PSP – ჩემი ოჯახის აფთიაქი, საქართველოს ფარმაციის ლიდერი, ხარისხის გარანტი, ევროპული ღირებულებების მქონე კომპანია წარმოგიდგენთ ,,ევროპულ ისტორიებს”.
წარმოშობით გერმანელ ფერდინანტ ოტენის სახელს თბილისში ერთ-ერთი პირველი აფთიაქის დაარსება უკავშირდება. იგი საქართველოში რუსეთ-თურქეთის 1877-1878 წლის ომის შემდეგ ყარსიდან ჩამოვიდა, სადაც რუსეთის არმიაში მსახურობდა. ფერდინანდ ოტენი იყო ფარმაციის მაგისტრი, მოგვიანებით თბილისის ლუთერანული ეკლესიის საბჭოს წევრი, კავკასიის ფარმაცევტთა ასოციაციის თავმჯდომარე და თბილისის საპატიო მოქალაქე.
ფერდინანდ ოტენის შვილიშვილის − მარია ოტენის თანახმად, თბილისში ჩამოსვლის შემდეგ, ფერდინანდი ქიმიკოსად მუშაობდა კიდევ ერთი თბილისელი გერმანელის − ჰეინრიხ სტუვეს ლაბორატორიაში, რომელიც მოგვიანებით მისი სიმამრი გახდა და რომელთან ერთადაც დაიწყო ფარმაცევტული საქმიანობა. იმ შენობის ასაგებად, რომელიც ახლანდელი ტაბიძის ქუჩაზე მდებარეობს, ოტენმა 1902 წელს შეიძინა მიწის ნაკვეთი. პირველ სართულზე აფთიაქი მოაწყო, ხოლო მისი მრავალშვილიანი ოჯახი მე-3 სართულზე ცხოვრობდა.
საქართველოს გასაბჭოების შემდეგ, 1921 წელს, ოტენის აფთიაქი ჩამოერთვა მის მფლობელს და გადაეცა სახელმწიფოს, ხოლო 1928 წელს ოტენების ოჯახს ჩამოართვეს საცხოვრებელი სახლის დიდი ნაწილიც და უშუალოდ ფერდინანდსა და მის ცოლს მხოლოდ მოსამსახურეების მცირე ოთახი და სამზარეულო დაუტოვეს.
შენობას, სადაც მე-20 საუკუნის დასაწყისში ოტენების ოჯახი ცხოვრობდა და მუშაობდა, საქართველოს კულტურის, ძეგლთა დაცვისა და სპორტის მინისტრის 2007 წლის 1 ოქტომბრის №3/181 ბრძანებით, კულტურული მემკვიდრეობის უძრავი ძეგლის სტატუსი მიენიჭა.
