Newport Hotel Kutaisi – საერთაშორისო სტანდარტებით შექმნილი ოთხვარსკვლავიანი სასტუმროა. იგი ქალაქის ცენტრში, კოლხურ შადრევანთან მდებარეობს და ტურისტული ვიზიტისთვის იდეალურ ლოკაციას წარმოადგენს, რადგან დამთვალიერებელს ქალაქის ყველა ღირშესანიშნაობის ფეხით მონახულება შეუძლია.
სასტუმრო „ნიუპორტის“ შენობა 1914 წელს აშენდა და კულტურული მემკვიდრეობის ძეგლს წარმოადგენს. ნიუპორტის გუნდმა Fortis Group-ის დიზაინერებთან ერთად, თითქმის დაშლილ შენობას პირვანდელი ისტორიული სახე დაუბრუნა და მას ახალი სიცოცხლე შესძინა. შესაბამისად, სასტუმროს გამორჩეული არქიტექტურის მქონე ცისფერ შენობას თავდაპირველადაც ზუსტად იგივე იერსახე ჰქონდა, როგორიც დღეს.
სასტუმროში შესვლისთანავე დაგხვდებათ თანამედროვე ინტერიერი არტ-დეკო ელემენტებით. ძველსა და ახალს შორის კონტრასტის შექმნა გვსურდა, რაც ვფიქრობ, წარმატებით გამოგვივიდა. ინტერიერში ლურჯი, ვარდისფერი და კრემისფერი ტონები უხვადაა გამოყენებული. ასევე სხვადასხვა ფაქტურა, როგორიცაა ხე, ქვა, ხავერდი, მეტალი და სხვ.
საბოლოო ჯამში, ინტერიერი საინტერესო და, რაც მთავარია, მშვიდი, კომფორტული გამოვიდა, რასაც ჩვენი სტუმრები ხშირად აღნიშნავენ.
სასტუმროს სახელწოდება თვითონ ქუჩამ და გარემომ გვიკარნახა. შენობა ნიუპორტის ქუჩაზე მდებარეობს, ასევე ქუთაისი და ქალაქი ნიუპორტი (დიდი ბრიტანეთი) 1991 წლიდან დაძმობილებული ქალაქები არიან. აქაც გვსურდა ისტორიულ ქუთაისსა და თანამედროვე ევროპულ ღირებულებებს შორის კონტრასტი ყოფილიყო.
ვფიქრობთ, Newport Hotel თანამედროვე, დღევანდელი ქუთაისის სახეა და, ამავდროულად, მის ისტორიულ ფესვებს ეფუძნება.
რაც შეეხება სასტუმროს შესახებ კონკრეტულ დეტალებს, სასტუმროში განთავსებულია 34 ნომერი – აქედან 2 ლუქსისა და 32 სტანდარტული ტიპის.
ნომრები თანამედროვე სტანდარტების შესაბამისადაა აღჭურვილი. სასტუმროს ტერასიდან კი ქალაქის საუცხოო ხედები იშლება.
სტუმრებს ასევე ვთავაზობთ ე. წ. რუმსერვისს, კონსიერჟისა და ბელბოის მომსახურებას, აეროპორტში დახვედრას და გაცილებას, 24-საათიან მიმღებს, უფასო პარკინგს, კონტინენტალურ საუზმეს, გიდის სერვისს და სხვა მრავალ ისეთ მომსახურებას, რომელიც სტუმრის ჩვენთან დარჩენას კომფორტულს ხდის.
ყველა სტუმარს ინდივიდუალურად ვუდგებით, რათა მათი ქუთაისში ვიზიტი განსაკუთრებულად დასამახსოვრებელი იყოს. სასტუმროში ასევე განთავსებულია რესტორანი Café Newport, რომელიც უცხოელ და ქართველ ვიზიტორებს გემრიელი ქართული და ევროპული კერძებით უმასპინძლდება.
სასტუმროს არქიტექტურის, ლოკაციის, სერვისებისა და მომსახურების ხარისხიდან გამომდინარე, სასტუმრო გათვლილია საშუალო და მაღალ სეგმენტზე. დაბალ სეზონზე საშუალო ფასი 75-80 დოლარია, ხოლო მაღალ სეზონზე – დაახლოებით 100 დოლარი.
სასტუმრო 2021 წლის ივლისში გაიხსნა და კოვიდპანდემიის მიუხედავად, ტურისტების ნაკლებობა ნამდვილად არ გვიგრძნია. 2022 წელი საშუალო 65%-იანი დატვირთვით დავასრულეთ, 2023 წელს კი, მიმდინარე მონაცემებიდან გამომდინარე, საშუალოდ 75%-იან წლიურ დატვირთვას ვპროგნოზირებთ.
სასტუმროს ძირითადი ვიზიტორები გალფის ქვეყნებიდან არიან, თუმცა ბოლო პერიოდში შეინიშნება ევროპელი ტურისტების მატებაც, რაც ქუთაისის აეროპორტში სხვადასხვა მიმართულების ფრენების დამატებას უნდა უკავშირდებოდეს.
ასევე ხშირად გვსტუმრობენ ქართველებიც, ბიზნესვიზიტორები თბილისიდან და სხვადასხვა ოფიციალური პირები სამთავრობო სტრუქტურებიდან, არასამთავრობო ორგანიზაციებიდან და საელჩოებიდან. არაერთხელ გვიმასპინძლია სპორტული გუნდებისთვისაც საქართველოსა და სხვადასხვა ქვეყნიდან.
წელსაც ერთ-ერთი მნიშვნელოვანი სპორტული ღონისძიების ოფიციალური პარტნიორები ვართ. 2021 წელს, როდესაც სასტუმრო ოფიციალურად გავხსენით, ჩვენს სეგმენტში კონკურენცია, ფაქტობრივად, არ არსებობდა. თუმცა ბოლო პერიოდია ქალაქში რამდენიმე მაღალი დონის სასტუმრო გაიხსნა, რაც ძალიან გვახარებს, რადგან სწორედ კონკურენციის პირობებში იბადება ახალი იდეები და უმჯობესდება ტურისტული სერვისები, რაც ჯამში მომხმარებლისთვის ყოველთვის დადებითის მომტანია.
სამომავლოდ ვგეგმავთ სასტუმროში საკონფერენციო სივრცის დამატებას, რადგან MICE მიმართულებაზე მოთხოვნას ნამდვილად ვხედავთ. ასევე იგეგმება სასტუმროს ტერასაზე ღია ბარისა და რესტორნის მოწყობაც. რაც შეეხება სხვა სამომავლო გეგმებს, „ნიუპორტის“ გუნდი აქტიურად სწავლობს სხვადასხვა ლოკაციას და შესაძლებელია ამ ბრენდის სახელით მალე ახალი სასტუმროც გავხსნათ და ქსელი გავაფართოოთ. მანამდე კი სრული ყურადღება ჩვენს არსებულ ვიზიტორებსა და ხშირ სტუმრებზე გვაქვს.
ტექსტი: ნანა კუკულავა
