სანდრო ბაგრატიონი – „ონორეს“ დამფუძნებელი
რამდენი ხანია, რაც „ონორე“ გაიხსნა?
„ონორე“ 8 თვის წინ, ზუსტად პანდემიის პერიოდში გავხსენით. რასაკვირველია, უამრავი სირთულე ახლდა ამ პროცესს, თუმცა ყველაფერი გადავლახეთ და დღესდღეობით უამრავი ერთგული მომხმარებელი გვყავს, რაც ძალიან გვახარებს და მოტივაციას გვაძლევს, ვაკეთოთ უფრო მეტი.
როგორ გაჩნდა იდეა?
მე და ჩემს პარტნიორს ღვინის კომპანია გვქონდა, რომელსაც პანდემიის დაწყება საგრძნობლად შეეტყო. სწორედ ამან გვიბიძგა საზოგადოებისთვის შეგვეთავაზებინა კარგი სამწვადე, რომელიც „ონორეს“ გამოჩენამდე ფაქტობრივად არ არსებობდა.
როგორი იყო განხორციელების ეტაპები?
დავიწყეთ მობილიზება ამ იდეის გარშემო. ვიპოვეთ ადგილი ოქროს უბანში. ჩვენი ჩანაფიქრიც ის იყო, რომ ობიექტი არ გაგვეხსნა ტურისტულ ადგილას. გვსურდა ჩვენს ახლობლებს, მეგობრებს, ოჯახის წევრებს სიამოვნება მიეღოთ სხვადასხვა კერძისა და სასმლის მირთმევის პროცესისგან. ასე და ამგვარად, ვიპოვეთ ადგილი ძველი ჰოსპიტლის შენობაში, სადაც ნახევარი „ონორემ“ აითვისა, 6-7 თვის შემდეგ კი შენობის ნახევარში ბარი „მეობა“ გადმოვიდა. მის გვერდით კი ჩვენმა მეორე კაფემ − „აპრილმა“ დაიდო ბინა.
გვესაუბრეთ „ონორეს“ უპირატესობებზე.
ჩვენ ვართ ორიენტირებული მწვადზე, ჩვენი მთავარი მამოძრავებელი ძალა არის ქართული ბარბექიუ, რამდენიმე სახეობის მწვადი, ქაბაბი აზერბაიჯანულ სტილში.
გვესაუბრეთ ინტერიერზე.
ბევრი დამეთანხმება, რომ ქართული რესტორნების ინტერიერი ხშირ შემთხვევაში არის ფსევდოეთნოგრაფიული ელემენტებით გაჯერებული. ჩვენ თავიდან ავირიდეთ ეს სტილი და გავაკეთეთ ის, რაც რეალურად მოგვწონს – მინიმალისტური ინტერიერი, პატარა მენიუ, და საბოლოო ჯამში, გამოვიდა თანამედროვე სამწვადე. ყველას გემრიელი საკვები უყვარს და ამიტომ ინტერიერი თანამედროვეობას მოვარგეთ.
დღევანდელი გადმოსახედიდან, რამდენად გაამართლა იდეამ?
ჩვენი კვების ობიექტი გაიხსნა პანდემიის პერიოდში და ამას დაემთხვა ლოკდაუნი. მიუხედავად ამისა, თამამად შეიძლება ითქვას, რომ გადავურჩით და დღევანდელ დღემდე უკვე მეორე კაფეც გავხსენით „ონორეს“ გვერდით. აქედან გამომდინარე, „ონორე“ აღმოჩნდა წარმატებული, გაამართლა იდეამ და გადავიდა მეორე საფეხურზე.
როგორია „ონორეს“ სამომავლო გეგმები?
მიზნად გვაქვს დასახული, დავხვეწოთ ჩვენი მენიუ, კერძები, შევმატოთ სიახლეები ჩვენს ობიექტს და ავითვისოთ უფრო მეტი სივრცე.
ფოტო: ავთანდილ ქიზიყურაშვილი, გვანცა გიგაური, სანდრო ბაგრატიონი
