გადაზელილი ყველი ნადუღის გულსართით ნადუღის სოუსში
ინგრედიენტები
1 კგ ახალამოყვანილი იმერული ყველი
300 გრ ნადუღი გულსართისთვის და 200 გრ სოუსისთვის.
პიტნა, შაშკვლავი, 1 კბილი ნიორი, მარილი
1 ლ რძე
მომზადების წესი
პირველ ეტაპზე ვამზადებთ გულსართს: ნადუღი (თუ თხელია, უნდა გავწუროთ დოლბანდში) შევაზავოთ 1 კბილი გაჭყლეტილი ნივრით და წვრილად დაჭრილი მწვანილით, გემოვნებით დავამატოთ მარილი.
შემდეგ 1 კგ ყველი დავჭრათ თხელ ნაჭრებად. მოვათავსოთ სქელძირიან ჭურჭელში და დავასხათ 1 ლ თბილი რძე. დავდგათ დაბალ ცეცხლზე და ხის კოვზით პერიოდულად ამოვურიოთ. ყველი როგორც კი შეთბება, შევეცადოდ ნაჭრები კოვზით ერთმანეთს შევაწებოთ. თუ ვატყობთ, რომ ძალიან გაცხელდა, ცეცხლს მოვაშოროთ.
როდესაც ყველი დარბილდება და გაიწელება, გადმოვიტანოთ ხის დაფაზე და ხელით კარგად დავამუშაოთ. შევკრათ გუნდა და გავაბრტყელოთ დაახლოებით ისე, როგორც ხაჭაპურისთვის ცომის გუნდას ვაბრტყელებთ.
ჩავუდოთ გულსართი და თავი მოვუკრათ.
ვმუშაობთ ძალიან სწრაფად, ყველმა გაცივება რომ არ მოასწროს.
გამზადებული გუნდა მოკრული პირით გადავიტანოთ თეფშზე და ხელით გავაბრტყელოთ. მოვაყაროთ წვრილად დაჭრილი პიტნა და შაშკვლავი.
ყველის ნახარშს დავამატოთ შეუზავებელი ნადუღი და კარგად ამოვურიოთ ერთგვაროვანი მასის მიღებამდე. გემოვნებით დავამატოთ მარილი.
ყველის გუნდა ჩავდოთ თბილ სოუსში და მივირთვათ თბილი.
