მოგზაურობა და სხვადასხვა ქვეყნის მონახულება ყველა სეზონზე აქტუალური და სასურველია, მთავარია სწორად შეგვეძლოს მიმართულების არჩევა და დაგეგმვა ამა თუ იმ სეზონის მიხედვით. ამ დროს მნიშვნელოვანია მთელი რიგი ფაქტორების გათვალისწინება, უნდა ვიცოდეთ, რომელ ქვეყანაში რომელ სეზონზეა მოგზაურობა რეკომენდებული, რათა არასწორად დაგეგმვამ არ დატოვოს ჩვენში დანაკლისისა და იმედგაცრუების განცდა. OK! Travel Book გთავაზობთ რამდენიმე რჩევას, რაც დაგეხმარებათ მიმართულების არჩევაში ნებისმიერ სეზონზე.
დავიწყოთ ზამთრით. დეკემბერი წინასაშობაო და საახალწლო მზადებასთან ასოცირდება და ამ დროს ძალიან ბევრი ადამიანი ირჩევს ქვეყანას, თუ სად გაატარებს წლის ყველაზე ჯადოსნურ დღესასწაულს. შესაბამისად, აუცილებელია წინასწარ შევიძინოთ ბილეთები, რადგან მოთხოვნიდან გამომდინარე, ფასები ბევრად მაღალია სტანდარტულთან შედარებით. ამ პერიოდის გატარება მართლაც საუკეთესოა ევროპის ქალაქებში, მათ შორის პრაღაში, ვენაში, იტალიისა და გერმანიის ქალაქებში, ასევე აქტუალურია თბილი ქვეყნები, როგორიცაა ეგვიპტე, დუბაი, ტაილანდი, შრი-ლანკა, ვიეტნამი… აღსანიშნავია, რომ საახალწლოდ ძალიან კარგი პაკეტური ტურები არის ეგვიპტეში თავისი გალა ვახშმებით, ასევე ძალიან ლამაზია ამ პერიოდში დუბაი, მით უფრო, თუ გავითვალისწინებთ, რომ მაღალი კლასის სასტუმროები თავიანთ მომხმარებლებს განსაკუთრებულ ვახშმებს უწყობენ.
იანვარში გრძელდება თბილ ქვეყნებში დასვენების სეზონი, აქტუალური მიმართულებაა ასევე კვიპროსი, განსაკუთრებით იმის გათვალისწინებით, რომ საკმაოდ ბიუჯეტურია. ახალი წლის დღეების შემდეგ დასვენება კი საკმაოდ კარგი გადაწყვეტილებაა. ამ დროს ყველა ჩვენგანს სჭირდება განტვირთვა და ახალი წლის ახალი ძალებითა და ენერგიით დაწყება. როგორც თბილი ქვეყნები, ასევე სტამბოლიც ძალიან კარგი არჩევანია, ამინდებიც საკმაოდ კარგია ამ პერიოდში.
რაც შეეხება ზამთრის ბოლო თვეს, კვლავ გრძელდება თბილი ქვეყნების სეზონი. როგორც ცნობილია, ამ პერიოდში ვალენტინობაა და წყვილები ხშირად ამთხვევენ დასვენებისთვის განკუთვნილ დღეებს სწორედ თებერვალს. გარდა ამისა, ფასებიც ბევრად ბიუჯეტური და მისაღებია სხვა თვეებთან შედარებით, ამიტომ თუ გსურთ მოგზაურობის დაგეგმვა, ნამდვილად ერთ-ერთი საუკეთესო თვეა. ამ პერიოდში, გარდა თბილი ქვეყნებისა, შეგიძლიათ ევროპას და სტამბოლსაც ესტუმროთ. ნებისმიერი მიმართულება ძალიან აქტუალურია.
რაც შეეხება მარტს, ერთ-ერთი საუკეთესო თვეა მოგზაურობების დასაგეგმად, მით უმეტეს, რომ მარტში დედებისა და ქალთა საერთაშორისო დღე აღინიშნება. ამ დროს ძალიან ბევრი ადამიანი უკეთებს სიურპრიზს დედას, მეუღლეს ან საკუთარ თავს. შესაბამისად, მარტის პირველი ნახევარი განსაკუთრებულად მოთხოვნადი და სასურველია. თანაც დსთ-ს ქვეყნებში 15-მდე დასვენების დღეებია და საკმაოდ დატვირთულია მოგზაურებით. თებერვლისგან განსხვავებით, ფასები იწევს ზემოთ და დატვირთულობიდან გამომდინარე, ხშირად არის ადგილების პრობლემა სასტუმროებში. შესაბამისად, სასურველია წინასწარ დაგეგმვა და დაჯავშნა.
აპრილიდან და მაისიდან ძალიან აქტუალური და მოთხოვნადი ხდება ევროპის ქვეყნები, რადგან ამინდები გარანტირებულად კარგია, არც ცივა და არც ძალიან ცხელა, თან თუ გავითვალისწინებთ, რომ ევროპა ბევრ სიარულსა და ქალაქის ღირსშესანიშნაობების დათვალიერებასთან ასოცირდება. ამ პერიოდში ჯერ კიდევ შესაძლებელია თბილ ქვეყნებში მოგზაურობის დაგეგმვა დუბაის ჩათვლით, ასევე მაისის ბოლოდან აქტუალურია ტურები ანტალიის მიმართულებით.
რაც შეეხება ზაფხულს, ივნისიდან მოთხოვნა იზრდება თურქეთის ზღვის კურორტებზე: ანტალია, ბოდრუმი, ქუშადასი… აქ ყველანაირი პირობაა შექმნილი სრულყოფილი დასვენებისთვის. აღსანიშნავია, რომ საქართველოდან არის პირდაპირი ფრენები, პაკეტური ტურები, შესაბამისად, ზაფხულში ერთ-ერთი პრიორიტეტული მიმართულება საზღვაო კურორტებია. ევროპის ქვეყნებიდან კი ესპანეთის, იტალიის, პორტუგალიის, მალტას, საბერძნეთის მიმართულებაა ძალიან აქტუალური. ეს ის მიმართულებებია, სადაც ერთდროულად შეგიძლიათ დაათვალიეროთ ღირსშესანიშნაობები და დრო დაუთმოთ ზღვაზე განტვირთვას. უნდა აღინიშნოს, რომ ამ პერიოდში არ არის სასურველი დუბაისა და ეგვიპტეში დასვენება, რადგან ძალიან ცხელა. ასევე არ არის რეკომენდებული მაისიდან ოქტომბრის ბოლომდე მალდივებზე, ტაილანდში, შრი-ლანკასა და ვიეტნამში მოგზაურობა, რადგან ამ დროს იქ წვიმა და აუტანელი სიცხეა და დამსვენებელი ვერანაირ სიამოვნებას ვერ მიიღებს.
შემოდგომაზე გრძელდება ხავერდოვანი სეზონი, ამიტომაც ძალიან აქტუალურია თურქეთის კურორტები. ევროპის ქალაქებიც მოთხოვნადია, რადგან სიცხეები გადავლილია და არაჩვეულებრივი პერიოდია დასათვალიერებლად და ფეხით გასასეირნებლად. ნოემბრიდან კვლავ თბილი ქვეყნების მოთხოვნა იზრდება, იხსნება დუბაისა და ეგვიპტის სეზონი. ასევე შორეული მიმართულებები, სადაც გარანტირებულად კარგი ამინდებია.
