მოგზაურობისთვის დიდი შემოსავალი სულაც არ არის აუცილებელი. შესაძლებელია წინასწარ დაგეგმვით, მოსალოდნელი ხარჯების განსაზღვრითა და შედარებით ეკონომიური ვარიანტების არჩევით იმოგზაუროთ და არც მინიმალურ კომფორტზე თქვათ უარი.
როგორც წესი, თვითმფრინავის ბილეთებისა თუ სასტუმროების ფასი გაცილებით დაბალია მაშინ, როდესაც მათ რამდენიმე თვით ადრე შეიძენთ. მნიშვნელოვანია წინასწარ ადევნოთ თვალი როგორც თვითმფრინავის ბილეთების, ისე სასტუმროების ფასებს და ისეთ დროს დაჯავშნოთ, როდესაც ფასი უფრო ნაკლებია. გაითვალისწინეთ, რომ იანვრის ბოლოდან თებერვლის ჩათვლით ფასები ბილეთებზე გაცილებით დაბალია.
ასევე შეგიძლიათ ისარგებლოთ შედარებით ბიუჯეტური ავიაკომპანიებით. აღსანიშნავია, რომ ბილეთების ფასი მუდმივად იცვლება, ამიტომ თვალი ადევნეთ ფასების ცვლილებას და მოგზაურობაც იმის მიხედვით დაგეგმეთ, თუ რომელ პერიოდში იქნება ბილეთი ყველაზე იაფი.
უმჯობესია, წინასწარ შეისწავლოთ აეროპორტიდან გადაადგილების გზები და გაცილებით ნაკლები დაგეხარჯოთ საზოგადოებრივი ტრანსპორტით გადაადგილებაში, ვიდრე ტაქსიში ან სასტუმროს/ავიაკომპანიის მიერ შემოთავაზებულ ტრანსფერში დახარჯავდით. ქალაქში გადასაადგილებლად საზოგადოებრივი ტრანსპორტი შედარებით იაფი საშუალებაა. როგორც წესი, ერთჯერადი ბილეთები უფრო ძვირი ღირს, ამიტომ უმჯობესია, თუ საზოგადოებრივი ტრანსპორტის რამდენიმედღიანი აბონემენტით ისარგებლებთ. თუ სხვა ქალაქებში ან სხვა ქვეყნებში გადასვლასაც გეგმავთ, არსებობს როგორც რეგიონალური, ისე საერთაშორისო მატარებლები და ავტობუსები. უმჯობესია, თუ მათ ფასებს წინასწარ გაეცნობით და ბილეთებსაც წინასწარ, ონლაინ იყიდით.
რაც შეეხება სასტუმროს, აქაც გვაქვს არჩევანი და დარჩენის სხვადასხვა ვარიანტი, შესაბამისად, მათი ფასებიც განსხვავებულია. მთავარია ნორმალური პირობები დაგხვდეთ და იყოს მეტროსთან ახლოს, რადგან ბიუჯეტური სასტუმროს შემთხვევაში ცენტრი გამოირიცხება. სასურველია ნომერი საუზმით აიღოთ, რადგან ძალიან დაბალი თანხა ემატება და ფულის დაზოგვის მიზნით გარეთ კვებას სჯობია.
წინასწარ მოიძიეთ ინფორმაცია იმ ღირსშესანიშნაობების, მუზეუმების, პარკების, ატრაქციონებისა თუ სხვა ადგილების შესახებ, რაც აუცილებლად სანახავია და სადაც შესაძლებელია, წინასწარ, ონლაინ შეიძინეთ ბილეთები. ასე არა მხოლოდ თანხას დაზოგავთ, არამედ დღის დაგეგმვაშიც დაგეხმარებათ და ყველაზე მოთხოვნად სანახაობებზე ვიზიტის საშუალებას მოგცემთ, რადგან ადგილზე ყიდვისას ხშირად რიგებია ან ბილეთები სულაც ხელმიუწვდომელი შეიძლება აღმოჩნდეს.
