დღევანდელი ჩვენი რესპოდენტი ექიმი, პლასტიკური და რეკონსტრუქციული ქირურგი – ლაშა ოსეფაიშვილია, ადამიანი, რომელსაც უამრავი პაციენტი ნდობას უცხადებს. საკუთარი საქმის პროფესიონალი თვლის, რომ ეს პროფესია ეხმარება ადამიანების ცხოვრების ხარისხის გაუმჯობესებაში. ამ ინტერვიუში გაიგებთ, თუ როგორი იყო მისი კარიერული გზა, როგორ შექმნა 15წლიანი ქართული და საერთაშორის გამოცდილების შემდეგ, კლინიკა ,,Renew“, რომლის მთავარი პრინციპი პროფესიონალიზმი, სანდოობა და ადამიანზე ორიენტირებული მიდგომაა.
ლაშა, რამ განაპირობა თქვენი პროფესიული არჩევანი?
ლაშა ოსეფაიშვილი: ბავშვობიდან მედიცინა ჩემთვის ყველაზე ახლო სფერო იყო – დედა ექიმია, და სწორედ მისი მაგალითი გახდა ჩემთვის შთაგონება. ქირურგიისადმი ინტერესი ადრეული ასაკიდან გამიჩნდა. სწავლების პერიოდში უკვე უფრო კონკრეტულად დავინახე, რომ ქირურგია ის მიმართულებაა, რასაც ჩემი ცხოვრების უმეტეს ნაწილს მივუძღვნიდი.
როგორი იყო კარიერის დასაწყისი? სად მიიღეთ განათლება?
სამედიცინო განათლება მივიღე თბილისის სახელმწიფო სამედიცინო უნივერსიტეტში, რის შემდეგაც სწავლა გავაგრძელე უკრაინაში – ხარკოვის პოსდიპლომური სამედიცინო განათლების აკადემიაში და ზოგადი და გადაუდებელი ქირურგიის ინსტიტუტში, სადაც პრაქტიკული გამოცდილების მიღებას განსაკუთრებული მნიშვნელობა ჰქონდა.
შემდგომში, მივიღე მაგისტრის ხარისხი ბარსელონის ავტონომიური უნივერსიტეტში პლასტიკური და ონკო-ქირურგიის მიმართულებით. ვთვლი, რომ ამ გამოცდილებამ მასწავლა მედიცინის სისტემური და ინოვაციური ხედვა.
რომელი გამოცდილება იყო გარდამტეხი თქვენს კარიერაში?
გარდამტეხი ეტაპი იყო ხარკოვში რეზიდენტურის პერიოდი – სწორედ მაშინ მივხვდი, რომ ქირურგია ადამიანის ფიზიკური და ფსიქოლოგიური აღდგენის მნიშვნელოვანი საშუალებაა. ეს პროფესია მეხმარება ადამიანების ცხოვრების ხარისხი უკეთესობისკენ შევცვალო.
იყო ექიმი ნიშნავს…
იყო ექიმი ნიშნავს, პირველ რიგში, იყო გულისხმიერი და კეთილგანწყობილი პაციენტის მიმართ. ეს ნიშნავს იმას, რომ პაციენტს შესთავაზო მხოლოდ ის, რაც ნამდვილად სჭირდება, და ურჩიო ისე, როგორც მის ჯანმრთელობასა და კეთილდღეობას შეესაბამება. მნიშვნელოვანია, პატივი სცე მის გადაწყვეტილებას, მოუსმინო და იზრუნო მასზე ისე, როგორც საკუთარ ახლობელზე.
რა გაძლევთ მოტივაციას?
ჩემი მთავარი მოტივაციაა პაციენტის კმაყოფილებაა – როცა ვხედავ, რომ ოპერაციამ არა მხოლოდ ვიზუალური, არამედ ემოციური ცვლილება მოიტანა. როცა ადამიანი თავს უფრო თავდაჯერებულად და ბედნიერად გრძნობს – ეს ყველაზე დიდი სტიმულია.
ლაშა, როგორ გაჩნდა თქვენი კლინიკის შექმნის იდეა და რა იყო მთავარი პრინციპი, როცა მის მოდელს აყალიბებდით?
„Renew“-ის შექმნის იდეა წლების განმავლობაში დაგროვილმა გამოცდილებამ და ინდუსტრიაში სიახლეების დანერგვის სურვილმა გააჩინა. მიზანი იყო, ისეთი სივრცის შექმნა, სადაც პაციენტი თავს იგრძნობდა უსაფრთხოდ, ექიმებს კი შესაძლებლობა ექნებოდათ ემუშავათ თანამედროვე სტანდარტებით.
რენიუს მთავარი პრინციპია პროფესიონალიზმი, სანდოობა და ადამიანზე ორიენტირებული მიდგომა. მისი საფუძველი გახდა ის გუნდი, რომელთან ერთადაც წლები ვმუშაობდი – ადამიანები, რომელთა პროფესიონალიზმი, ერთგულება და ზრუნვა პაციენტზე, დღესაც ქმნის რენიუს იდენტობას.
ჩვენი მისიაა, რომ თითოეულმა პაციენტმა იგრძნოს არა მხოლოდ პროფესიონალური მომსახურება, არამედ სითბო და ნდობა — სწორედ ეს განასხვავებს რენიუს.
რა არის თქვენი კლინიკის მთავარი უპირატესობები?
რამოდენიმე მნიშვნელოვან უპირატესობას გამოვყოფდი:
- პაციენტზე ზრუნვის მაღალი ხარისხი და ინდივიდუალური მიდგომა;
- საერთაშორისო გამოცდილების მქონე ექიმთა გუნდი;
- უახლესი ტექნოლოგიებისა და ინოვაციური მეთოდების გამოყენება;
- პაციენტის აბსოლუტური უსაფრთხოება და კომფორტი.
ეს ყველაფერი ერთად ქმნის იმ გარემოს, სადაც შედეგი ყოველთვის მაღალი ხარისხისაა.
გუნდი, რომელიც რენიუს ქმნის…
ჩვენი გუნდი შედგება იმ პროფესიონალებისგან, რომლებთან ერთადაც არაერთი წელი ვიმუშავე სხვადასხვა კლინიკაში. ვიცოდი, რომ სწორედ ამ ადამიანებთან ერთად შესაძლებელი იქნებოდა ისეთი კლინიკის და ბრენდის შექმნა, რომელსაც საზოგადოება ენდობა.
ეს არის გუნდი, რომელიც იზიარებს საერთო ღირებულებებს – სიზუსტეს, სანდოობას და ზრუნვას. ისინი არიან რენიუს მთავარი ძალა.
რა გეგმები გაქვთ მომავლისთვის?
კლინიკა განაგრძობს გაფართოებას, როგორც სერვისების, ისე საერთაშორისო თანამშრომლობების მიმართულებით. უკვე დაწყებულია საერთო პროექტები ისრაელისა და ევროპის წამყვან კლინიკებთან, რაც საშუალებას მოგვცემს საქართველოში დავნერგოთ ყველაზე თანამედროვე მიდგომები.
მალე დავიწყებთ საგანმანათლებლო პროგრამებს ესთეტიკისა და ქირურგიის მიმართულებით – ჩვენი მიზანია, წვლილი შევიტანოთ ახალგაზრდა ექიმების განვითარებაში და საქართველოს მოსახლეობისთვის კიდევ უფრო ხელმისაწვდომი გავხადოთ მაღალკვალიფიციური, ინოვაციური მომსახურება.
რას ურჩევდით ახალგაზრდა ექიმებს, რომლებიც ახლა იწყებენ ამ გზას?
უპირველესად, არასდროს შეწყვიტონ სწავლა. მედიცინა ისეთი დარგია, რომელიც მუდმივად იცვლება, ვითარდება, და ამ რიტმს უნდა აჰყვე.
სწავლა, შრომა და მუდმივი მოძრაობა – ეს არის შედეგამდე მისასვლელი გზა, ამ შედეგს კი პაციენტის ღიმილი და მადლიერება ჰქვია.
