საქართველოს პასუხისმგებელი ბიზნესის კონკურსი Meliora, საქართველოს სტრატეგიული კვლევებისა და განვითარების ცენტრის მიერ (CSRDG) 2018 წელს დაფუძნდა. კონკურსი ყოველწლიურად გამოავლენს და აჯილდოებს საქართველოში მოქმედ იმ კომპანიებს, რომლებიც ახორციელებენ გამორჩეულ პროექტებსა და ინიციატივებს კორპორაციული სოციალური პასუხისმგებლობის (СSR) სფეროში. Meliora-ს მიზანია საქართველოში СSR-ის განვითარების ხელშეწყობა და ამ მიმართულებით საზოგადოების ცნობიერების ამაღლება.
კონკურსის კატეგორიები ეფუძნება СSR-ის ძირითად საკითხებს და მოიცავს კორპორაციული სოციალური პასუხისმგებლობის ყველა ძირითად სფეროს, შესაბამისად კომპანიებს მარტივად შეუძლიათ საკუთარი პროექტების მორგება მრავალფეროვან კატეგორიებთან და განხოცრიელებული ინიციატივებით კონკურსში მონაწილეობის მიღება.
Meliora შემუშავდა CSR-ის სფეროს წამყვანი ევროპული ორგანიზაციების ექსპერტებთან თანამშრომლობით (Pontis Foundation, Slovakia და Business in the Community, the Prince’s Responsible Business Network, UK) და მისი დამოუკიდებელი ჟიური შედგება დარგის ქართველი და უცხოელი ექსპერტებისგან. შემფასებელთა გადაწყვეტილებებზე ნებისმიერი ზეგავლენის თავიდან აცილების მიზნით, ქართველი ჟიურის ვინაობა, კონკურსის დასრულებამდე კონფიდენციალურია.
გამარჯვებული პროექტები და კომპანიები დაჯილოდების საზეიმო ცერემონიაზე, 2024 წლის 26 ივნისს გახდება ცნობილი. განაცხადების მიღების ვადა კი, 20 თებერვალს იწურება.
კონკურსში მონაწილეობის მიღება, გამარჯვების თანაბარი შანსით, შეუძლიათ მსხვილ, საშუალო და მცირე ზომის კომპანიებს. თითოეული კატეგორია სპეციალური კრიტერიუმებით ფასდება, რომლებიც წარმოდგენილი პროექტებისა და შედეგების მასშტაბებს კომპანიის ზომასთან შეფარდებით განიხილავს. ინვესტირებული თანხების ოდენობაც, კომპანიის ზომის მსგავსად, არ იქნება შეფასების გადამწყვეტი კრიტერიუმი.
აღსანიშნავია, რომ თანამედროვე მსოფლიოში, პასუხისმგებლიან ბიზნეს საქმიანობას სულ უფრო მეტი ყურადღება ექცევა. შესაბამისად, ევროკავშირსა და გლობალურ ბაზრებთან ინტეგრაციის გზაზე, ქართული კომპანიების წარმატებისთვის ერთ-ერთი მნიშვნელოვანი კომპონენტი, სწორედ პასუხისმგებელი ბიზნესსაქმიანობის საერთაშორისო სტანდარტების დაცვაა.
შეგახსენებთ, რომ კორპორაციული სოციალური პასუხისმგებლობა გულისხმობს არა მხოლოდ იმას, თუ როგორ ხარჯავენ კომპანიები საკუთარ მოგებას, არამედ იმას, თუ რა გზებით მოიპოვებენ მას. СSR ბევრად აღემატება ქველმოქმედებას, ფილანტროპიასა და კანონმორჩილებას. ის ასახავს კომპანიების საქმიანობის ეკონომიკური, სოციალური და ეკოლოგიური ზეგავლენების მართვას (ნეგატიური ზეგავლენების მაქსიმალურად შემცირებას და დადებითის გაზრდას), ასევე, საკუთარ თანამშრომლებთან, მომხმარებლებთან და საზოგადოებასთან ურთიერთობის ფორმებსა და პრინციპებს.
კონკურს Meliora 2024-ის შესახებ დამატებითი ინფორმაციის მისაღებად და პროექტების წარსადგენად ეწვიეთ ვებგვერდს: www.meliora.ge
კონკურსი ტარდება ევროკავშირისა და კონრად ადენაუერის ფონდის (KAS) მხარდაჭერით მიმდინარე პროექტის “სამოქალაქო საზოგადოების ინიციატივის” ფარგლებში.
