ქართული ელემენტებით შემკული რესტორანი Sheffpoint საუკეთესო ადგილია უგემრიელესი ქართული კერძების დასაგემოვნებლად. ეს არის სივრცე, სადაც ისტორია და თანამედროვეობა ერთმანეთთან თანხვედრაშია და ქმნის იმ შეუდარებელ გარემოს, რომელიც აქ გახლავთ წარმოდგენილი. თუ გსურთ, დაუვიწყარი გახადოთ ჩვეულებრივი დღე, Sheffpoint ამისთვის საუკეთესო გზაა. დეტალური ინფორმაციისთვის OK! გაესაუბრა რესტორნის სერვისმენეჯერ ლევან დავითაძეს.
როგორ გაჩნდა რესტორან Sheffpoint-ის გახსნის იდეა?
სამ ძმა კონცელიძეს ბავშვობიდან სურდა ჰქონოდა რესტორანი, რომელიც შემკული იქნებოდა ქართული ელემენტებით. სწორედ ამან განაპირობა ბათუმში ქართული კონცეპტუალური რესტორნის გახსნა. ვიდრე იდეა რეალობად იქცეოდა, დამფუძნებლებმა დიზაინერებთან ერთად გააკეთეს ინტერიერი, რომელიც ქმნის მშვიდ გარემოს, ადგილს, სადაც განტვირთვასა და გემრიელი კერძების მირთმევას შეძლებთ. აღსანიშნავია ისიც, რომ ავეჯი მთლიანად საქართველოშია წარმოებული, რათა ჩვენმა თითოეულმა მომხმარებელმა შეძლოს ქართული გარემოთი ტკბობა.
გვესაუბრეთ მენიუს სპეციფიკურობასთან დაკავშირებით.
უპირველეს ყოვლისა, უნდა აღინიშნოს ჩვენი შეფის, გიორგი კოხოძის წვლილი იმ უნიკალური მენიუს შექმნაში, რომელიც Sheffpoint-შია წარმოდგენილი. მას მიაჩნია, რომ არ უნდა დაიკარგოს ქართული ტრადიციული გემოები, მაგრამ ამასთანავე, ფაქიზად უნდა მოხდეს ვიზუალური და ტექნიკური გარდაქმნა ამა თუ იმ კერძის. შესაბამისად, ჩვენთან წარმოდგენილია მოდერნიზებული ვიზუალის მქონე ქართული კერძები, რომლებშიც ძალიან მარტივია ჩვენი ტრადიციული გემოების ამოცნობა. მნიშვნელოვანია ისიც, რომ ვგეგმავთ, მენიუ არ იყოს ჩარჩოებში მოქცეული. ჩვენი მიზანია, მომხმარებელს შევთავაზოთ წელიწადის ოთხივე დროს განსხვავებული სეზონური მენიუ. ასევე ვგეგმავთ მოვაწყოთ ევროპული, აზიური და ინტერნაციონალური დღეები, როდესაც ჩვენს სტუმრებს შესაძლებლობა ექნებათ დააგემოვნონ სხვადასხვა ერის ნაციონალური კერძები. გარდა ამისა, ძირითად მიზნად გვაქვს დასახული ჩვენი კერძებისთვის საჭირო ინგრედიენტები შეძლებისდაგვარად ადგილზევე დავამზადოთ. აგრეთვე, დავნერგეთ სურსათის უვნებლობის სისტემები, ე.წ. HACCP-ის სტანდარტები, რაც განაპირობებს ჩვენი მომხმარებლების უსაფრთხო კვებასა და მომსახურებას.
გვესაუბრეთ რესტორნის თანამშრომლების შესახებ.
ჩვენი გუნდი, როგორც სამზარეულოს, ისე სერვისის მიმართულებით, დაკომპლექტებულია ადგილობრივი პროფესიონალი კადრით. შესაბამისად, ჩვენთან მეგობრული გარემო და სასიამოვნო ატმოსფეროა. ეს არის ის, რაც ხელს შეგვიწყობს სამომავლოდ დიდ წარმატებას მივაღწიოთ და მოწინავენი ვიყოთ ქართულ ბაზარზე. აღსანიშნავია, რომ ჩვენ მათ მუდმივად ვუტარებთ ტრენინგებს, რაც ერთიორად ეხმარება გუნდს იმუშაონ შეკრულად და შედეგის დანახვა მარტივად შესაძლებელი გახადონ.
Sheffpoint-ს პანდემიის პირობებში უწევს თავის დამკვიდრება ქართულ ბაზარზე. რა სირთულეები ახლავს ყოველივე ამას?
უპირველესად, აღვნიშნავ, რომ პანდემიამ ყველაზე დიდი ზიანი სარესტორნო ბიზნესს მიაყენა, რადგან მასობრივად დაიკეტა კვების ობიექტები. თუმცა ჩვენ ყველა რეგულაციის დაცვით, დარწმუნებული ვარ, ძალიან მოკლე დროში შევძლებთ თავის დამკვიდრებას. რა თქმა უნდა, ეს ხარჯებს ზრდის, რადგან ბევრი ისეთი დეტალია, რომელთა გათვალისწინება აუცილებელია ეპიდემიოლოგიური ვითარებიდან გამომდინარე.
გვესაუბრეთ რესტორნის სამომავლო გეგმებთან დაკავშირებით.
რესტორნის დამფუძნებლების მთავარი იდეა და გეგმა გახლავთ, რომ ჩვენმა კერძებმა და მომსახურების სერვისმა Sheffpoint აქციოს ყველა ადამიანისთვის საყვარელ ადგილად. შესაბამისად, თუ ბიზნესი მოგვცემს საშუალებას, ვგეგმავთ საერთაშორისო ბაზარზე გასვლას და ჩვენი ბიზნესის ქსელად გარდაქმნას.
ტექსტი: მარიამ მთივლიშვილი
ფოტო: გიორგი კალანდაძე
