#OK! გახადე შენი ცხოვრება უფრო ფერადი „ლილეპოპთან“ ერთად

„ლილეპოპი“ ქართული ბრენდია, რომელიც ქალბატონებისა და ბავშვებისთვის სხვადასხვა სახის აქსესუარს ქმნის, კონკრეტულად: ქუდებს, კაშნეებს, საყელოებს, თმის სამაგრ ბაფთებს. თითოეული ნამუშევარი ხელნაკეთია, ყველა დეტალი დიდი ყურადღებითა და სიყვარულითაა დამზადებული. ჟურნალი OK! ბრენდის დამფუძნებელსა და დიზაინერს, ანა დიასამიძეს გაგაცნობთ, რომელიც უფრო დეტალურად და ვრცლად გვიამბობს „ლილეპოპის“ შესახებ.

ანა, როგორ დაგებადათ „ლილეპოპის“ დაარსების იდეა?

„ლილეპოპი“ ჩემში ყოველთვის არსებობდა, უბრალოდ, კონკრეტული სახელი არ ერქვა და არ ჰქონდა ის სახე მიღებული, რომელიც დღეს აქვს. ჩემთვის ტანსაცმელი არასდროს ყოფილა მხოლოდ შესამოსელი − ის იყო თვითგამოხატვის საუკეთესო საშუალება. ხელოვანი ადამიანების ოჯახში გავიზარდე. მუსიკა, მხატვრობა, ლიტერატურა − ყველაფერი ეს მეხმარებოდა სამყარო სხვა თვალით დამენახა. საკუთარი გრძნობები, ემოციები სწორედ ტანსაცმელზე გადამქონდა და ამგვარად ვუკავშირდებოდი სამყაროს ფერებს. ყოველთვის მჯეროდა და დღემდე მიმაჩნია, რომ ნებისმიერი ქალბატონი და გოგონა იმსახურებს, ცხოვრობდეს ბედნიერ და ფერად სამყაროში. დილით, როცა ვიღვიძებთ და ვიწყებთ ფიქრს, თუ რა ჩავიცვათ, ნებისმიერი ჩვენგანის გარდერობში უნდა იყოს ისეთი რამ, რისი მორგების შემდეგაც სიხარულის გრძნობა შემოვა ჩვენში და ცოტას წავიკეკლუცებთ სარკის წინ. სწორედ ამ რწმენით შევქმენი „ლილეპოპი“, რომლის მთავარია სლოგანია: „გახადე შენი ცხოვრება უფრო ფერადი“.

რას წარმოადგენს „ლილეპოპის“ ძირითადი საქმიანობა?

ამჟამად ბრენდი ძირითადად აქსესუარებს ქმნის, კონრეტულად: ქუდებს, კაშნეებს, საყელოებს, თმის სამაგრ ბაფთებს. ვმუშაობთ ასორტიმენტის გაფართოებაზე, ვამატებთ სხვადასხვა ტიპის პროდუქციას. თითოეული ნამუშევარი არის ხელნაკეთი, ყველა დეტალი დიდი ყურადღებითა და სიყვარულითაა დამზადებული. ჩემთვის ყოველი ახალი ნამუშევრის შექმნის პროცესი სასიამოვნოა და ამავდროულად, ემოციური. წინასწარ არ ვიცი, რა იქნება შედეგი, შექმნის პროცესში ხდება იდეის სრულყოფა. ძირითადი აქცენტი გამახვილებულია ფერების კომბინაციასა ორნამენტებით გაფორმებაზე. მაშინ არის დასრულებული ნამუშევარი, როდესაც შევხედავ და კმაყოფილს გამეღიმება. აი, ეს არის ჩემთვის მთავარი ნიშანი, რომ პროდუქტს დასრულებული სახე აქვს და მზად არის მომხმარებელთან შესახვედრად.

გვესაუბრეთ მომხმარებლებზე.

მომხმარებლები არიან ჩვენი მთავარი სტიმული. როდესაც ქალბატონები გვეუბნებიან, რომ ჩვენი აქსესუარის მორგების შემდეგ თავს განსაკუთრებულად გრძნობენ, საოცარი ემოციებით არიან დატვირთულნი და გამორჩეულ განწყობაზე არიან, ვრწმუნდები, რომ ჩვენი მიზანი მიღწეულია.

სად შეგვიძლია „ლილეპოპის“ პროდუქციის შეძენა?

ამ ეტაპზე „ლილეპოპის“ ნამუშევრების შეძენა ონლაინ არის შესაძლებელი, ინსტაგრამისა (lilepop_handmade) და ფეისბუქ (Lilepop • ლილეპოპი) გვერდების მეშვეობით. ასევე, ჩვენი ნამუშევრები განთავსებულია სხვადასხვა საერთაშორისო ონლაინმაღაზიაში. სამომავლოდ, ვგეგმავთ წარმოების გაზრდას, ასორტიმენტის გაფართოებას და მაღაზიის გახსნას.