OK! Gastro Book-ი ქართული ღვინის კომპანია „ორილოს“ წარმოგიდგენთ, რომლის საფერავიც საზოგადოებამ პირველად 2021 წელს დააგემოვნა. გამორჩეულმა და დასამახსოვრებელმა არომატებმა კი მაშინვე მონუსხა გარშემომყოფები და არაერთი მნიშვნელოვანი ჯილდოს მფლობელიც გახადა. ამ და სხვა საინტერესო საკითხების შესახებ ჟურნალი OK! „ორილოს“ დამფუძნებელ მარიამ ნახუცრიშვილს ესაუბრა, რომელმაც უფრო ვრცლად და დეტალურად გაგვაცნო კომპანიის დაფუძნებისა და განვითარების ისტორია.
უპირველესად, გაგვაცანით კომპანია. რამდენი ხანია, რაც „ორილო“ ბაზარზე გამოჩნდა და როგორ დაიბადა იდეა?
„ორილოს“ ხაშმის საფერავი საზოგადოებამ პირველად 2021 წლის WinExpo-ს ღვინის ფესტივალზე დააგემოვნა, სადაც დიდი მოწონება დაიმსახურა და პირველი ვერცხლის მედალიც მოიპოვა.
რაც შეეხება იდეას, ყოველთვის გვქონდა სურვილი, ჩვენი ხაშმის საფერავი ბოთლში ჩამოგვესხა და კომერციული დატვირთვა მიგვეცა, თუმცა მშობლები სხვა სფეროში იყვნენ დასაქმებულნი და ეს იდეა დიდი ხნის განმავლობაში ვერ განხორციელდა.
2020 წელს როდესაც პანდემია დაიწყო და ძირითადი საქმიანობა დისტანციურ რეჟიმზე გადავიდა, ჩამოვაყალიბეთ კომპანია „ორილო“ და 2021 წელს ჩამოვასხით პირველი 6000 ბოთლი.
არ შემიძლია არ აღვნიშნო, რომ ჩვენი კომპანიის საქმიანობაში ჩართულია ოჯახის თითოეული წევრი და ყველა მათგანს შეაქვს გარკვეული წვლილი „ორილოს“ წინსვლასა და განვითარებაში. სწორედ ამ მიდგომისა და დამოკიდებულების დამსახურებაა ისიც, რომ 2022 წელს მსოფლიოს ყველაზე მასშტაბურ და გავლენიან ღვინის კონკურსზე ინგლისში − Decanter World Wine Awards, ჩვენმა საფერავმა მოიპოვა პირველი ბრინჯაოს მედალი.
რატომ „ორილო“?
სახელწოდება „ორილო“ არის Orphan Ilo-ს შემოკლებული ვერსია, ქართულად „ობოლ“-ილო ნახუცრიშვილი. წინაპარი, რომელმაც ჩვენს ოჯახურ მარანს 100 წლის წინ ჩაუყარა საფუძველი სოფელ ხაშმში. სწორედ მისგან დაიწყო, ჩვენს ოჯახში, ხაშმის საფერავის დაყენების ტრადიცია. ამიტომ გადავწყვიტეთ სიმბოლურად მისი სახელის შეკვეცილი ვერსია დაგვერქვა კომპანიისთვის, რათა უცხოელი მომხმარებლისთვის უფრო მარტივად წასაკითხი, აღსაქმელი და დასამახსოვრებელი ყოფილიყო.
რა არის თქვენი კომპანიის მთავარი მიზანი?
ჩვენი კომპანიის მთავარი მიზანია, მოვახდინოთ ხაშმის საფერავის პოპულარიზაცია, როგორც დაცული ადგილწარმოშობის დასახელების ღვინის, საქართველოში და მის ფარგლებს გარეთ.
რას სახის ღვინოს სთავაზობთ საზოგადოებას?
ჯერჯერობით ჩვენი ოჯახური მარანი საზოგადოებას სთავაზობს ტრადიციული მეთოდით დაყენებულ ხაშმის საფერავს და წელს პირველად გამოვიტანეთ ბაზარზე საფერავი როზე – „ანასტასია“, რომელსაც ჩემი ქალიშვილის სახელი ჰქვია.
სად მდებარეობს „ორილოს“ ვენახები?
„ორილოს“ ვენახები მდებარეობს სოფელ ხაშმში, კერძოდ − ყარაბულახის ზონაში.
რა გამოარჩევს „ორილოს“ ღვინოს?
ღვინო არის ემოცია. შესაბამისად, ვფიქრობთ, მიდგომა და დამოკიდებულება, რომელიც ჩვენს ოჯახს ღვინისადმი აქვს, სული და გული, რომელიც ჩადებულია თითოეულ ბოთლში, გამოარჩევს ჩვენს ღვინოს სხვებისგან. ის ისტორია და მოგონება, რომელიც გრჩება თითოეული წვეთის დაგემოვნებისას.
სად შეგვიძლია „ორილოს“ ღვინის შეძენა და დაგემოვნება?
„ორილოს“ ხაშმის საფერავის შეძენა შესაძლებელია „8000 მოსავლის“ ყველა ფილიალში, ღვინის მაღაზია „სომელიეში“, „ბრენდ ვაინსში“ და „ღვინის მუზეუმში“, ხოლო როზე „ანასტასიას“ დაგემოვნებას შეძლებთ სასტუმრო „რუმს ყაზბეგში“ და თბილისის Holiday Inn-ში. ასევე, აღსანიშნავია ის ფაქტიც, რომ „ორილო“ გავიდა ექსპორტზე ამერიკის შეერთებულ შტატებსა და ტაილანდში.
როგორია თქვენი სამომავლო გეგმები?
ჩვენი თავდაპირველი სამომავლო გეგმაა ცნობადობის გაზრდა, რათა მეტ ქვეყანას გავაცნოთ ხაშმის საფერავი და ყოველ წელს დავამატოთ თითო სახეობის ღვინო. ასევე, დიდი სურვილი და გეგმები გვაქვს ღვინის ტურიზმის განვითარების ჩვენს ქვეყანაში.
FB: ORILO
Insta: orilo_winery
Mail: orilowine@gmail.com
www.orilo.ge | Tel: 599 88 19 88
