ბავშვებთან ერთად მოგზაურობა ყველაზე გამორჩეული და დასამახსოვრებელი პერიოდია, რა დროსაც უფრო მეტი დეტალის გათვალისწინებაა საჭირო, ვიდრე სტანდარტულად უფროსების მოგზაურობის შემთხვევაში. უნდა აირჩიოთ ისეთი მიმართულება, რომელიც თავიდან ბოლომდე ბავშვების კმაყოფილებასა და გახალისებაზეა მორგებული. თუ ჯერ არ გაქვთ გამოცდილება და არ იცით ძირითადად რაზე უნდა გაამახვილოთ ყურადღება, სამოგზაუროდ წასვლამდე OK! Travel Book მოგცემთ რამდენიმე რჩევას, რაც მიმართულების სწორად არჩევასა და დაგეგმვაში დაგეხმარებათ.
უპირველესად გირჩევთ ისეთ სრულ პაკეტურ ტურებს, სადაც არის პირდაპირი ფრენები თბილისიდან და ამაშივე შედის სამჯერადი კვება. ბავშვებთან ერთად სამოგზაუროდ კარგი არჩევანია თურქეთის საზღვაო კურორტები. სრული პაკეტური ტურების შემთხვევაში დამსვენებელს აეროპორტში ხვდებიან და სასტუმროში მიაბრძანებენ. ადგილზეა კვების სრული რეჟიმი. იგივე სიტუაციაა ეგვიპტისა და დუბაის ტურებზეც. ეს მიმართულებები განსაკუთრებულად კარგია შემოდგომა-ზამთრის პერიოდში, ხოლო ზაფხულში ყველაზე კომფორტული ეგვიტე და თურქეთია.
ორივე ქვეყანა გვაძლევს იმის საშუალებას, შევარჩიოთ ისეთი სასტუმრო, რომელიც თავისი ინფრასტრუქტურით, აკვაპარკებით, აუზებით, საბავშვო კლუბებით, ძიძის მომსახურებით… ბავშვებზე იქნება გათვლილი. ამ ტიპის სასტუმროებში მთელი დღის განმავლობაში იმართება საბავშვო გასართობი პროგრამები, რაც დამატებითი კომფორტია მშობლებისთვის.
რაც შეეხება ევროპას, დისნეილენდის ადგილმდებარეობიდან გამომდინარე, პირველ რიგში საფრანგეთი გვახსენდება, სადაც ბავშვები სრულიად სხვა, ჯადოსნურ სამყაროში ხვდებიან. ბავშვებთან ერთად ასევე ძალიან კარგი მიმართულებაა საბერძნეთი, რადგან აქაც არის ყველა ის პირობა, რაც ბავშვისთვის იქნება საჭირო. თუმცა, რასაკვირველია, წინასწარ უნდა ვიცოდეთ, რომელი სასტუმრო გვთავაზობს ჩვენი პატარების სურვილებზე მორგებულ მომსახურებებს.
ასევე კარგი ვარიანტია აბუ-დაბი და დუბაი, რადგან უამრავი საშუალებაა ბავშვების გასართობად. მაგალითად, ფერარის პარკი, საიდანაც პატარები საოცარი ემოციებით ბრუნდებიან. გარდა ამისა, საოცარი სანახავია აკვარიუმები, ყვავილების ბაღი, აკვაპარკები…
