სასტუმრო „თეორია“ გაიხსნა მათთვის, ვინც ყველაზე მეტად აფასებს მაღალ სტანდარტზე მორგებულ და კარგად აღჭურვილ გარემოს. აქ წარმოდგენილი უნიკალური მენიუ კი გულგრილს ვერავის დატოვებს. ყოველ სეზონზე ცვალებადი, ეკოლოგიურად სუფთა პროდუქტებისგან დამზადებული და განსხვავებული სერვირებით წარმოდგენილი კერძები თავს აუცილებლად დაგამახსოვრებთ და „თეორიას“ თქვენს საყვარელ ადგილად აქცევს. დეტალური ინფორმაციისთვის OK! გაესაუბრა სასტუმროს მარკეტინგისა და გაყიდვების მენეჯერ ნანა ხვედელიძეს და რესტორნის შეფ დავით პოღოსიანს.
გვიამბეთ „თეორიას“ შესახებ.
(ნანა): „თეორია“ სასტუმროსა და რესტორნის კონცეფციების შერწყმით შეიქმნა. რაც შეეხება უშუალოდ სასტუმროს ნაწილს, 4 ტიპის 17 ნომერს მოიცავს. „თეორია“ ძირითადად განკუთვნილია ადამიანებისთვის, რომლებიც მივლინებით ჩამოდიან საქართველოში. აღსანიშნავია, რომ თითოეული ოთახი ერთმანეთისგან განსხვავებულია. სასტუმრო უნიკალურია იმითაც, რომ ავეჯის დიდი ნაწილი იმპორტირებულია, ნაწილი კი ხელნაკეთია. მნიშვნელოვანია ისიც, რომ ჩვენი სასტუმროს ნომრები სრულად აღჭურვილია და მათი ფასი მორგებულია სერვისზე. მიუხედავად იმისა, რომ ჩვენი სასტუმრო ფართომასშტაბიანი არ არის, აქვს განვითარების ძალიან დიდი პოტენციალი და შესაბამისი ბაზა. სწორედ „თეორიის“ შედარებით მომცრო ზომა გვაძლევს საშუალებას, მომხმარებელი ვამყოფოთ ყურადღების ცენტრში და მივაწოდოთ ძალიან მაღალი ხარისხის მომსახურება სასტუმროს, კერძებისა თუ სასმელების კუთხით.
დავით, ვინაიდან თქვენ სასტუმრო „თეორიას“ რესტორნის მთავარი შეფი ბრძანდებით, ერთ-ერთი ყველაზე საპასუხისმგებლო საქმე გევალებათ. გვესაუბრეთ იმასთან დაკავშირებით, თუ როგორი პრინციპით არჩევთ კერძებს თქვენი მენიუსთვის.
(დათო): უპირველეს ყოვლისა, უნდა აღინიშნოს ის ფაქტი, რომ ჩვენს მენიუს გამოარჩევს სერვირების განსხვავებული ფორმა. არაერთი კვლევის საფუძველზე შევისწავლეთ ბაზარზე ყველაზე მოთხოვნადი პროდუქტები და 110 კერძიდან გადარჩევის პრინციპით დავიტოვეთ 20-მდე, რომლებიც სასტუმრო „თეორიას“ რესტორნის მთავარი ნიშა გახდა. მსურს ხაზი გავუსვა იმ ფაქტსაც, რომ მენიუ აუცილებლად იქნება სეზონური. შესაბამისად, ზამთრის მენიუს ამოქმედების პარალელურად ჩვენმა გუნდმა უკვე დაიწყო საგაზაფხულო მენიუზე მუშაობა. ყოველივე ამაში ხელს გვიწყობს ნიუანსი, რომ ჩვენი მენიუ არის შედარებით პატარა ზომის და ცვალებადი, სეზონური პროდუქტებიდან გამომდინარე.
რა დროის განმავლობაში ამუშავებდით მენიუს?
(დათო): რამდენიმე თვის წინ, ჩემი რესტორანში მოსვლის დღიდან დავიწყე მენიუზე ფიქრი და კვლევების ჩატარება იმის შესახებ, თუ რომელი პროდუქციაა ყველაზე მეტად მოთხოვნადი და როგორ შევთავაზო იგი საზოგადოებას განსხვავებული ფორმით − როგორიც ჯერ არსად არის. შედეგად კი მივიღეთ ზამთრის მენიუ 20-მდე საინტერესო და მართლაც გამორჩეული კერძით.
გვესაუბრეთ ღვინის იმ ფართო ასორტიმენტზე, რომელიც თქვენთან არის წარმოდგენილი.
(დათო): უპირველეს ყოვლისა, აღვნიშნავ, რომ ჩვენს ბარში წარმოდგენილია სასმელების ფართო ასორტიმენტი. რაც შეეხება უშუალოდ ღვინოს, იგი შერჩეულ იქნა ხანგრძლივი ფიქრის შედეგად. საწყის ეტაპზე 300-დან 400-მდე სახეობის ღვინო დავაგემოვნეთ როგორც ჩვენ, ისე კომპეტენტურმა სომელიეებმა, რადგან ჩვენთვის ყველაზე პრიორიტეტული საკითხი სწორედ ხარისხი გახლავთ. დაგემოვნებული ღვინის 5% კი შეირჩა „თეორიასთვის“, რომლებიც დღეს საკმაოდ დიდი პოპულარობით სარგებლობს და მოთხოვნადია მომხმარებლის მხრიდან.
გვიამბეთ „თეორიას“ სამომავლო გეგმებთან დაკავშირებით.
(ნანა): გახსნის დღიდან ზრდისა და განვითარების პროცესი არ შეგვიწყვეტია, შესაბამისად ამბიციურებიც ვართ სამომავლო გეგმებთან მიმართებაში. ვგეგმავთ სხვადასხვა დღესასწაულის აღნიშვნასა და არაერთი ივენთის ჩატარებას. აღსანიშნავია ისიც, რომ ახალ წელს ველოდებით ჩვენს მომხმარებლებს, რათა ერთად აღვნიშნოთ იგი და დაუვიწყარი გავხადოთ ეს დღე.
ტექსტი: მარიამ მთივლიშვილი
ფოტო: ალექსეი სეროვი
