საკუთარ თავზე ზრუნვა და ფორმაში ყოფნა ნებისმიერი ქალბატონისთვის უმნიშვნელოვანესია. კომფორტული, ხარისხიანი და დახვეწილი სამოსი კი მეტ თავდაჯერებულობას გვძენს. OK! გაგაცნობთ ნარგო’ს ბუტიკის დამფუძნებელს, ნარგო ბექირიშვილს, რომელიც გარდა იმისა, რომ ყოველთვის განსხვავებულად და განსაკუთრებულად გამოიყურება, ზრუნავს სხვა ქალბატონების სტილზე და სთავაზობთ მათ ყველაზე ტრენდული და დახვეწილი სამოსის მრავალფეროვან კოლექციას.
ნარგო, უპირველესად გაგვეცანით და გვიამბეთ „ნარგო’ს ბუტიკის“ შესახებ. რამდენი ხანია, რაც გაიხსნა?
პირველ რიგში, მადლობას გიხდით იმისთვის, რომ მომეცა საშუალება, ვიყო ჟურნალი OK!-ის რესპონდენტი. მე გახლავართ ნარგო ბექირიშვილი, 35 წლის. დავიბადე და გავიზარდე ქალაქ ბათუმში. დაოჯახებული ვარ და მყავს ორი შვილი – 9 წლის სანდრო და 8 წლის ანდრია. პროფესიით ქიმიკოს-ექსპერტი გახლავართ, თუმცა პროფესიული განხრით ძალიან ცოტა ხანს მიმუშავია.
ნარგო’ს ბუტიკი 2018 წლის 15 ივნისიდან არსებობს და უკვე 7 წელია ჩემი მომხმარებლების სამსახურში ვარ. უდიდეს სიამოვნებას მანიჭებს, ვემსახურო ქალბატონებს და არამარტო, და ვიზრუნო მათ ელეგანტურ და მოდურ ჩაცმულობაზე.
თქვენი ჩაცმის სტილზეც მოგვიყევით.
რაც შეეხება ჩემი ჩაცმის სტილს, არასდროს ვირჩევ რომელიმე ერთ კონკრეტულს, ყოველთვის განსხვავებულად გამოვიყურები და მუდამ ახალ-ახალ სტილს ვურჩევ როგორც საკუთარ თავს, ასევე მომხმარებლებს. თუმცა უპირატესობას მაინც კლასიკას მივანიჭებ, რადგან ელეგანტურობას მეტად უსვამს ხაზს და მიმაჩნია, რომ ყველა ქალს ძალიან უხდება.
თავისუფალ დროს რისი კეთება გიყვართ?
სიმართლე გითხრათ, თავისუფალი დრო იშვიათად მაქვს, მაგრამ როცა გამომიჩნდება, კულინარიას ვუთმობ, მიყვარს ნამცხვრებისა და გემრიელი დესერტების მომზადება და ამას ჩემს დედამთილთან ერთად ჩვენს საკონდიტრო „ქეთანსაში“ ვაკეთებ, რომელიც ზუსტად ჩემი ბუტიკის გვერდით მდებარეობს.
რა სახის პროდუქციას სთავაზობთ მომხმარებელს?
ჩვენთან ფართო არჩევანია, რაც გულისხმობს ტანისამოსს, ჩანთებს, ფეხსაცმელებსა და აქსესუარებს.
ხარისხზე მოგვიყევით.
რაც შეეხება ხარისხს, ყოველთვის ორიენტირებული ვარ, რომ მომხმარებელს შევთავაზო მაღალხარისხიანი, ბრენდის თუ რეპლიკის პროდუქცია, თუმცა ყველა ხარისხს თავისი მომხმარებელი ჰყავს. გვაქვს როგორც სტამბულის, ასევე ჩინეთის პროდუქცია.
სად მდებარეობს ბუტიკი? ასევე შესაძლებელია თუ არა პროდუქციის ონლაინ შეძენა?
ნარგო’ს ბუტიკი მდებარეობს ქალაქ ბათუმში, ჰაიდარ აბაშიძის 72 ნომერში. მიუხედავად იმისა, რომ ლოკაცია არ მდებარეობს ცენტრალურ უბანში, ამის გამო მომხმარებელს დისკომფორტი არასდროს შექმნია, პირიქითაც შეიძლება ითქვას, რომ ეს წარმატების ერთ-ერთი საიდუმლოცაა. ჩვენთან მოსულ მომხმარებელს შეუძლია ადგილზე შეარჩიოს კოლექცია და ყოველგვარი ლოდინის გარეშე შეიძინოს მისთვის სასურველი ნივთი, ასევე, ვმუშაობთ ონლაინრეჟიმში და ვსარგებლობთ საკურიერო მომსახურებითაც როგორც საქართველოს მასშტაბით, ასევე საზღვარგარეთ.
გარემო, რომელიც თქვენთან მოსულ სტუმრებს ხვდებათ.
თუ დააკვირდებით, მაღაზიის კარს დღემდე ამშვენებს საახალწლო დეკორაცია, წითელი ბაფთა და ხშირად მეკითხებიან, თუ რატომ არ ვხსნი მას. სწორედ ამით შემიძლია ვუპასუხო მომხმარებლებსაც და თქვენც, რომ ჩვენთან მოსულ ადამიანებს მუდამ ახალი წელი და სადღესასწაულო განწყობა ხვდებათ, სითბო და სიყვარული.
როგორია თქვენი სამომავლო გეგმები?
როგორც უკვე აღვნიშნე, ძალიან მიყვარს ჩემი საქმიანობა და არ ვზოგავ თავს, რომ მომხმარებლებს მუდმივად სიახლეები შევთავაზო. მიყვარს მათთან ურთიერთობა, განსაკუთრებით სოციალურ ქსელებში, როცა ლაივით ვერთვები. ეს კიდევ ერთი მთავარი კომუნიკაციაა ჩემსა და მომხმარებლებს შორის, რაც, დანამდვილებით ვიცი, რომ ჩემს მომხმარებლებს მოსწონთ და ახარებთ. ჩვენი ყოველი ლაივი სრულდება გათამაშებებით და უამრავი საჩუქრის გაცემით, რაც უფრო მეტად საინტერესოს ხდის ამ ყველაფერს, ეს ერთგვარი სავიზიტო ბარათია ჩვენი და უკვე ტრადიციად ქცეული ამბავი. უდიდესი მოტივაციითა და შემართებით ვიმუხტები ყოველ ლაივზე და მის შემდეგ. მიყვარს, როცა მე და ჩემს გემოვნებას ენდობა უამრავი ადამიანი, ამიტომ სამომავლო გეგმებიც, რა თქმა უნდა, უფრო მეტ განვითარებას და გაფართოებას უკავშირდება. არასოდეს დამიყრია ფარ-ხმალი, მაშინაც კი, როდესაც 5 წლის ნაშრომი და ჩემი გამომწერებით მდიდარი მაღაზიის ფეისბუქგვერდი გამიტეხეს და უამრავი გამომწერი დავკარგე. ყველაფრის თავიდან დაწყებამ მომიწია, თითქმის ორი წელია ნულიდან დავიწყე გვერდის აქტიურობა, გავაკეთე ახალი გვერდი „ნარგო’ს ბუტიკი“ და უფრო მეტი შემართებით დავუბრუნდი ჩემს მომხმარებელს. დიდ მოტივაციას მმატებს თითოეული ახალი გამომწერი და ძალიან გამიხარდება, ჟურნალი OK!-ის მკითხველიც თუ გახდება ჩემი ფეისბუქ და ტიკტოკ გვერდების გამომწერი.
მადლობას ვუხდი ჩემს თითოეულ მომხმარებელსა და მაყურებელს განვლილი 7 წლისთვის, ისინი რომ არა, მარტო ვერაფერს შევძლებდი. წინ კიდევ ბევრი საინტერესო წელი გველოდება.
ტექსტი: ციაკო ღამბაშიძე
ფოტო: გიორგი კალანდაძე
