ევროპაში ტურისტული სეზონის პიკი ივნისში, ივლისსა და აგვისტოშია. ამიტომ გთავაზობთ ყველაზე დატვირთული ადგილების ჩამონათვალს.
დუბროვნიკი, ხორვატია
დუბროვნიკში, „სამეფო კარის თამაშების“ გადაღებების შემდეგ, ტურისტული ნაკადები არ წყდება. სტატისტიკურად, ქალაქის ყოველ მაცხოვრებელზე საშუალოდ 27 ტურისტი მოდის.
დუბროვნიკის ხელისუფლებამ მდგომარეობის მოსაწესრიგებლად გარკვეული ზომები მიიღო. მერიამ საკრუიზო გემების მიღებაზე და ღირსშესანიშნაობების მონახულებაზე ლიმიტი დააწესა.
როდოსი, საბერძნეთი
როდოსი საბერძნეთის კურორტებიდან პოპულარობით მხოლოდ კუნძულ კრეტას ჩამოუვარდება, თუმცა ზომით კრეტაზე შვიდჯერ პატარაა. ამ ულამაზესი კუნძულის თითოეულ მაცხოვრებელზე 26 ტურისტი მოდის.
შესაბამისად, სეზონის პიკზე კუნძული, განსაკუთრებით მისი სანაპირო ზოლი და ცენტრალური უბნები სავსეა ადამიანებით.
ვენეცია, იტალია
ქალაქის მერიამ, ტურისტული ნაკადების სამართავად, შესვლისთვის გადასახადი დააწესა. თუ ვიზიტი 4 დღით ადრე დაიჯავშნა 5 ევრო, თუ 3 დღით ადრე -10 ევრო ღირს. ტურისტებს, რომლებიც ბინას ქალაქში ქირაობენ, გადასახადის გარეშე გადაადგილების უფლება აქვთ.
ჰერაკლიონი, კრეტა (საბერძნეთი)
ეს კრეტას უდიდესი ქალაქია, რომელსაც ყოველწლიურად დაახლოებით 6.5 მილიონი ტურისტი სტუმრობს. ამ ქალაქში ერთ ადგილობრივზე, საშუალოდ, 18 ტურისტი მოდის.
როდოსისგან განსხვავებით, ერაკლიონი შედარებით ნაკლებად გადატვირთულია, თუმცა გრძელი რიგების, ხმაურისა და ბინძური ქუჩების თავიდან არიდება რთულია.
ფლორენცია, იტალია
ფლორენციაც იმ ქალაქთა სიაშია, რომელსაც ტურისტების სიმრავლე პრობლემებს უქმნის. სეზონის პიკზე, თითო ფლორენციელზე, დაახლოებით, 13 ტურისტი მოდის. ადგილობრივი მოსახლეობის თხოვნით, ქალაქის ხელისუფლებამ ტურისტებისთვის გარკვეული შეზღუდვები დააწესა: აიკრძალა „არატიპური სატრანსპორტო საშუალებები“ და ექსკურსიებზე მიკროფონებით ლაპარაკი.
თუ გსურთ, რომ თქვენი მოგზაურობა მშვიდი და კომფორტული იყოს, ეს ინფორმაცია გამოგადგებათ.
