ახალგაზრდა და იმპროვიზაციის უნარით დაჯილდოებული ბრენდშეფის, ალექს ნათაძის თითოეული კერძი უბრალოდ მომზადებული კერძი არაა, ის შოუს კონცეფციას ეხმიანება და მისი ნაწილი ხდება. ამიტომაც, როცა პერფორმანსი იგეგმება, ბრენდშეფი და მზარეულთა დიდი გუნდიც იქვეა. ასე იქცევა თითოეული აპეტაიზერი, მთავარი კერძი და დესერტი „თეატრის“ თითოეული ღონისძიების ხასიათის, სტილისა და ჟანრის ნაწილად.
განსხვავდება თუ არა „თეატრის“ კერძები „წისქვილის“ კერძებისგან?
„თეატრის“ სამზარეულო განსხვავდება „წისქვილის“ რესტორნების უმეტესად ქართული ტრადიციული კერძებისგან, თუმცა უცვლელი რჩება ხარისხი. თამამად შეიძლება ითქვას, რომ კონცეპტუალური გასტრო-თეატრალური პრემიერა წარმატებით შედგა.
ამგვარი კონცეფციის სამზარეულოს გაძღოლას ორი სირთულე ახლავს თან – თითოეული ღონისძიებისთვის დამოუკიდებელი მენიუების შედგენა, მისი მუდმივი გარდაქმნა, განახლება და დიდი რაოდენობის სტუმრების ერთდროულად გამასპინძლება.
რთულია ერთროულად გაუმასპინძლდე 400-მდე სტუმარს? და რამდენი მზარეული მუშაობთ შოუს დროს სამზარეულოში?
კერძები პორციულად უნდა განაწილდეს სტუმრების რაოდენობაზე. ეს მუშაობის განსხვავებულ პრინციპს მოითხოვს, თუმცა პროცესს დიდი ადრენალინი ახლავს და უზომოდ საინტერესოა ჩემთვისაც და ჩემი გუნდისთვისაც. ბედნიერი ვარ, რომ თეატრის მსგავსი განსხვავებული და უნიკალური სივრცის შეფობა მანდეს. შოუს დროს სამზარეულოში 20-მდე მზარეული მუშაობს ჩემთან ერთად. მათთვისაც უდიდესი გამოწვევა და გამოცდილებაა ეს ყველაფერი. თავიდან რთული იყო, თუმცა ახლა უკვე ძალიან შეწყობილად ვმუშაობთ. ვფიქრობ, ჩვენი სამზარეულო ისეთივე გასაოცარი და დასამახსოვრებელია სტუმრებისთვის, როგორიც აქ გამართული წარმოდგენები.
