სოფია კვინიკაძე 29 წლის ქართველი ბლოგერია, რომელიც ხალხმა სოციალურ ქსელში Depressed Georgian in South Korea სახელით გაიცნო. ახლახანს იგი სამხრეთ კორეელ მამაკაცზე დაინიშნა, მოულოდნელი ნიშნობის შესახებ კი მან საზოგადოებას ინსტაგრამის საშუალებით აცნობა. ქართველი ბლოგერის რჩეული მისივე კოლეგაა. როგორც ცნობილია, ქორწილი 25 აგვისტოს გაიმართება.
სოფიას აზიისადმი ინტერესი ჯერ კიდევ ბავშვობაში ნარუტოს ნახვის შემდეგ გაუჩნდა. მან საქართველოში ფიზიკა-მათემატიკის სკოლა დაამთავრა, თუმცა რადიკალურად განსხვავებული გზა აირჩია. ახალგაზრდა ბლოგერმა თავისუფალ უნივერსიტეტში ჩააბარა კორეული ენის შესასწავლად, მესამე კურსზე კი კავკასიის რეგიონში კორეული ენაზე სიტყვით გამოსვლის კონკურსში გაიმარჯვა. მან მაგისტრატურის საფეხურზე სწავლის გასაგრძელებლად ორწლიანი სტიპენდია მოიპოვა.
სწორედ ამის შემდეგ გაემგზავრა კორეაში, დაამთავრა ჩონბუკის სახელმწიფო უნივერსიტეტი კორეული ენის ფილოლოგიის მიმართულებით. სოფია არის სატელევიზიო მოდელი, რუსული და ინგლისური ენების თარჯიმანი, ასევე კორეაში სკოლასა და ბაღში ასწავლის ინგლისურ ენას. მას ასევე აქვს ქართველებისთვის დისტანციურად შესასწავლი კორეული ენის კურსი, სადაც ყოველწლიურად ასობით ადამიანი რეგისტრირდება.
ამჟამად ქართველ ბლოგერს facebook-ზე 404 ათასი გამომწერი, ხოლო insagram-ზე 230 ათასი გამომწერი ჰყავს. იგი არის ადამიანი, რომელიც ქართველ ხალხს უზიარებს საკუთარ რუტინას და გამოცდილებას. ასევე იმ ადამიანებს აძლევს რჩევებს, რომლებსაც კორეაში ცხოვრება უნდათ. სოფიამ არაერთ ადამიანს მისცა მოტივაცია და დააინტერესა აზიური კულტურით, ასევე, იგი აქტიურად ეწევა საქართველოს პოპულარიზაციას კორეაში.
რა თქმა უნდა, წარმატების მიღწევა მისთვის მარტივი არ ყოფილა, როგორც თვითონ განაცხადა „georgia forbes”-თან ინტერვიუში, ამ ყველაფერს დიდი შრომა და მოთმინება დასჭირდა.
„შეიძლება ვინმესთვის თავდაჯერებული, წარმატებული და უშიშარი გოგო ვჩანდე, მაგრამ ასე არ არის. ყოველ ახალ გამოწვევას მუხლების კანკალით ვხვდები. ზოგჯერ ხელები მიკანკალებს, მაგრამ, ალბათ, „ჩემეული“ მეთოდი სწორედ იმაშია, რომ მიუხედავად ასეთი ემოციურობისა და ნერვიულობისა, ღრმად მწამს, რომ სხვა თუ აკეთებს, იმავეს მეც შევძლებ”, – აღნიშნა მან.
ცნობისთვის, 2 წლის წინ სოფია საერთაშორისო ჟურნალ MALVIE Magazine-ის გარეკანზეც მოხვდა, მან ფოტოები გამომწერებს სოციალური ქსელის საშუალებით გაუზიარა.
#OK! ქართველი ბლოგერი სოფია კვინიკაძე საერთაშორისო ჟურნალის MALVIE Magazine-ის გარეკანზე
