Შვედეთის ქალაქ მალმეში ევროვიზიის სიმღერის კონკურსის მეორე ნახევარფინალში საქართველოს წარმომადგენელმა ნუცა ბუზალაძემ თავის საკონკურსო სიმღერა “Firefighter” შეასრულა. Რითაც ევროპაში მცხოვრები მსმენლის მოწონება დაიმსახურა და 7 წლის შემდეგ საქართველოს ევროვიზიის ფინალში გადასვლაში დაეხმარა. ქართველმა მომღერალმა თავისი გამოსვლა “მიყვარხარ საქართველოს” შეძახილით დაამთავრა.
სიმღერა “Firefighter”, რომლითაც ნუცა ბუზალაძემ ევროვიზიის ფინალის საგზური მოიპოვა, დარკო დიმიტროვმა და ადა სატკამ სპეციალურად ნუცასთვის დაწერეს. ქართველმა მომღერალმა სცენაზე ცეცხლი დაანთო, ქორეოგრაფია, რომელმაც ნომერი კიდევ უფრო შთამბეჭდავი გახადა ლუიჯი ალოკას ეკუთვნის, ხოლო ულამაზესი კოსტიუმების დიზაინზე ლაშა ჯოხაძემ და ალექსანდრე ახალკაციშვილმა იზრუნეს. კლიპის რეჟისორი ზაზა ორაშვილი გახლავთ, ხოლო მხატვარი – შაკო პოპიაშვილი.
View this post on Instagram
საქართველოსთან ერთად ევროვიზიის ფინალში გადავიდნენ ლატვია, ავსტრია, ნიდერლანდები, ნორვეგია, ისრაელი, საბერძნეთი, ესტონეთი და შვეიცარია. ევროვიზიის სცენაზე ასევე საკონკურსო სიმღერა შეასრულეს საფრანგეთის, იტალიისა და ესპანეთის წარმომადგენლებმა.
ევროვიზიის ნახევარფინალის დასრულების შემდეგ პრესკონფერენცია გაიმართა, სადაც ქართველმა მომღერალმა მედიის კითხვებს უპასუხა:
დიდი მადლობა ყველას ნდობისთვის. სცენაზე ვგრძნობდი ჩემი ქვეყნის ენერგიას. ჩემი ოცნება იყო, საქართველო გასულიყო 7 წლის შემდეგ ფინალში. მადლობა, რომ დამაჯერეთ ოცნებების ახდენაში. ძალიან ბედნიერი ვარ და ამავდროულად ამაყი, რადგან ქართველი ვარ.
შეგახსენებთ, ევროვიზიის ფინალი 11 მაისს მალმეში გაიმართება, ევროვიზია 2024-ის ფინალურ კონკურსზე 26 ქვეყანა იმღერებს. აქედან ფინალში ათი ქვეყანა – პირველი ნახევარფინალიდან, მეორე ათი ქვეყანა კი დღევანდელი კონცერტიდან გადავიდა, რაც შეეხება „დიდი ხუთეულის“ ქვეყნებსა და მასპინძელ ქვეყანას-შვედეთს, მათი წარმომადგენლები ფინალში ავტომატურად იმღერებენ.
ცნობისთვის, Ნუცა ბუზალაძე გასულ წელს American idol-ის 21-ე სატელევიზიო სეზონში მონაწილეობდა. Ქართველი მომღერალი შოუს 12 ფინალისტს შორის მოხვდა, თუმცა შემდეგ ეტაპზე ვეღარ გადავიდა. ამერიკულ მედიაში წერდნენ, რომ შოუს 21-წლიანი ისტორიის მანძილზე, 12 საუკეთესო შემსრულებელს შორის უცხოელი არასდროს მოხვედრილა. Ნუცა საქართველოს ისტორიაშიც პირველი მომღერალია, რომელიც ამ რეზონანსულ ამერიკულ შოუში მონაწილეობდა.
