„ღვინის შექმნის უძველესი ხელოვნება“
25 წელი − საუკუნის მეოთხედი, ზოგიერთებისთვის ცხოვრების გადაფასების ეტაპია და ხშირად ამას ვერცხლის წლისთავის აღნიშვნითაც გამოხატავენ.
2022 წელი კი „ტყუპების საღვინე სახლისთვის“ განსაკუთრებულ მნიშვნელობას იძენს, რადგან 25 წლის წინ, 1997 წელს გია და გელა გამტკიცულაშვილებმა, სოფელ ნაფარეულში, წინაპრების მიერ დაფუძნებულ ძველი მარნის ბაზაზე, ქვევრის ღვინის წარმოება და გაყიდვა დაიწყეს.
ღვინის დაყენების ტრადიცია თაობიდან თაობას გადაეცემოდა და სწორედ ამ უწყვეტი გენეტიკური ჯაჭვით მათ საფუძველი ჩაუყარეს ქვევრის ღვინის თანამედროვე წარმოებას.
„ტყუპების საღვინე სახლი ნაფარეულში“ პირველია ქვევრის ღვინის წარმოებასა და პოპულარიზაციაში. შესაძლოა ითქვას, რომ ქვევრი და ქვევრის ღვინო კომპანიის მთავარი სავიზიტო ბარათია. კომპანია ფლობს ინტელექტუალურ საკუთრებას „გაჭრილი“ ქვევრების სახით, რომელიც შესაძლებლობას იძლევა თვალი ვადევნოთ ქვევრში ღვინის დაყენების ტექნოლოგიურ პროცესს.
მეღვინეობის ტერიტორიაზე 135 ქვევრი ფუნქციონირებს. „ტყუპების მეღვინეობა“ მოიცავს 17 ჰა ვენახს, მათ შორის 2,5 ჰა ბიოვენახს. აღნიშნული ვენახებიდან მოწეული მოსავლის მიხედვით, კომპანია ღვინის ფართო ასორტიმენტს გთავაზობთ. აქ, ქვევრებში, დგება რქაწითლის, საფერავის, ხიხვის, ქისის, კახური მწვანის ვაზის ჯიშებიდან მოწეული უმაღლესი ხარისხის ღვინო. ასევე, ჭაჭის არაყი და ბრენდი. აღნიშნული ღვინის სახეობები ბაზარზე ცნობილია სახელწოდებით „ტყუპების ღვინო“, „ქვევრის მზე“, „თავანკარა“ და ასევე, გამორჩეულად შეგვიძლია მივიჩნიოთ „ფირუზი“, რომელიც სერტიფიცირებული ბიოღვინოა ბიოვენახებიდან, რომლის გაფართოებისა და განვითარების გეგმა კომპანიისთვის ერთ-ერთი პრიორიტეტია.
„ტყუპების საღვინე სახლის“ ღვინის სახეობები პოპულარულია როგორც ადგილობრივ, ასევე საერთაშორისო ბაზრებზე. ამას მოწმობს კომპანიის ღვინის გაზრდილი ექსპორტი სხვადასხვა ქვეყანაში. საერთაშორისო გამოფენებსა და კონკურსებში მიღებული გამარჯვებებიდან კი მნიშვნელოვანია მიმდინარე წელს მოპოვებული Decanter-ის ჯილდო − „ქვევრის მზე“ კახურმა მწვანემ 86 ქულა და ბრინჯაოს მედალი დაიმსახურა.
ღვინის წარმოებასთან ერთად, კომპანია აქტიურად არის ჩართული ღვინის ტურიზმში. „ტყუპების საღვინე სახლი ნაფარეულში“ აერთიანებს 30-ნომრიან სასტუმროს ღია აუზითა და საუნით, სარესტორნო სივრცეებს, ასევე, „ზავოდს“, ღია და დახურული ტიპის მარნებთან ერთად.
ტურისტებისთვის განსაკუთრებულ ყურადღებას იქცევს ქვევრისა და ქვევრის ღვინის მუზეუმი, რომელშიც წარმოდგენილია გაჭრილი ქვევრები, ქვევრის ღვინოსთან დაკავშირებული ექსპონატები, კომპანიის მრავალწლიანი ღვინის სახეობების კოლექცია, საარქივო ფოტომასალა და ინფორმაცია ქართული ვაზის ჯიშების, ქვევრის, მარნისა და საწნახლის შესახებ. ასევე მნიშვნელოვანია მუზეუმის სივრცეში არსებული თანამედროვე ტიპის სადეგუსტაციო დარბაზი და ღვინის მაღაზია.
25-წლიანმა შრომამ, გამოცდილებამ და შეძენილმა ცოდნამ კომპანიის დამფუძნებლები ახალი გამოწვევების წინაშე დააყენა.
25 წლის იუბილეს კომპანია განახლებული გუნდით და ახალი ხედვებით შეხვდა.
განვლილი წლებისა და დაგროვილი ცოდნის საფუძველზე, „ტყუპების საღვინე სახლის“ ბაზაზე, გია და გელა გამტკიცულაშვილების ჩართულობით შეიქმნება სასწავლო სივრცე პროფესიული მომზადების პროგრამისთვის − „ქვევრის და ქვევრის ღვინის სპეციალისტი“. პროგრამის მიზანია ქვევრისა და ქვევრის ღვინის წარმოების სფეროში კვალიფიციური კადრების მომზადება შრომის ბაზრისთვის, ეროვნული ტრადიციების შენარჩუნებისა და ქვევრის ღვინის პოპულარიზაციის გაზრდის გათვალისწინებით.
სწორედ ეს არის იმ საუკუნოვანი ქართული საქმის გაგრძელება, რომელიც ძმებმა − გია და გელა გამტკიცულაშვილებმა მიზნად დაისახეს.
