უსიყვარულოდ მზე არ სუფევს ცის კამარაზეო, დაწერს გალაკტიონი და მთელ გალაქტიკას ჩააფიქრებს სიყვარულზე… მართლაც, სიყვარულის გარეშე არ არსებობს აბსოლუტური სინათლე… ეს გრძნობა იმდენად ამაღელვებელი და ამაღლებულია, რომ შემიძლია დაუსრულებლად ვიფიქრო და თან პირველად მაშინებს, ვწერო… „სიყვარულია მშობელი ოცნებისა, ოცნება აღვიძებს კაცთა მოდგმის მთვლემარე გონებას, გონება აღძრავს ქმედებას“… – „შერეკილების“ ფორმულამდეც მივედი და ნამდვილად სწორადაც, ალბათ – სიყვარული ატრიალებს დედამიწას, დომენიკო და სწორედ ეს გრძნობა იხსნის კაცთა მოდგმას ცოდვებისაგან… ბევრი რომ აღარ გამიგრძელდეს, გეტყვით, რომ ეს ფიქრები რუსკა ქარქაშაძემ ამიშალა, რადგან ბევრი ვესაუბრე მას სიყვარულზე. ვრცლად იხილეთ ჩვენს ინტერვიუში:
ამბავი სიყვარულზე
მე და ჩემმა საქმრომ ერთმანეთი დაბადების დღეზე გავიცანით, ჩვენს საერთო მეგობართან. მერე, როგორც აღმოვაჩინეთ, ძალიან ბევრი საერთო მეგობარი გვყოლია, მაგრამ რატომღაც აქამდე ერთმანეთს არ ვიცნობდით. თუმცა შემთხვევით ხომ არაფერი ხდება და აი, იმ დაბადების დღის მერე დაიწყო ყველაფერი. და ისე ჩქარა მოხდა ჩვენი სიყვარულის განვითარება, რომ შემიძლია ვთქვა, ეს იყო ერთი ნახვით შეყვარება…
და შენთვის რა არის სიყვარული, რუსკა?
აი, როგორ ვიყავი, იცი? სულ კარგ ხასიათზე, წვრილმანებიც კი მაბედნიერებდა. ყველაფერს უფრო დიდი მოტივაციითა და სიყვარულით ვაკეთებდი და ჩემში ამ ცვლილებებმა მაგრძნობინა, რომ შეყვარებული ვარ. სიყვარული ჩემთვის არის მოტივაცია – იყო უკეთესი ადამიანი, უკეთ აკეთო ყველაფერი. სიყვარულია, როცა შეგიძლია უანგაროდ აკეთო რაღაცები, შეიყვარო ადამიანი ისეთი, როგორიც არის. ყველაფერი წვრილმანებით იწყება და საბოლოოდ უდიდეს შეგრძნებაში გადადის.
მოგვიყევი, რას საქმიანობ დღეს?
ვარ საჯარო მმართველობისა და პოლიტიკის ფაკულტეტის სტუდენტი. პარალელურად, ვთამაშობ ახალ თეატრში. საერთოდ, აქტიური ცხოვრების წესი მაქვს. ბავშვობიდან ასე ვარ, რუტინულ საქმიანობას ვერ ვიტან – მიყვარს, როცა დღის რეჟიმი დატვირთული მაქვს. ასე გარკვეულ საქმეზე კონცენტრირებასაც უკეთესად ვახერხებ.
ხელოვნური სუნთქვა
ვფიქრობ, ეს სერიალი ტრამპლინი იყო ჩემს ცხოვრებაში. ჩემი კარიერული მიღწევების პირველი ნაბიჯი, საიდანაც ყველაფერი დაიწყო. მაშინ ცამეტი წლის ვიყავი და უდიდესი გამოცდილება მივიღე.
რუსკა, როგორ ფიქრობ, რა არის შენი თაობისთვის ყველაზე მნიშვნელოვანი ფასეულობა?
ვერასდროს ვერ შევეგუებით თავისუფლების დაკარგვას. ძალიან მამაცები ვართ, ძალიან მებრძოლები ვართ, ძალიან შეუპოვრები. ვამაყობ ჩემი თაობით. ყველანი ნიჭიერები და მიზანდასახულები არიან…
და თავისუფლება რა არის, როგორ გესმის?
თავისუფლება არ არის ის, რომ ყველაფრის კეთების უფლება გაქვს. ეს არის გარემოს და სხვა ადამიანების მიმართ – პასუხისმგებლობის შეგრძნება. მარტო მე ვიყო თავისუფალი და დანარჩენი არ მაინტერესებს ასე არაა. სხვა ხალხის მიმართ პატივიცემა და მათი გათვალისწინებაა თავისუფლება.
როგორ ფიქრობ, წარმატებას რა სჭირდება?
ყველა ადამიანს წარმატების ინდივიდუალური ფორმულა აქვს. მე შემიძლია ვთქვა, ჩემს შემთხვევაში რა იყოს ეს – ძალიან დამეხმარა თავდაჯერებულობა და საკუთარი თავის რწმენა. მაშინაც კი, როცა ჩემი არავის სჯეროდა, მე ვიყავი ის ერთადერთი ადამიანი, ვისაც ჩემი თავის მჯეროდა. გარდა ამისა, შრომისმოყვარეობაც ძალიან მნიშვნელოვანია, რადგან შრომის გარეშე საერთოდ არაფერი არ გამოდის. და იღბალიც, რა თქმა უნდა, – საჭირო დროს საჭირო ადგილას მოხვედრა. ყველა რესურსი, რასაც ჩვენს შრომაში ჩავდებთ, აუცილებლად დაგვიბრუნდება. უნდა გჯეროდეთ ამის და ყველაფერი გააკეთოთ თქვენი მიზნებისთვის.
ყველაზე მთავარი რა არის შენთვის?
ჩემთვის მთავარია, რომ მე, ჩემი ოჯახი, ჩემი მეგობრები და ძვირფასი ადამიანები თავს ბედნიერად ვგრძნობდეთ. სხვა დანარჩენი ჩემთვის აქედან გამომდინარეობს.
ფოტო: მაკა მეგრელიძე
პროექტის ავტორი: ნიკა გომართელი
ტექსტი: მარიამ გაბედავა
მიზაჟი: სოფია საენკო
ვარცხნილობა: ირმა იასაღაშვილი
ჩაცმულობა: STRADIVARIUS
ლოკაცია: IQ Studio
