მომღერალი და მოდის დიზაინერი ვიქტორია ბექჰემი საკუთარი ბრენდის – Victoria Beckham-ის სათვალის სარეკლამო კამპანიის სახე გახდა. აქამდე დიზაინერი კულისებში დარჩენას ამჯობინებდა და ბრენდის ვიზუალურ ენას მოდელებსა და ამბასადორებს ანდობდა.
WWD-ის ცნობით, სარეკლამო ფოტოსესია ვიქტორია ბექჰემისთვის ერთ-ერთი ყველაზე პრესტიჟული ჯილდოს – ხელოვნებისა და ლიტერატურის საპატიო ორდენის გადაცემიდან რამდენიმე დღეში გაიმართა, რაც სარეკლამო კამპანიას დამატებით მნიშვნელობას სძენს.
ფოტოსესია, რომელიც მოდის ფოტოგრაფიის სფეროში ერთ-ერთმა ყველაზე ცნობილმა დუეტმა – მერთ ალასმა და მარკუს პიგომ გადაიღეს, თანამედროვე, თავშეკავებული გლამურის ესთეტიკას ეფუძნება. ფოტოებზე ბექჰემი თავშეკავებული და თავდაჯერებულია – ასე ის თავისი აქსესუარების ხაზის ფილოსოფიას აღწერს.
დიზაინერის თქმით, კოლექციის შექმნისას აქცენტი მკაფიო, ადვილად ამოსაცნობ ფორმებსა და კარგად გააზრებულ პროპორციებზე გაკეთდა, ხოლო სათვალე გარდერობის სრულფასოვან ნაწილად და არა იმიჯის მეორეხარისხოვან დამატებად იყო ჩაფიქრებული.
სათვალის ახალი ხაზი Safilo Group-თან თანამშრომლობით შეიქმნა და მსოფლიოს მასშტაბით, ოპტიკის მაღაზიებსა და მოდის ბუტიკებში უკვე ხელმისაწვდომია.
Safilo-ს დიდი ხნის პარტნიორობა აქვს ბექჰემების ოჯახთან: კომპანიამ ადრე ხელი მოაწერა ცალკე, უვადო კონტრაქტს David Beckham-ის სათვალის წარმოებაზე.
ბოლო დროს, მთელი მსოფლიო ადევნებს თვალს სკანდალს, რომელიც ბექჰემების ოჯახში, დიზაინერის უფროსი ვაჟის, ბრუკლინის მონაწილეობით განვითარდა. ბეკჰემმა საჯაროდ გაავრცელა განცხადება, რომელშიც მშობლებს მუდმივ კონტროლსა და მანიპულაციაში ადანაშაულებს.მისი თქმით, ბექჰემების ოჯახში მთავარი ღირებულება „ბრენდი ბექჰემის“ შენარჩუნებაა და იდეალური ოჯახის იმიჯი რეალობას არ შეესაბამება.
მოარული ხმების თანახმად, ბრუკლინი პრინცი ჰარის მსგავსად, მემუარების დასაწერად ემზადება და გამომცემლობა –Penguin Random House-თან მოლაპარაკებებს აწარმოებს.
ასევე დაგაინტერესებთ
#OK! ოჯახური სკანდალის ფონზე ვიქტორია ბექჰემს საფრანგეთში საპატიო ორდენი გადასცეს
