მოგზაურობის დაგეგმვისას ერთ-ერთი მთავარი კომპონენტი სასტუმროს სწორად შერჩევაა. ერთი შეხედვით მარტივი, მაგრამ ამავდროულად ძალიან სერიოზული და დასაფიქრებელი საკითხია. ამიტომ მნიშვნელოვანია კომპეტენტურ პირთან დაკავშირება, ვინც დაგვეხმარება ამ თუ იმ ქვეყანაში ჩვენს სურვილებზე მორგებული სასტუმროს შერჩევაში, რათა ადგილზე ჩასულები იმედგაცრუებულები არ დავრჩეთ. სწორედ ამიტომ OK! Travel Book გთავაზობთ რამდენიმე რჩევას, თუ რაზე უნდა გაამახვილოთ ყურადღება სასტუმროს შერჩევისას, რის შემდეგაც გაგიმარტივდებათ არჩევანის გაკეთება.
უპირველესად, თუ დასვენებას საზღვაო კურორტზე გეგმავთ, გირჩევთ აირჩიოთ ოლინკლუზივი, რაც ნიშნავს იმას, რომ თქვენ ისარგებლებთ საუზმით, სადილით და ვახშმით თავისი სასმელებით, როგორც ალკოჰოლურით, ასევე არაალკოჰოლურით. ამის ნათელი მაგალითია მალდივები. ბევრს არ აქვს ინფორმაცია, რომ იქ არ უნდა წახვიდეთ კვების პაკეტის გარეშე ან თუნდაც მხოლოდ საუზმის რეჟიმით, რადგან იძულებული ხდებით, იკვებოთ ადგილობრივ რესტორნებში, რაც საკმაოდ დიდ ხარჯებთან არის დაკავშირებული, ვიდრე ეს ოლინკლუზივ კვების რეჟიმის შემთხვევაშია. ანალოგიური სიტუაციაა თურქეთსა და ეგვიპტეში.
საბერძნეთს რაც შეეხება, აქ უკვე გვხვდება კვების სხვადასხვა პაკეტი და ყურადღება უნდა გავამახვილოთ იმაზე, თუ რა ლოკაციაზეა სასტუმრო. თუ არის ქალაქის ცენტრთან ახლოს, შეგიძლიათ აიღოთ საუზმით და შემდეგ მიირთვათ გარეთ, შეღავათიან ფასად. იგივე სიტუაციაა კვიპროსის შემთხვევაში, მაგრამ თუ სასტუმრო ქალაქიდან მოშორებითაა, შეიძლება მარკეტიც არ იყოს ახლოს, რაც უკვე დიდ დანახარჯებთან არის დაკავშირებული, ვიდრე ოლინკლუზივის შემთხვევაში იქნებოდა.
დუბაის შემთხვევაში არჩევანი თქვენზეა, შეგიძლიათ მხოლოდ საუზმით აიღოთ ან თუნდაც საუზმის გარეშე, რადგან აქ ყოველი ფეხის ნაბიჯზე შეგხვდებათ კვების ობიექტი მისაღებ ფასად.
კიდევ ერთი ძალიან მნიშვნელოვანი და გასათვალისწინებელი საკითხი სასტუმროზე მინიჭებული ვარსკვლავებია. შესაძლოა არ იცოდეთ, რომ სამ სხვადასხვა 5-ვარსკვლავიან სასტუმროში დიდი შანსია, სრულიად სხვადასხვა სიტუაცია და გარემო დაგხვდეთ. არის შემთხვევები, როცა სასტუმროს გარკვეული წლების წინ მიენიჭა 5 ვარსკვლავი, მაგრამ ახლა აღარ შეესაბამება შესაბამის სტანდარტებს. ამისათვის უნდა დააკვირდეთ ფასს, რათა იმედგაცრუებული არ დარჩეთ. ასეთ შემთხვევაში შესაძლოა დაგხვდეთ ერთმანეთისგან სრულიად განსხვავებული მიდგომა როგორც სისუფთავის, ასევე მომსახურების კუთხით.
ეგვიპტისა და თურქეთის შემთხვევაში გირჩევთ წახვიდეთ 5-ვარსკვლავიან სასტუმროში, რადგან დასვენების მთელ პერიოდს სასტუმროს ტერიტორიაზე ატარებთ და უნდა ისიამოვნოთ ბოლომდე, აქ თვალს ვერ დახუჭავთ ბევრ დეტალზე.
რაც შეეხება ევროპის ქვეყნებს, თავისუფლად შეგიძლიათ შეარჩიოთ 3-4-ვარსკვლავიანი სასტუმრო. აქ უკვე ყურადღებას ვაქცევთ მდებარეობას, მნიშვნელოვანია იყოს ქალაქის ცენტრთან ან მეტროსთან ახლოს. ევროპაში მოგზაურობის მიზანი ღირსშესანიშნაობების დათვალიერებაა, მთელი დღე გასული ხართ და სასტუმროში დიდი თანხის გადახდა არ არის აუცილებელი. ძირითადი ყურადღება უნდა გაამახვილოთ სისუფთავეზე, გარემოზე, უსაფრთხოებაზე, უბანზე… ამიტომ კარგი იქნება, თუ არჩევაში პროფესიონალი და გამოცდილი ადამიანი დაგეხმარებათ.
