ფასებს, საზოგადოება ავტომატურად ცდილობს საამისოდ ხელმისაწვდომი საშუალებები აღმოაჩინოს, ანუ ყალბ პროდუქციას მიმართოს. როდესაც ადამიანს უჩნდება სურვილი, ფეხი აუწყოს მოდის სიახლეებს, სიყალბის საშუალებით ახორციელებს ამას, თუმცა რამდენად ზუსტიც უნდა იყოს ბრენდის ასლი, ფსიქოლოგიურად, ეს შენაძენი არ უტოლდება ორიგინალის შეძენის განცდებს. ამისდა მიუხედავად, საზოგადოების ძალიან დიდი ნაწილისთვის პრესტიჟი ხარისხზე უპირატესია.
იცოდით, რომ ყალბი პროდუქციის წარმოება უძველესი დროიდან იღებს დასაბამს? სხვადასხვა ბრენდის პროდუქციას ძალიან მალე გამოუჩნდა ანალოგები და იმ დროიდან მოყოლებული, ეს პროცესი ევოლუციის სხვადასხვა ეტაპს გადიოდა. ყალბი პროდუქციის ყველაზე დიდი პროცენტი ჩინეთში იწარმოება, ეს მსოფლიოში გავრცელებული ფაქტია და ისიც ყველამ კარგად იცის, რომ ყალბი საქონელი აქტიურად იყიდება მსოფლიოს გარშემო სხვადასხვა მაღაზიასა თუ შოურუმში. არც საქართველოა გამონაკლისი. ძალიან ბევრ მაღაზიას შევხვდებით, სადაც ბრენდ-ასლებს შეიძენთ. რეალურად, მოტყუებული არავინ არის − ყველა საკუთარი სურვილით იტყუებს თავს.
რა განაპირობებს ყალბი პროდუქციისადმი ინტერესის განსაკუთრებულ ზრდას? რასაკვირველია, ეკონომიკური კრიზისი და საზოგადოების შემოსავლის შემცირება. სწორედ ამიტომ გაიზარდა მოთხოვნა ბრენდული პროდუქციის ასლებზე. პროდუქტის შეძენის პროცესში, დაბალი ფასი მთავარი განმსაზღვრელი ფაქტორია, რადგანაც მომხმარებელს თანხის დაზოგვის საშუალება ეძლევა.
ისიც ყველამ კარგად ვიცით, რომ სხვადასხვა ბრენდის მიერ შემოთავაზებული პროდუქციის აქტუალობა მხოლოდ ერთი სეზონის განმავლობაში გრძელდება, ახალგაზრდა ადამიანებს კი, რასაკვირველია არ აქვს იმის საშუალება, რომ ყველა სეზონზე შემოთავაზებულ ტრენდებს აუწყონ ფეხი, ამიტომ ისინი ამ მოთხოვნილებას ყალბი პროდუქციით იკმაყოფილებენ.
