PSP – ჩემი ოჯახის აფთიაქი, საქართველოს ფარმაციის ლიდერი, ხარისხის გარანტი, ევროპული ღირებულებების მქონე კომპანია წარმოგიდგენთ უჩვეულო და სახალისო საახალწლო ტრადიციებს.
შოტლანდიის მთავარი საახალწლო ტრადიცია განსაკუთრებით საინტერესო უნდა იყოს ჩვენთვის, რადგან მეკვლეობის ტრადიციის დასაბამს სწორედ შოტლანდიის ისტორიაში ვხვდებით. 31 დეკემბერს შოტლანდიელები ჰოგმანეის უწოდებენ და მეკვლეობის, იგივე „პირველი შებიჯების“, ტრადიციაც საუკუნეების დამკვიდრებულია ამ ქვეყანაში. ახალი წლის ღამეს ვინც პირველი შეაბიჯებს სტუმრად სხვის სახლში, მომავალი თვეების ბედიც ამ ადამიანის მოტანილ იღბალზე ხდება დამოკიდებული. მეკვლეს მნიშვნელობა შოტლანდიაში ძველად, სავარაუდოდ VIII საუკუნიდან, იზრდებოდა, რადგან ვიკინგებისგან თავდაცვას უკავშირდებოდა. ისტორიული ფონის გათვალისწინებით შოტლანდიურ კულტურაში მარტივად ჩამოყალიბდა სასურველი მეკვლეს სახეც: უმეტესწილად ქერა ვიკინგების საპირისპიროდ, მაღალი და შავთმიანი ახალგაზრდა მამაკაცი მიიჩნეოდა საპატიო მეკვლედ, მცველად და ტრადიციის მიხედვით, სტუმრად ნახშირი, მარილი, ორცხობილა და ვისკი მიჰქონდა − ისეთი საწყისი მოთხოვნილებების შესაბამისად, როგორებიცაა სითბო, საკვები და სასმელი.
წარსული ზოროასტრიზმის გავლენიდან შემორჩენილი ტრადიციებიც დღემდე შოტლანდიური საახალწლო დღესასწაულების განუყოფელი ნაწილია. ედინბურგში ყოველწლიურად იმართება ჩირაღდნებით მსვლელობა მესტვირეებთან და მედოლეებთან ერთად, სადაც შოტლანდიელები ცეცხლის ბურთების მოქნევით მზის სიმბოლოს ხატავენ და მომავალ წელს ზარ-ზეიმით ეგებებიან.
