რეგიონში პირველ ონლაინ ნეო უნივერსიტეტი Skillwill-ი, აშშ საერთაშორისო განვითარების სააგენტოს (USAID) პროგრამის „დამსაქმებლები პროფესიული განათლებისთვის“ ფარგლებში, აგრძელებს სწავლების ინოვაციური მეთოდის დანერგვას, პროფესიონალების ზრდას და სტუდენტების დასაქმებისთვის საჭირო ყველა აუცილებელი ინსტრუმენტით უზრუნველყოფას. Skillwill-ი სტუდენტებს სწავლის უნიკალურ გამოცდილებას – 3-კომპონენტიანი სწავლების თანამედროვე მეთოდს სთავაზობს, რაც სტუდენტებს ეხმარება, აღიჭურვონ დასაქმების ბაზრისთვის საჭირო ცოდნითა და უნარებით და კარიერული წარმატებისთვის საჭირო კომპეტენციით. აღსანიშნავია, რომ პროექტის ფარგლებში, Skillwill-ი გაზრდის რეგიონულ ხელმისაწვდომობას ხარისხიან მომზადება-გადამზადების პროგრამებზე და განავითარებს სასწავლო პლატფორმას, რომელიც ადაპტირებული იქნება სპეციალური საჭიროებების მქონე პირებზე. აღნიშნულ თემაზე უფრო ვრცლად Skillwill-ის აკადემიური დირექტორი, კონსტანტინე შუბითიძე გვესაუბრა.
რას გულისხმობს Skillwill-ისა და USAID-ის თანამშრომლობა? და როგორ შეაფასებდით თანამშრომლობის შედეგებს?
USAID-ის პროგრამის დამსაქმებლები პროფესიული განათლებისთვის (The USAID Industry-led Skills Development Program) და Skillwill-ის თანამშრომლობა 2022 წელს დაიწყო. ის ითვალისწინებს Skillwill-ის მხარდაჭერას ICT მიმართულებით ახალი სასწავლო პროგრამების შემუშავებაში, არსებული კურსების თვისებრივად გაუმჯობესებასა და საქართველოში მაღალანაზღაურებადი სამუშაო ადგილების შექმნაში. 2-წლიანი პროექტის ფარგლებში USAID გვეხმარება სასწავლო პლატფორმის ადაპტირებაში სპეციალური საჭიროების მქონე პირებისთვის და ახალგაზრდების დასაქმებაში.
თანამშრომლობის ფარგლებში, რამდენიმე მიმართულებით უკვე გვაქვს შთამბეჭდავი შედეგები: პირველი, Skillwill-მა მოიპოვა ევროპული აკრედიტაცია EAHEA-სგან, გაიარა სასწავლო პროგრამების ვალიდაციის პროცესი ამერიკულ და ესპანურ IT კომპანიებთან და არაფორმალურიდან შევიდა ფორმალური განათლების სფეროში, რაც გულისხმობს ევროპულთან ერთად ადგილობრივ, ეროვნულ აკრედიტაციას; ამასთანავე, უკვე გადამზადდა 500-ზე მეტი სტუდენტი და დასაქმდა, ან სამუშაო პირობები გაიუმჯობესა რამდენიმე ათეულმა კურსდამთავრებულმა. ასევე, სწავლების პროცესში დაინერგა ხელოვნური ინტელექტის კომპონენტი და უკვე გვყავს AI ტუტორი, რომელიც ნებისმიერი სტუდენტისთვის 24/7 არის ხელმისაწვდომი.
როგორი შედეგებია დასაქმების და კარიერული ზრუნვის ნაწილში?
500-ზე მეტმა სტუდენტმა უკვე გაიარა USAID-თან პარტნიორობით შემუშავებული, ან გაუმჯობესებული პროგრამები და დამატებით გადამზადდა ე.წ. რბილი უნარების კუთხით. ეს ყოველივე კი, მათ კარიერულ წინსვლასა და განვითარებაში ეხმარება. ამასთან, ვამაყობთ იმით, რომ უკვე გვყავს რამდენიმე ათეული დასაქმებული ქართულ და საერთაშორისო კომპანიებში, რაც მათ შესაძლებლობას აძლევს, მიიღონ მაღალი ანაზღაურება. აღსანიშნავია, რომ ეს მათ სულ რაღაც 7-თვიანი გადამზადების შედეგად შეძლეს.
გვესაუბრეთ ახალ პროგრამებზე, რომელიც შემოდგომა-ზამთრის სემესტრში შესთავაზეთ სტუდენტებს.
Skillwill-ი მუდმივად იკვლევს და ამუშავებს იმ პროგრამებს, რაც ადგილობრივ და საერთაშორისო დასაქმების ბაზრებზე აქტუალური და მოთხოვნადია. ეს პროცესი მუდმივად მიმდინარეობს და არასდროს ვჩერდებით არსებულ პროგრამებსა და სერვისებზე, რასაც ჩვენს სტუდენტებს ვთავაზობთ. სწორედ ამ მიდგომის ფარგლებში წელს, 2024 წლის შემოდგომის სემესტრიდან, Skillwill-ს დაემატა ისეთი ახალი კურსები, როგორიცაა Cambridge-ის უნივერსიტეტთან ერთად ინგლისური ენა, ხელოვნური ინტელექტის პრაქტიკული მექანიზმები საოფისე მუშაობისთვის, კრიპტო ვალუტა და ბლოკჩეინ ტექნოლოგიები და ა.შ.
რომელია ყველაზე მოთხოვნადი მიმართულება?
ტრადიციულად, ყველაზე მოთხოვნადი კურსები არის პროგრამირება 0-დან, გრაფიკული და UI/UX დიზაინი, ციფრული მარკეტინგი და ახლა უკვე Cambridge-ის ინგლისური ენის ონლაინკურსები, რასაც ჩვენ ექსკლუზიურად ვთავაზობთ ქართველ მომხმარებლებს. აქვე უნდა აღინიშნოს, რომ სტაბილურად მოთხოვნადია პროგრამირების სხვადასხვა ენა და ICT სექტორთან დაკავშირებული სხვა კურსები, როგორიცაა Java, React-ი, IT Project Management-ი და ა.შ.
რამდენად დიდია რეგიონებიდან სტუდენტების ჩართულობა?
Skillwill-ის მოდელი, რითაც ჩვენ ძალიან ვამაყობთ, გულისხმობს გეოგრაფიული ასპექტის მთლიანად აღმოფხვრას სწავლების პროცესში, რადგან, როგორც მოგეხსენებათ, ჩვენ ვართ პირველი სრულად ონლაინ ნეო უნივერსიტეტი რეგიონში. ნებისმიერ ადამიანს 14 წლიდან, მიუხედავად იმისა, სად ცხოვრობს, ქვეყნის შიგნით ამა თუ იმ რეგიონში, თუ იმყოფება ემიგრაციაში, შეუძლია ონლაინ ჩაგვერთოს და ქართულად ისწავლოს ICT მიმართულებით ყველაზე მოთხოვნადი პროფესიები 3 თვიდან 18 თვემდე პერიოდში.
აქვე უნდა აღინიშნოს, რომ სულ ახლახან თანამშრომლობის მემორანდუმი გავაფორმეთ ჭიათურის მულტიფუნქციურ ცენტრთან, საიდანაც 30-ზე მეტი სტუდენტი მივიღეთ ოქტომბერში. ასევე, Skillwill-ის ოლიმპიადა ჩავატარეთ, რის შედეგადაც 10 ახალგაზრდას სრულიად უფასოდ ვასწავლით მათთვის სასურველ კურსებზე და გამარჯვებულთაგან ნახევარზე მეტი სწორედ რეგიონებიდან არის.
სამომავლო გეგმები
Skillwill-ი ამ ეტაპზე ემზადება პირველი ფიზიკური ფორმატის, STEM აკადემიის გახსნისთვის ბათუმში, რომელიც წლის ბოლომდე ამოქმედდება და აჭარელ ბავშვებს ძალიან საინტერესო 2-წლიან პროგრამას შესთავაზებს. ასევე, ვემზადებით კოლეჯის ავტორიზაციისთვის, რომელიც თბილისში, 2025 წლის დასაწყისიდან დაიწყებს ფუნქციონირებას და მრავალფეროვანი პროგრამებით იქნება წარმოდგენილი განათლების ბაზარზე. აქვე განთავსდება საბავშვო აკადემიაც 12 წლის ასაკიდან.
ტექსტი: სოფიო მალანია
ფოტო: ალექსეი სეროვი
Facebook: facebook.com/USAIDSkillsProgram
Linkedin: https://www.linkedin.com/feed/
